SALM 25 - Laibaibal Thiang (BSI)

¹ Maw BAWIPA, ka nunnâk nih nangmah lei a zoh.

² Maw ka Pathian, nangmah cu kan bochan; ningzak in ka umter hlah; ka ral hna hi ka cungah teinâk ngei hna hlah seh.

³ Nangmah hngaktu pauh cu ning zakin um hrimhrim hlah seh; a chan um loin hlenthawi a hmangmi hna cu ningzak in um hna seh.

⁴ Maw BAWIPA, na lam kha ka hmuhsak law na lamthluan kha ka cawnpiak.

⁵ Na biatak ah ka hruai law ka cawnpiak, zeitintiah nangmah cu ka khamhnâk Pathian na si; nitlâk tein nangmah kha kan hngah.

⁶ Maw BAWIPA, na duhdawtnâk le duh a nungmi na vêl kha philh hna hlah, zeitintiah hlanlio pi khan an rak um cang.

⁷ Ka nolio sualnâk hna le ka nawlbuarnâk hna kha ka theihpiak sawh hlah, zeitintiah na vêl le ṭhatnâk thawngin maw BAWIPA, ka philh sawh hlah.

⁸ BAWIPA cu a ṭha i a dik; cucaah misual kha lam a cawnpiak tawn hna.

⁹ Toidormi cu dinnâk in a hruai i toidormi cu a lam kha a cawnpiak tawn.

¹⁰ A biakam le hngalhternâk a zulmi hna caah BAWIPA lamthluan vialte hi vêl le biatak an si.

¹¹ Zeitintiah maw BAWIPA, na min ruangah ka sualpalhnâk ka ngaithiam, zeitintiah a ngan tuk hring hran.

¹² BAWIPA a ṭhzahtu minung cu ahodah a si? cubantuk minung cu a thimmi lam zulh kha a cawnpiak lai.

¹³ Neinung ngai in khua a sa lai i a tefa hna nih vulei ro an co lai.

¹⁴ BAWIPA biathli cu amah ṭihzahtu sinah a um i a biakam cu a hmuhsak hna lai.

¹⁵ Ka mit nih BAWIPA lei a zoh zungzal, zeitintiah amah nih sur ah a tângmi kake kha a lâk lai.

¹⁶ Keimah lei ah i mer law ka zângfah ko, zeitintiah harnâk tuar le umhar in ka um.

¹⁷ Ka lungchung buainâk a ngan chinchin i ka vansannâk chung hin ka hruai hrâm ko.

¹⁸ Ka temtuarnâk le ka nganfahning hi ka zoh law, ka sualnâk vialte hi ka ngaithiam.

¹⁹ Ka ral hna hi ruat tuah, an tam tuk i huat tak tein anka huat.

²⁰ Ka nunnâk kilveng law, ka khamh, ningzak in ka umter sawh hlah, zeitintiah nangmah kha kan bochan.

²¹ Zumhtlâk sinâk le diknâk nih ka kilveng ko seh, zeitintiah nangmah kha kan hngah.

²² Maw Pathian, Israel hi an buainâk vialte chungin tlanh hna!