SALM 89 - Laibaibal Thiang (BSI)

¹ BAWIPA vêlngeihnâk cu zungzal in hla in ka sak lai, ka hmurkâ in zumhtlâk na sinâk cu chan vialte tiangin a chim lai.

² Zeitintiah, “Velngeihnâk cu zungzal in dirh a si lai i zumhtlâk na sinâk cu vanah na fehter lai,” tiah ka ti cang.

³ “Ka thimmi sinah bia ka kam cang i ka sal David sinah chiat ka serh cang.

⁴ Na tefa kha ka fehter zungzal lai, na bawiṭhutdan zong chanvialte nguh in ka dirh lai,” tiin (Selah)

⁵ Maw BAWIPA, van hna nih khuaruahhar na tuahmi an thangṭhat lai, mithiang hna pumhnâk ah zumhtlâk na sinâk hi an thangṭhat lai.

⁶ Zeitintiah vanah khin BAWIPA he cuai thlai khawh hodah a um? Thil ti khomi hna lakah BAWIPA bantuk hi an um hnga maw?

⁷ Mithiang hna pumhnâk ah Pathian cu lianngan ngai i ṭih awk a si, a pawngkammi vialte zong nih an hmaizah awk a si.

⁸ Maw BAWIPA, ralkapbu Pathian, nangmah bantuk thil ti kho ahodah a um maw BAWIPA? Zumhtlâk na sinâk zong nih an in kulh dih.

⁹ Rili tilet a thomi cungah bia na ceih i tilet a tho liomi kha na daihter tawn hna.

¹⁰ Nangmah nih Rahab cu ral bantukin na thah i na ṭhen hmal dih; na ral kha na ban ṭhawnnâk in na ṭhawl dih hna.

¹¹ Van hna khi nata an si i vulei zong hi nata a si; vawlei le a chung i a ummi vialte hi nangmah dirhmi lawng te an si.

¹² Chak le thang cu nangmah ser a si i Tabor le Hermon tlâng hna nih na min ruangah lunglawm in an in thangṭhat tawn.

¹³ A ṭhawngmi ban na ngei, na kut hi a ṭhawng i na orhlei kut cu a hlei in a sang.

¹⁴ Dinnâk le biaceihnâk dik cu na bawiṭhutdan hrambunhnâk an si i vêl le biatak cu na hmai ah an kal tawn.

¹⁵ Duh a nungmi thawngpang theitu kha an van a ṭha! Maw BAWIPA cu hna cu na hmai ceu ah khua an sa tawn.

¹⁶ Na min ruangah nitlâk tein an i lawm tawn, na dinnâk ruangah cawisan an si.

¹⁷ Zeitintiah nangmah cu a sunglawimi an ṭhawnnâk na si.

¹⁸ Zeitintiah kan phaw hi BAWIPA ta a si i kan Siangpahrang hi Israel mithianghlim hna ta a si.

¹⁹ Na mi thiang sinah langhnâk in bia na chim, thil tikho ngaimi pa cu ka bomh i mizapi chungin thimmi cu ka thangṭhat,

²⁰ Ka sal David cu ka hmuh i amah cu a thiangmi ka chiti ka thuh cang.

²¹ Ka kut in fek tein ka tlaih lai i ka bân nih a ṭhawnter lai.

²² Ral nih an hlengkho lai lo i minung fa nih fahnâk an pe kho lai lo.

²³ Amah dohtu kha a hmaiah ka thluk hna lai i amah huatu kha dân ka tat hna lai.

²⁴ “Amah sinah zumhtlâk ka sinâk le ka vêl cu a um zungzal lai, ka min ruangah aki cu thangṭhat in a um lai.

²⁵ A kut cu rili cungah nawl ka ngeihter lai i a orhlei kut nih tipi cungah nawl a ngei lai.

²⁶ Amah nih, “Nang cu ka Pa na si i ka Pathian, ka khamhnâk lungpi na si,” tiah a ka auh lai.

²⁷ Kei zong nih amah cu fater ah ka ser lai i lei i siangpahrang hna lakah a sangbik ah ka ser lai.

²⁸ Ka vêlngeihnâk cu zungzal in a caah ka kilven lai i ka biakam cu a sinah fek tein a um lai.

²⁹ A tefa hna cu zungzal in ka umter hna lai i a bawiṭhutdanh zong van a hmunh chung a hmun ve lai.

³⁰ “A fale nih ka nawlbia an mertâk i ka biaceih ningin an um lo i

³¹ Ka phunglam hna buar in, ka nawlpêk mi an zulh lo ahcun,

³² An nawlbuarnâk cu thirfung in ka hrem hna lai i an palhsual ruangah velh an tong lai.

³³ Asinain ka vêlngeihnâk cu a sin in ka lâkpiak dih lai lo, zumhtlâk ka sinâk pakpalawng i a candih cu ka siang lai lo.

³⁴ Ka biakam cu ka hrawk lai lo i ka kâ in a chuakmi bia cu ka thleng ti lai lo.

³⁵ Voikhat ka thianhnâk in chiat kâ serh i David sinah lih ka chim lai lo.

³⁶ A tefa kha zungzal ca a si lai i a bawiṭhutdanh cu ka hmai ah ni bangin a dir lai.

³⁷ Thlapa bangin zungzal caah fehter a si lai i cunglei van i zumhawktlâk biahngaltu bantuk khin. (Selah)

³⁸ Asinain nangnih cun hnulei chit in na duh lo i sathau na thuhmi cungah na thin a hung.

³⁹ Na sal biakamnâk cu na lêt piak i a bawiluchin cu lei ah thla in zeiah na rel ti lo.

⁴⁰ Kulhnâk vampang vialte na hrawh i a ralhruang kha na hrawh cikcek hna.

⁴¹ Lam i a kalmi kip nih thil an lâk piak i a pawngkammi chimchiat in a rak um.

⁴² A ral hna kut na ṭhawnter hna i a ral vialte kha an lung na thawhter.

⁴³ A harmi a vainam na bilhter i raltuknâk ah na bawm ti lo.

⁴⁴ A sunparnâk na donghter i a bawiṭhutdanh cu lei ah na hlawnh piak.

⁴⁵ A no lio cân na tawiter i mualphonâk puan na aihter.

⁴⁶ Maw BAWIPA, zeicandah a rauh lai? Nâ thup peng ko lai maw? Na thinhunnâk cu a alh peng ko lai maw?

⁴⁷ Ka cân tawining ka philhpiak hlah; zeitintiah minung fale hna hi hitluk santlai loin narak ser hna?

⁴⁸ Thih ni hmu lo dingin a nungmi ahodah a um? Thlân ṭhawnnâk chungin â khamh khomi ahodah um?

⁴⁹ Bawipa, hlan lio na velngeihnâk hmasa kha khuazeiahdah a um i David sin i chiatserh in na kamhmi hna kha khuazeiahdah an um kun?

⁵⁰ Bawipa, na salle an thangchiatning hi philh hlah, mi tampi an thangchiatnâk cu keimah te lawngin ka tuar tawn.

⁵¹ Maw BAWIPA, na ral hna nih zei an in rel lo ning hi, sathau na thuhmi hi a kalnâk pauh ah an thangchiat.

⁵² BAWIPA cu zungzal in thangṭhat in um seh. Amen le Amen.