SALM 81 - Laibaibal Thiang (BSI)

¹ Kan ṭhawnnâk Pathian thangṭhat in thang ngaiin hla sa u sih; Jakob Pathian sinah lunglawm in au u sih.

² Hlasa u law sumsel kha tum u, tingtang le thanglawi kha tum u.

³ Thla thar ah muko tum u law, biapi bik kan thô thlapa lai tiangin tum u.

⁴ Israel hna caah sermi phung a si i Jakob Pathian nawlpekmi a si.

⁵ Cucu Josef hna sinah tuah awk i ruahmi a si, Ezip ram pumpuluk a ṭol lio ah khan, kan theihthiam lomi holh kan theih.

⁶ A liang i phorhmi thilrit ka ṭhial piak i thilrit an cawimi hna zong ka fim piak hna.

⁷ Nan vansan lio ah nanka auh i kan khamh hna; khuari â thuhnâk hmun in kan leh hna i Meribah ti zongah kan hniksak hna. (Selah)

⁸ Maw ka mi le hna, ngaituah u, kan chimhhrin hna lai! Maw Israel hna, ka bia nan ngaih ahcun.

⁹ Ramdang pathian cu nan lakah a um awk a si lo; ramdang pathian kha nan biak awk a si lo.

¹⁰ Keimah hi BAWIPA; nan Pathian cu ka si; Ezip ram in an hruaitu hna kha ka si; kau piin nankâ i ân u law, ka khahter lai.

¹¹ Asinain ka mi hna nih ka aw an ngai lo. Israel mi hna nih zeihmanh ah anka rel lo.

¹² An lungkhon ruangah an duhning pauh i um awkah hnulei ka chît hna.

¹³ Maw kami hna nih ka bia ngaiin, Israel hna nih ka lam hei zul hna sehlaw cu mu!

¹⁴ An ral kha chikkhat te ah ka tei piak hna lai i amah dohtu hna cungah ka kut ka zau ko lai.

¹⁵ BAWIPA a huatu hna kha a hmaiah a hleng in an i pe lai, asinain zungzal in an rawk lan lai.

¹⁶ Nannih cu changvut in kan cawm hna lai i lungpi chung i khuailiti in nan di ka riamter lai.