SALM 132 - Laibaibal Thiang (BSI)

¹ BAWIPA, David kha philh hlah, a temtuarmi vialte zong kha philh hna hlah.

² BAWIPA sinah chiat â serhmi le, Jakob Miṭhawng sinah bia â kammi kha philh hlah.

³ “Ka inn chungah ka lut lai lo i a nuammi ka ihkhun cung zongah ka kai fawn lai lo.

⁴ Ka mit hi ka dinhter lai lo, kâ hngilh fawn lai lo.

⁵ BAWIPA le Jakob a ṭhawngmi Pathian caah, umnâk hmun ka hmuh hlan pauh cu.”

⁶ Ngaihmanh, Ephratha ah a thawng kan theih i ram tang i thingkung lakah kan hmuh.

⁷ A puan innah kal u sih law, ake hram in bia u sih.

⁸ Maw, BAWIPA nâ dinhnâk hmun ah tho law, nangmah le na ṭhawnnâk kuang he khan.

⁹ Na tlângbawi hna dinnâk in i thuam hna sehlaw, na mithiang hna lunglawm in au hna seh.

¹⁰ Zeitintiah na sal David thawngin, Sathau na thuhmi hmai cu kirter sawh hlah.

¹¹ BAWIPA nih David sinah biatak tein chiat â serh cang i â let ṭhân ti lai lo. “Na chungchuak kha na bawiṭhutdan ah ka ṭhutter lai.

¹² Na fale nih ka biakam mi an zulh i ka cawnpiak laimi ka hngalhternâk an zulh ahcun, an fale hna zong zungzal in na bawiṭhutdan ah an ṭhu lai,” tiah a kamh.

¹³ Zeitintiah BAWIPA nih Zion cu amah umnâk ah a duh caah a thim.

¹⁴ “Hihi kâ dinh zungzalnâk ding a si; hika hi ka duhmi a si caah ka um peng lai.

¹⁵ A herhmi tling tein thlua ka chuah lai i a sifak hna cu changreu in ka cawm hna lai.

¹⁶ A tlângbawi hna khamhnâk in ka thuamh hna lai i a mithiang hna lunglawm in an au lai.

¹⁷ Cuka ah David ki cu ka corhter lai, sathau ka thuhmi caah meiin ka timhpiak lai.

¹⁸ A ral kha ningzahnâk ka aihter hna lai, asinain amah cungah a bawiluchin cu dawhter a si lai.