SALM 19 - Laibaibal Thiang (BSI)

¹ Van hna nih khin Pathian sunparnâk an langhter, a kau ngaimi vanrâng nih khin akut chuak a langhter.

² Chun nih chun sinah bia a chim i zan nih zan sinah hngalhnâk a langhter.

³ Bia le biachim a um lo, an awthawng cu theih awk a um lo.

⁴ An tahnâk hri nih vawlei a vel dih i an bia cu vawlei dongh tiangin a thang. Anmah ah nî caah puanthlâm a chiahpiak.

⁵ Cu nika cu mo ngeitu ding a inkhân chungin arak chuakmi bantuk le tlikzuamnâk i miṭhawng lunglawm in a tli hngami bantuk a si.

⁶ A chuahnâk cu vanhramdeng in a si i â hel donghnâk cu khatte lei donghnâk kha a si, cun a linhnâk chungin thuhmi zeihmanh a um lo.

⁷ BAWIPA nawlbia cu a tling i nunnâk a tharchuah tawn; BAWIPA hngalhnâk cu a fiang i mi sawhsawh kha a fimter.

⁸ BAWIPA phungbia hna cu a dik i lungthin a lawmhter; BAWIPA nawlpêk cu a thiang i mit khua a hmuhter.

⁹ BAWIPA ṭihnâk cu a thiang i zungzal in a hmun; BAWIPA biaceihnâk cu a dik i a dihlak in a ding.

¹⁰ Sui nâkin duh deuh awk a si. Asi, sui thiangmi nakin; khuaihlitti le khuaithlar nâk hmanh in a thlum deuh.

¹¹ Cuhleiah cu hna hmangin na sal hi ralrin pêk a si i cu bia hna zulhnâk ah laksawng nganpi a um.

¹² Ahodah mah palhnâk a hngal kho? Â thupmi palhnâk chungin ka thianter.

¹³ Na sal hi hrâmhrâm i sualnâk tuah lo dingin ka tlai law, cu hna cu ka cungah nawl ngeihter sawh hlah. Cuticun do ka tla lai i nawlbuarnâk nganpi chungin ka thiang kho lai.

¹⁴ Maw BAWIPA, ka ṭhawnnâk le ka tlanhtu, ka kâ chung bia le ka lungthin chung ruahnâk hna hi na mithmuh ah cohlân awktlâk si ko hna seh.