SALM 105 - Laibaibal Thiang (BSI)

¹ Aw, BAWIPA cu lomhnâk bia chim u! A min in au u law, mikip sinah a tuahmi thil hna cu hngalhter u!

² Amah thangṭhat in hla sa u law, amah hlawrh in hla sa u! A tuahmi khuaruahhar thil vialte hna hi bia in chim u.

³ A minthiang cu upat u law, BAWIPA kawltu hna lungthin cu i nuam seh!

⁴ BAWIPA le a ṭhawnnâk cu kawl u law, a hmai cu kawl lengmang ko u.

⁵ Khuaruahhar thil a tuahmi hna cu i cinken u law, a tuahmi khuaruahhar thil le a hmurkâ chuak biaceihnâk hna he.

⁶ Aw, a sal Abraham tefa hna, nannih Jakob tefa hna, a thimmi nan si kha!

⁷ Amah cu BAWIPA kan Pathian cu a si i a biaceihnâk nih leipum pi a cul dih.

⁸ A biakam cu â cinken i chan 1000 tiang zongin a nawlpêk kha â cinken.

⁹ Abraham sin i a biakam le Isak sin i chiat â serhmi kha.

¹⁰ Cuhna cu Jakob fale caah a fekmi phungah a ser i Israel caah zungzal biakam a si.

¹¹ “Kanaan ram hi, na ro caah kan pêk lai,” tiin bia a kamh.

¹² Mi tlawmte lawng an si lioah, asi, an tlawm lei ah, khual an si.

¹³ Miphun khat hnu phunkhat sinah an kal i pennâk pakhat in mi dangdang sinah an kal.

¹⁴ Ahohmanh serhsat a siang hna lo, asi, anmah thlavâng a hauh nâkah siangpahrang zong a sîk hna.

¹⁵ “Sathau ka thuhmi hna hi tawng hna hlah u, ka profet hna zong tawng hna hlah u,” tiah a ti.

¹⁶ Curamah pâm a tlunter i an facang le thlai vialte a hrawhpiak dih hna.

¹⁷ An hmai ah mi a thlah i Josef cu sal caah zuar a si.

¹⁸ Ake ah hreng an khenh i thir cikcin in an hren.

¹⁹ Arak chim chungmi bia a tlin hlan cu, BAWIPA nih amah cu a hniksak.

²⁰ Cuticun siangpahrang nih mi a thlah i a chuahter, mikip cung i uktu si awkah a luatter.

²¹ A chungkhar cungah hotu-ah a canter i a ngeihmi vialte uktu ah a canter.

²² A milianngan hna kha a duhning pauh i umter awkah le, a upa hna kha fimnâk cawnpiaktu dingah.

²³ Israel zong cu Ezip ramah a ra i Jakob zong Ham ramah a um.

²⁴ Ami le kha tampi in a karhter hna, anmah ralchanhtu hna nâk ṭhawng deuh ah a canter hna.

²⁵ A sal hna cungah depde ngai in tluangkhawng dingah an lungthin kha ami le a huatter hna.

²⁶ A sal Moses kha a thimmi Âron he a thlah hna,

²⁷ A hmelchunhnâk kha a mi le hna sinah a langhter, Ham ramah thilmak a hmuhter hna.

²⁸ Cuticun muihnâk a umter hmasa i a mui dih, cuticun a bia cu an al kho lo.

²⁹ An ti kha thisen ah a canter i an nga vialte an thi dih.

³⁰ An ram cu utlak in a khat dih i an siangpahrang in dalchung zongah a khat dih.

³¹ Bia a chim i fikfa an chuak ciamman i hrik zong an ram vialte ah an chuak.

³² Ruah ai ah rial a pêk hna, an ramah meialh zong a chuahter.

³³ An misurruang le theipi kung hna a hrawh dih i an ram i thingkung hna zong a kiahter dih.

³⁴ Bia a hun chim ṭhân i khaubawk an puang ṭhân, relcawk lo khaubawk kha an hung chuak.

³⁵ Cuhna nih cun an ram i thlai vialte an ei dih, an thlai vialte kha a dih umnâk in an ei dih.

³⁶ An rampumpi fater vialte an hmuh hmasat bik kha a thah dih hna.

³⁷ Cu hleiah sui le ngun he a chuahter hna i a mi hna lakah bomh herh tiangin miderthawm zong an um lo.

³⁸ An chuah lioah Ezip mi kha an i lawm, zeitintiah anmah ṭihnâk nih a tlaih hna.

³⁹ Anmah phêntu dingah amah nih khuadawm a zâmter i zan mui ceuter awkah ceunâk a pêk hna.

⁴⁰ Mizapi nih an hal i mimte a pêk hna, vanlei rawl in an paw a khimter hna.

⁴¹ Lungpi kha a on i ti a hung chuak thluahmah; ramcar ah tiva bangin a luang.

⁴² A sal Abraham sin i a thiangmi a biakam kha a hngalh zungzal.

⁴³ Cuticun a thimmi ami kha lunglawm thanuam tein a hruai hna.

⁴⁴ Cuticun Gentel mi hna ram kha apêk hna i miphun dang ṭuan cia kha a coter hna.

⁴⁵ A nawl pêkmi an zulh i a nawlbia an zulh khawh nâkhnga, BAWIPA cu thangṭhat u.