SALM 139 - Laibaibal Thiang (BSI)

¹ Maw BAWIPA, naka purh cikcek i naka hngalh.

² Ka ṭhut le ka dir zong na hngalh; lam hlatpi khin ka ruahnâk hi na hngalh.

³ Ka kal le ka ih zong na hngalh, ka sining vialte hi na hngalh dih.

⁴ Zeitintiah ka lei ah hin bia pakhat hmanh a um lo, zohhmanh, maw BAWIPA, cu zong cu a dihumnâk in na hngalh.

⁵ Nangmah nih ka hnu le ka hmai in naka kulh i ka cungah nakut na chuan.

⁶ Cutluk in hngalhnâk cu ka caah khuaruahhar tuk a si, a sang tuk i ka phân kho lo.

⁷ Na Thlarau sinin khuazeiahdah ka kal khawh lai? Asiloah nahmai in khawzeiahdah ka zâm khawh lai?

⁸ Vanah kai ninglaw, cuka ah na um; hell chungah ihnâk vung ser ninglaw, zohhmanh, cuka ah na um.

⁹ Zingthla zar in rili a donghnâk tiangah va um hmanhning law,

¹⁰ Cuka zongah na kut in naka hruai lai i na orhlei kut in naka tlaih ko lai.

¹¹ “Muihnâk nih ka khuh sehlaw, ka vêlchûm ceunâk hi mui dih seh,” ti hmanhning law,

¹² Muihnâk zongnih na sinin zeihmanh a phen kho lo, zan hi chun bangin a ceu i nang na caah cun mui le ceu hi a dang hlei lo.

¹³ Zeitintiah ka chunglei hna hi na sermi an si, ka nu nau-in chungah naka pehtonh,

¹⁴ Nasin ah lomhnâk bia ka chim lai, zeitintiah ṭihnung ngai le khuaruahhar ngai i sermi ka si. Na rianṭuanmi hi a mak tuk ê; cucu ka nunnâk nih ṭha tein a hngalh.

¹⁵ A thli tein ser ka si lio ah khan, vulei tanglei i thiam ngai i ser siammi ka si lio ah khan, ka ruangam cu na sinin thuh an si lo.

¹⁶ Ningcang ngeimi ka si hlan hmanhah, na mit in na rak hmuh cang. Na cauk chungah ṭial dih an si, nikhat hnu ni khat ser ka si lio i thil dang zeihmanh a um hlan ah khan.

¹⁷ Maw Pathian, na khuaruahnâk hna cu ka caah ava sunglawi dah; â fundih tikah ava sunglawi dah.

¹⁸ Rel i tim ning law, these nâkin an tam i ka hun i hlauh tikah, na pawngah ka rak um tawn.

¹⁹ Maw Pathian, misuaksual cu na thah hna lai, cucaah nannih thisen chuah a hmangmi hna ka kal tak u.

²⁰ Zeicahtiah suaksual ngaiin nangmah ralchanhnâk an chim i na ral hna nih na min hi pakpalawng ah an canter.

²¹ Maw BAWIPA, nangmah huatu kha ka hua ve hna lo maw? Nangmah ralchanhtu kha ka hua taktak hna lo maw?

²² Annih cu huattak tein ka huat hna i ral zoh in ka zoh hna.

²³ Maw Pathian, ka pur cikcek law, ka lungthin hi hngal ko. Ka hniksak law, ka ruahbikmi hi hngal.

²⁴ Cun keimah ah hin suahsualnâk lam a um maw umlo zoh law, zungzal a hmunmi lam ah ka hruai.