SALM 99 - Laibaibal Thiang (BSI)1 BAWIPA nih a uk; mikip cu ther hna seh! Amah cu cherubim karlak ah a um, vulei hi i hnin seh. 2 BAWIPA cu Zion ah a lianngan i mi vialte cungah a ummi a si. 3 Na min lianngan le ṭihnung cu thangṭhat hna seh amah cu a thiang. 4 Siangpahrang ṭhawnnâk nih diknâk kha a dawt i a dikmi biaceihnâk na fehter, Jakob hna sinah dinnâk le diknâk na dirter. 5 BAWIPA kan Pathian cu hlawrh u law, a kehram in bia u amah cu a thiang. 6 Moses le Âron kha a tlângbawi hna chungmi an si, Samuel cu a min hlamtu hna sinin a si; annih nih BAWIPA kha an auh i amah nih a leh hna. 7 Minmei tomin bia a run chim tawn, a hngalhtermi bia le a nawlpêkmi kha an zulh. 8 Maw, BAWIPA kan Pathian, nangmah nih annih cu na leh hna i an tuahmi cungah phu hlam tawn hmanhlaw, nangmah cu annih ngaithiamtu Pathian na si. 9 BAWIPA kan Pathian cu hlawrh u law, a tlângthiang ah amah cu bia u; zeitintiah BAWIPA kan Pathian cu a thiang. |
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
Bible Society of India