SALM 94 - Laibaibal Thiang (BSI)

¹ Maw BAWIPA Pathian, phuhlamnâk ngeitu, maw Pathian, phuhlamnâk ngeitu, run ceu tuah.

² Tho tuah, maw, nang lei i biaceihtu, ruamkaimi kha an phut ningin dân tat hna.

³ BAWIPA, misuaksual hna nih zeicandah, misuaksual hna nih zeicandah an tei lai?

⁴ An duhmi pauh chim in, tluangkhawnnâk bia lawng te an chim; sualpalhnâk a tuahmi kha an ruam a kai tawn.

⁵ Maw BAWIPA, nami kha an cheuhmal dih hna i na ro kha an serhsat hna.

⁶ Nuhmei le khual kha an thah hna i pa ngeilo kha an nawn hna.

⁷ “BAWIPA nih a hmu hlei lai lo, Jakob hna Pathian zong nih a hngal lai lo,” tiah an ti tawn.

⁸ Mihrut hna, hngal tuah u, lungtlawm hna, zeitikahdah nan fim lai?

⁹ Theihnâk hnâ a sertu nih a thei lai lo maw? Mit a sertu nih a hmu kho lai lo maw?

¹⁰ Miphun kip a cawnpiaktu nih, a remh kho lai lo maw? Minung sinah hngalhnâk cawnpiaktu a si.

¹¹ BAWIPA nih minung hna ruahnâk hi, zeihmanh lo a si kha a hngalh.

¹² Maw BAWIPA, na nawlbia chungin na cawnpiakmi hna cu mivanṭha an si.

¹³ Misuaksual ca i khor cawh a si hlan pauh cu, an harsatnâk chungin na dinhter khawh lai.

¹⁴ Zeitintiah BAWIPA nih a mi kha hnulei a chît hna lai lo, a comi ro zong a kaltâk hna lai lo.

¹⁵ Asinain miding hna caah biaceihnâk a rak kir ṭhân lai i lungthin a dikmi vialte nih an zulh lai.

¹⁶ Sualnâk tuahtu hna a kan doh piaktu dingah ahodah a tho lai? Sualpalhnâk tuahtu hna ralchantu dingah ahodah ka ai awh in a dir?

¹⁷ BAWIPA cu aka bawmtu sihlahsehlaw, dai tein umnâk ah ka nunnâk a phân cang lai.

¹⁸ “Ka dirhmun a ṭha lo,” ka ti lioah khan, Maw BAWIPA, na vêl nih a rak ka tlaih lai.

¹⁹ Ka lungsi a vangh lio ah, ka hna na ngamter i naka lomhter.

²⁰ Sualpalhnâk bawiṭhutdan, zer ngai i phung bangin an tuahmi cu nangmah he hawikomh ter a si hnga maw?

²¹ Miding thah tim in an i tong tawn i sualnâk ngeilomi thisen cu sual an phawt tawn.

²² Asinain BAWIPA cu ka ralhruang a si, ka Pathian cu kâ thuhnâk lungpi a si.

²³ Amah nih an sualpalhnâk bangin an cungah a tlunter lai, an suahsualnâk ruangah a tan dih hna lai; BAWIPA kan Pathian nih a tan dih hna lai.