SALM 86 - Laibaibal Thiang (BSI)

¹ Maw BAWIPA, na hna chi law, run ka let hrâm ko; zeitintiah sifak le chambaumi ka si.

² Ka nun hi ka kilven piak ko, zeitintiah a thiangmi ka si; ka Pathian na si, nangmah bochantu na sal hi ka khamh ko.

³ Maw BAWIPA, ka zângfah hrâm ko, zeitintiah nitlâk tein nangmah cu kan auh.

⁴ Na sal nunnâk hi lawmhter hrâm ko, zeitintiah Maw Bawipa, ka nunnâk nih nangmah lawng an zoh.

⁵ Zeitintiah Bawipa, nangmah cu na ṭha, ngaithiam dingin timhcia i a ummi na si, an autu hna cungah vêl tampi a ngeimi na si.

⁶ Maw BAWIPA, ka thlacamnâk hi ka ngaihpiak law, zângfah kan nawlnâk aw hi ka theihpiak hrâm ko.

⁷ Ka vansan ni ah kan auh lai, zeitintiah nangmah nih naka leh lai.

⁸ Maw BAWIPA, pathian hna lakah nangmah bantuk ahohmanh an um lo; na tuahmi bantuk a tuah khotu zong an um lo.

⁹ Maw Bawipa, na sermi miphun kip na hmai ah an ra lai i an in biak lai, na min cu an thangṭhat lai.

¹⁰ Zeitintiah nangmah cu na lianngan i khuaruahhar thil hna na tuah tawn; nangmah lawnglawng hi Pathian na si.

¹¹ Maw BAWIPA, na lam cu kan cawnpiak law, na biatak ah kan um lai; na min lawnglawng ṭih dingin lungthin pakhat ka ngeihter ko.

¹² Maw Bawipa, ka Pathian, ka lungthin diklak in kan thangṭhat lai, na min hi zungzal in ka thangṭhat lai.

¹³ Zeitintiah ka cung i na vêl hi a ngan tuk, seol hmun a thuhnâk bik in ka thlarau cu na khamh cang.

¹⁴ Maw Pathian, miporhlaw hna nih anka doh i zângen hmang mibu hna nih ka nunnâk anka kawl, nangmah kha an hmai ah an in chia bal lo.

¹⁵ Maw BAWIPA, nangtu cu vêl in na khat, mi zângfahthiam, lungsau le zawnruahnâk le biatak in a liammi Pathian na si.

¹⁶ Maw, hmailei chit in, ka zângfah hrâm ko! Na sal sinah na ṭhawnnâk pe law, na salnu fapa hi khamh ko sawh.

¹⁷ Na ṭhatnâk hmelchunhnâk cu ka hmuhter law, aka huatu hna nih cucu an hmuh i ningzak ngai i an um nâkhnga, BAWIPA nangmah nih naka bomh caah, ka hna na ngamter.