TITAS 1 - Laibaibal Thiang (BSI)

¹ Paul, Pathian thimmi hna zumhnâk ning le Pathian-ṭihzahnâk in biatak hngalhpinâk tlamtling he Pathian caah ṭemmi sal le Jesuh Krih Lamkaltu ka si.

² Cân hramthawk hlan in a rak kamh cangmi zungzal nunnâk ruahchannâk kha lih a chim kho lomi Pathian nih a cân hmân teah,

³ kan Khamhtu Pathian nawlpêk ningin ka sinah a bia chimnâk thawngin a langhter.

⁴ Titas, â khatmi kan zumhnâk i kafa taktak, Pa Pathian le Bawipa Jesuh Krih kan Khamhtu sinin zângfahnâk, velngeihnâk le daihnâk na sinah um ko seh.

⁵ Hiruangah Kret tikulh ah kan chiah ta, cucu lîm lomi thil kha ningcang tein narak tuah i nawl kan pêk bangin khua kipah upa kha na rak chiah hna nâkhnga-

⁶ mi pakhat khat kha sawiawk umlo, nupi pakhat ngei, zumhtlâk, fale nomhhnaihnâk le ningcang loin khua a sami an si lo ahcun upa rian ṭuan hna seh.

⁷ Zeitintiah kawhhran hotu cu Pathian chawkengtu a si caah, sawi awk um lomi a si hrimhrim awk a si, mahnawl ummi, thinhun fawi, misurhang-duhtukmi, mi velhhmang, chawva ah hâkkaumi an si awk a si lo,

⁸ asinain conglomh thiam, ṭhatnâk duhmi, lungfimmi, a dingmi, a thiangmi le amah le amah â uk khomi an si awk a si,

⁹ cawnpiak a rak si cang bangin zumhtlâk bia fek tein â tlaihmi a si lai, cuticun a dikmi cawnpiaknâk in mi a chimhhrin khawh lai i elhnialtu kha an lung a pemter khawh lai.

¹⁰ Zeitintiah nawlngai lomi duhpauh in biachim hmang le hlengtu tampi an um, a hlei in cuarpartanmi hna chungin an si,

¹¹ cuhna nih chawva ningcang loin an hmuhnâk dingah chim loding tiang anchim i chungkhar ningin an hlenmi zong an um, cuhna cu ankâ huhpiak hrimhrim ding an si.

¹² Anmah profet hna lak i pakhat zong nih, “Kret tikulh chungmi hna cu mi lihchim a sualmi sahrang bantuk, mi thathu mi pawkau an si,” tiah a ti kha.

¹³ Hi hngalhtermi hi a dikmi a si, Cucaah zumhnâk dik ah an um khawh nâkhnga fak piin si hna,

¹⁴ biatak mer takin Judah tuanbia le minung nawlpêkmi biapi ah a ruatmi hna bia kha zeiah rak rel hna hlah.

¹⁵ Mithiang caah thil vialte a thiang, asinain mithûrhnawm le zumlotu caah a thiangmi zeihmanh a um lo, an ruahnâk le an chiaṭha-hngalhnâk tiangin a thûr cang.

¹⁶ Pathian a hngal ngaimi in an i phuang nain tuahsernâk in an hlawt tawn, fih a nungmi, nawl a ngai lomi le thilṭha tuahnâk ah a tling lomi an si.