SALM 97 - Laibaibal Thiang (BSI)

¹ BAWIPA nih a uk; vulei hi i lawm seh law, tikulh tampi zong i nuam hna seh.

² Khuadawm le muihnâk nih an kulh i dinnâk le diknâk cu a bawiṭhutdan hrambunhnâk a si.

³ A hmaiah mei a kal i a dûmtu a ral kha a kangh tawn hna.

⁴ A nimtlau nih vawlei hi a ceuh tawn i vulei nih a hmuh tikah a ther tawn.

⁵ BAWIPA hmaiah tlâng hna sathau meiin bangin an tlumdih, Leipumpi BAWIPA hmai hrimhrim ah khan.

⁶ Van nih khin a dinnâk a phuan i mikip nih a sunparnâk an hmuh.

⁷ Kherchawmmi milem a biatu vialte cu ningzak in um hna seh, milem sawhsawh â uanpi mi hna cu. Nannih pathian vialte hna amah cu bia u.

⁸ Zion nih a theih i â lawm, Maw BAWIPA, na biaceihmi ruangah Judah fanu hna cu an i lawm.

⁹ Zeitintiah Maw BAWIPA nang cu leipumpi ah na cungnungbik i nangmah cu pathian dang vialte cungah cawisan na si.

¹⁰ Nannih Pathian a dawtu hna, Ṭhatlonâk kha hua hna u! Amah nih a mithiang hna nun cu a kilven tawn, misuaksual hna kut chungin a khamh tawn hna.

¹¹ Miding kha a ceuh tawn hna i lungthin a dikmi caah lomhnâk a phân tawn.

¹² Nannih miding hna BAWIPA ah i lawm u law, a min thiang philhlonâk ah lomhnâk bia chim u.