SALM 80 - Laibaibal Thiang (BSI)

¹ Maw Israel hna Tuukhal, tuurun bangin Josef le hna hruaitu, run kan ngai law, nang, cherub hna lak i a um i a ṭhumi run ceu tuah.

² Efraim hna le, Benjamin hna le, Manase hna lakah na ṭhawnnâk kha langhter ṭhan ko; rung law, kan khamh tuah.

³ Maw Pathian, kan tharchuah ṭhân law, na hmai ceuter, cuticun khamh in kan um lai.

⁴ Maw BAWIPA, ralkapbu Pathian, na mi hna nih na sinah thla an cam lio ah, zeicandah na thin a hun lai?

⁵ Annih cu mitthli rawl in na cawm hna, an duhchung din awk mitthli na pêk hna.

⁶ Nangnih ka kiangkap mi hna ca i elhnialnâk ah nakan siter i kan ral kha an nî i an i lawm.

⁷ Maw ralkapbu Pathian, kan tharchuah ṭhân law, na hmai cu kan cungah ceuter hrâm ko, cuticun khamh kan si lai.

⁸ Ezip ram in misur ruang na lâk i miphun kip na ṭhawl hna i na bunh.

⁹ An caah hmun na timhlamh i thûk ngaiin hram a thla, ram pumpuluk a khat dih.

¹⁰ Tlâng hna cu a thladem nih a khuh i a nge hna cu a ngan ngai ngaimi Sidar thing bantuk a si.

¹¹ A nge hna nih rili a phân i a ṭe hna nih tipi an phân.

¹² Zeiruangahdah a kulhnâk cu na ṭheh? Mi nih kal pah in a thei kha an lo lai lo maw?

¹³ Ram tang i ngal nih a hrawh i Ramsa zong nih an tlanh tawn.

¹⁴ Maw ralkapbu Pathian, kan in nawl ko, zohhmanh, hi misurruang hi run veh hrâm ko.

¹⁵ Na orhlei kut i na bunhmi misur ruang kha a si, na ca i na chiah khun mi a nge he.

¹⁶ Mei ah khangh a si i hau tiangin a tong; hmaitonh i na chimhhrinnâk tuar kho lo in an tlau cang.

¹⁷ Na orhlei kut cungah na kut i a ummi kha um sehlaw, mi fapa na ca i ṭhawnter mi cungah hin.

¹⁸ Cuticun kan in kirtâk lai lo, kan hlau law, na min kan hlam lai.

¹⁹ Maw BAWIPA ralkabu Pathian, kan tharchuah ṭhân law, na hmai cu ceuter hrâm ko, cuticun khamh kan si lai.