SALM 73 - Laibaibal Thiang (BSI)

¹ Pathian cu Israel caah a ṭha taktak, lungthin a thiangmi ca zongah a ṭha.

² Asinain kei tu cu ka tlu dengmang i kake phau hi a nal dengmang tawn.

³ Zeitintiah misuaksual hna vanṭhatnâk ka hmuh tikah, ruamkaimi hna ka hnahchuah tawn.

⁴ Zeitintiah an thih zongah an tuar theng lo, fek tein an dir kho ko.

⁵ Midang bangin buaibainâk zong an tuar theng lo, midang bangin zawtnâk rai zong nih a tlun hnawh theng hna lo.

⁶ Cucaah porhlotnâk cu a awih in an i awih, zângennâk nih hnipuan bangin a tuam hna.

⁷ Mitmu chuak hnik in an i cenh i duhbia an phaimi nâk i tamdeuh an ngei.

⁸ Lamhchihnâk kong kha diriam le nisawh buin, hngal ngaiin an chim tawn.

⁹ A bia holh nih van tiangin an ralchanh, an lei nih vulei dihlak a cul dih.

¹⁰ Cucaah ami le kha hika ah an kir ṭhân i hrai i a khatmi ti kha an din dih.

¹¹ “Zeitindah Pathian nih a hngalh lai? Cungnung bik nih a hngalh dih lai maw?” tiah an ti.

¹² Zohhmanh, himi hna hi Pathian-ṭihzahlomi an si, annih cu zeiruat loin an nung i an rum chin chin.

¹³ Zeihmanhlo ah ka lungthin ka rak thianter i ka kut thianter awkah ka rak ṭawl sawh sawh a si hi ta.

¹⁴ Zeitintiah nitlâk tein ka temtuar i zingchiar tein chimhhrin ka si.

¹⁵ “Cuticun ka chim lai” ti ning law, ngaihmanh, tuchan nafa le cungah a dik lo ngaimi ka si hnga.

¹⁶ Hngalhthiamnâk kong ka ruah tikah, cucu ka caah a faktuk mi a si.

¹⁷ Pathian hmunthiang ka luh tiangin, an donghnâk ding cu ka theihthiam cang.

¹⁸ A ngaingai tiah, annih cu a nâlmi hmunah narak chiah hna i rawhralnâk hmun ah na hlawnh hna.

¹⁹ Aize, zeitindah mitṭhep kar ah an rawh dih kun! ṭih a nung ngaimi thil nih a ei dih kun hna.

²⁰ I hlauh hnu i zanmang bantuk ceu in, cuticun Bawipa, nâ hlauh tikah, na caah zomhtaih awk muisam men an si lai.

²¹ Cubangin ka lungthin a fâk i ka ruahnâk zong a buai.

²² Hngalhnâk ngeilo mihrut ka si i na caah saram bantuk men ka si,

²³ Asinain na sinah ka um peng i ka orhlei kut in naka tlaih.

²⁴ Na remruatnâk in naka hruai lai, cuhnuah sunparnâk ah cohlan ka si lai.

²⁵ Vancung ah khin nangmah lo cu ahodah ka ngeih? Vulei zong ah hin nangmah lo cu ka duhmi dang an um ti lo.

²⁶ Ka thisa le ka lungthin hi a ba, asinain Pathian cu zungzal in ka lungthin ṭhawnnâk le covo a si.

²⁷ Zeitintiah nangmah he â hlatmi hna cu an lotlau taktak ko lai, Nangmah ṭangdang an kai taktu vialte kha na hrawh dih hna lai.

²⁸ Asinain kei ka caah cun Pathian naih hi a ṭha; Bawipa PATHIAN cu kâ bochan, cuticun na tuahmi thil vialte cu ka phuan khawh cang lai.