SALM 51 - Laibaibal Thiang (BSI)

¹ Maw Pathian, na duhdawtnâk bangin ka zângfah law, a tammi le â dawhmi na velngeihnâk thawngin ka nawlbuarnâk kha ka hnawhpiak ko hna.

² Ka sualpalhnâk hna hi thiang tein ka ṭawl piak hna law, ka sualnâk chungin ka thenh ko sawh.

³ Zeitintiah ka nawlbuarnâk kha ka hngalh hna i ka sualnâk kha ka hmai ah a um zungzal.

⁴ Nangmah ralchanh in, nangmah sin hrimhrim ah ka sual cang; na mithmuh ah Ṭhatlonâk kha ka tuah; ka kong na chimmi hi a dikmi a si, bia naka ceih hmanh ah sawi awk um lo na si.

⁵ Ngaihhmanh, sualpalh cia in hrin ka si i ka nu nih sual in a ka pawi.

⁶ Ngaihhmanh, chunglei in biatak na duh i chunglei ah hin fimnâk ka cawnpiak hrâm ko.

⁷ Hisop in ka hnawr law ka thiang lai. Ka ṭawl law hawhra bangin ka rang lai.

⁸ Na khiah ciami ruh hi â nomh ṭhân khawh nâkhnga lomhnâk le nomhnâk thawng kha ka theihter.

⁹ Ka sualnâk chungin na hmai thup law, ka sualpalhnâk vialte hi ka hnawh piak ko.

¹⁰ Maw Pathian, ka chungah lungthin thiang ser ṭhân law, keimah ah hin a fekmi thlarau kha tharchuah hrâm ko.

¹¹ Na sin in ka ṭhawl sawh hlah law, na Thiang Thlarau cu ka sin in ka lak piak sawh hlah.

¹² Na khamh-lomhnâk kha ka pe ṭhân law, nun a siangmi na Thlarau in fehter law ka tlai ko sawh.

¹³ Cuticun nawlbuartu kha na lam ka cawnpiak hna lai i misual hna nih nangmah lei an hawih ṭhân lai.

¹⁴ Maw Pathian, aka khamhtu Pathian na si, thisen chuah ruang i thiamloconâk chungin ka chuahter law, ka lei nih thang ngaiin na dinnâk kong hi hla in ka sak lai.

¹⁵ Maw BAWIPA, ka hmurkâ hi ong law, cuticun ka hmurkâ nih an thangṭhat lai.

¹⁶ Zeitintiah raithawinâk hi na duhmi a si lo, raksisehlaw kan pêk diam cang hnga; khanghthawinâk zongah nâ lawm bal lo.

¹⁷ Pathian duhning raithawinâk cu thlarau kehkuai hi a si, lungthin kekkuai i chirnâk hi Maw Pathian, zeirel loin na um lai lo.

¹⁸ Na duh ningin Zion cungah thilṭha tuah law, Jerusalem vanpang hna cu dirh ṭhân.

¹⁹ Cuticun dinnâk raithawinâk le, khanghthawinâk le pum khanghthawinâk ah nâ lawm lai i na biakṭheng cungah cawtum kha an pêkchanh cang lai.