SALM 37 - Laibaibal Thiang (BSI)

¹ Ṭhatlonâk tuahtu hna ruangah na ngaih i chiatter duh hlah, sualpalhnâk tuahtu hna zong va hngar hna hlah.

² Zeitintiah ramhring bangin tuanah ah an si lai i hnahhring bangin an uai lai.

³ BAWIPA i bochan law, ṭhatnâk tuah; ram chungah um law, zumhtlâk a sinâk nih an cawm lai.

⁴ BAWIPA ah i lawm law, na lung thlitum kha an pêk lai.

⁵ Na lam cu BAWIPA chân, amah i bochan law amah nih a tuah dih lai.

⁶ Na dinnâk cu ceunâk bangin a chuahter lai i na diknâk zong chunceu bantuk a siter lai.

⁷ BAWIPA ah i din law, Amah cu lungsau in hngak ko; an zulhmi lam i a neinung ngaimi hna ruangah le suahsualnâk ruahbu in a tluang ngaimi hna ruang zongah na ngaih i chiatter hlah.

⁸ Thinhunnâk hi ngol law, thinhânnâk hi kaltâk; ngaihchia in um hlah, cu nih cun fahnâk lawng a chuahpi.

⁹ Ṭhatlonâk a tuahtu hna cu hrawh dih an si lai, asinain BAWIPA hngaktu hna nih vawlei hi ro ah an co lai.

¹⁰ Zeitintiah misuaksual cu cân tawite ah a um ti lai lo; asi, a umnâk hmunah ṭha tein va kawl, a um ti lai lo.

¹¹ Asinain lungnêmmi nih lei hi ro ah an co lai i duh a dimmi daihnâk chungah an i lawm lai.

¹² Misuaksual nih midik a ngiar i a hacang a rialhnawh tawn.

¹³ Bawipa nih amah cu a nihsawh ve lai, zeitintiah a ni arak phanh lai kha a hmuh.

¹⁴ Misuaksual nih vainam an zuh i an likuk kha mi sifak le chambaumi hna tlukter ding le dik ngaiin a nungmi hna thahnâk ah an i kuaih cia.

¹⁵ An vainam kha anmah lungah a lut lai i an likuk cu khiah a si lai.

¹⁶ Misuaksual rumnâk cha cun midingmi tlawmte ngeih a ṭha deuh.

¹⁷ Misuaksual bân kha khiah a si lai i miding cu BAWIPA nih a tunmer.

¹⁸ BAWIPA nih midik hna ni cân a hngalhpiak i an co hngami ro cu zungzal a nguhmi a si.

¹⁹ Cân ṭha lo zongah an mualpho lai lo, pâm kum zongah an paw a khim lai.

²⁰ Asinain misuaksual cu an lo tlau lai, BAWIPA ral hna cu ramhring sunparnâk bangin an lo dih lai i meikhu ah lolak in an zâm dih lai.

²¹ Misuaksual nih a cawi i a cham ti lo; asinain miding nih cun a zângfah i a pêk.

²² Zeitintiah thluachuah a pêkmi hna nih vawlei ro an co lai, asinain chiat a serhmi hna cu tan in an um lai.

²³ Miṭha kephau nâkding cu BAWIPA nih a ruahpiak hna i a lam ah â lawm.

²⁴ Atluk hmanh ah, a ril lan lai lo, zeitintiah BAWIPA nih a kut in a tlaih.

²⁵ Mino ka rak si cang i atu cu ka tar cang, miding kaltâk a si ka hmu bal lo i a tefa hna kutdawh zong ka hmu bal lo.

²⁶ Mi a zângfah zungzal i a coih hna, cun a tefa kha thluahchuah an si.

²⁷ Sualnâk kaltâkin ṭhatnâk tuah law hi ramah umpeng ko.

²⁸ Zeitintiah BAWIPA nih diknâk a dawt, a mithiang hna a kaltâk bal hna lo, himter an si zungzal; asinain misuaksual fale cu hlawnh dih an si lai.

²⁹ Miding nih ram hi ro ah an co lai i a chungah an um zungzal lai.

³⁰ Miding hmurkâ nih fimnâk a chim i a lei nih diknâk a phuan.

³¹ A Pathian nawlbia cu a lungthin ah a um i a kephau zong a nal lai lo.

³² Misuaksual nih miding a bawh i thah dingah a kawl tawn.

³³ An kutah BAWIPA nih a chia lai lo, biacaih a si zongah thiamlo a coter lai lo.

³⁴ BAWIPA kha hngak, a lam kha zul law hi ram co dingin an cawisan lai; misuaksual hna hrawh dih an si kha na hmuh hna lai.

³⁵ Misual cu ṭhawnnâk nganpi a ngeih i cinmi thingkung bangin a ṭhan luaimai kha ka hmuh cang,

³⁶ Asinain a thi i zohhmanh, amah cu a um ti lo, asi, ka kawl len nain hmuhawk a um ti lo.

³⁷ Sawiawk um lomi i chinchiah law, midik ngia hna; zeitintiah cu hna co ding cu daihnâk a si.

³⁸ Asinain nawlbuartu hna cu hmunkhat ah hrawh an si lai i misuaksual hna co ding zong lohtlaunâk a si.

³⁹ Asinain miding hna khamhnâk cu BAWIPA sinin a si; Amah cu harnâk cân ah an ṭhawnnâk a si.

⁴⁰ BAWIPA nih a bomh hna lai i a khamh hna lai; amah an i bochan caah misuaksual hna sinin a chuah hna i a khamh tawn hna.