SALM 104 - Laibaibal Thiang (BSI)

¹ Maw ka nunnâk, BAWIPA cu thangṭhat! Maw BAWIPA ka Pathian nangmah cu na lianngan hringhran ko: Sunparnâk le upatnâk i thuamhmi na si.

² Hnipuan bangin na ceunâk nih nangmah an khuh, van hna khi puan bangin na samh.

³ Amah nih ti cungah a inn cungdot saknâk kân a kham i khuadawm hna khi lêngah a canter, thli thla hna cu kalnâk ah a hman,

⁴ A vanmi hna cu thlarau ah a canter hna i a rianṭuantu hna cu meialh ah a canter tawn hna.

⁵ Nangmah cu vulei hram zungzal i hninlo dingin a bunhtu na si.

⁶ Nangmah nih vawlei hi tithuk ngaimi in puan bangin na tuam i ti kha tlâng cungah an dir.

⁷ Na sîk tikah ti cu a zâm i na khuari thawngah an reu dih.

⁸ Tlâng cungah an kai i hawrkuang ah an zuang, an umnâk hmun cu na ruah piakmi a si.

⁹ Vawlei khuh dih dingah a rak kir ti nâkhnga lo, a lonh khawh lo ding ramri na kham piak.

¹⁰ Amah nih hawr chung i luang dingin ti kha a ser i tlang cungin an rung luang tawn.

¹¹ Saram vialte caah din awk an pêk i ram lak lâ zong nih an tihal an riamhter tawn.

¹² A pawngah vanva hna nih bu an ser i thingnge ah an awn tawn.

¹³ Amah nih tlangcung hna khi a in dot cungin ruah tiin a cawm hna i na rianṭuannâk theipar nih lei hi duhdim tein a cawm hna.

¹⁴ Saṭil caah ram a khohter i minung caah thlai a khohter, cuticun vulei nih eiawk a chuahter.

¹⁵ Minung lungthin nuamhtertu misur le, a mui ceutertu chiti hna le minung ca i ṭhawnnâk sertu rawl he.

¹⁶ BAWIPA thing hna cu thlinghnai in a khat i Lebanon tlâng i Sidar thing a bunhmi hna khi.

¹⁷ Cuka ah va hna nih bu an ser tawn; Farthing hna cu vaca hna umnâk in a si.

¹⁸ Lungpang hna cu Sathar caah a si i Saveh hna cu lungpi phen ah an i thup tawn.

¹⁹ Amah nih thlapa khi nithla relnâk ah a ser i ni nih tlâk cân a hngalh.

²⁰ Nangmah nih muihnâk na ser i cucu zan a si, ramtang i saram vialte caah vahchuahnâk cân a si.

²¹ Chiandeih tumno hna nih sehawk an kawl i Pathian sinin rawl an kawl tawn.

²² Ni a chuak i an i fuh cio hnu ah, an kua ah an bawk tawn.

²³ Minung cu rianṭuan awkah a chuak i zanlei tiangin a ṭuan tawn.

²⁴ Maw BAWIPA, na tuahmi thil hna cu a va tam dah! Fimnâk i na tuahmi lawng te an si. Lei hi na rumnâk in a khat dih.

²⁵ Hi rilipi a kau ngaimi ah hin, nunnâk ngeimi an i chawk len ko. A ngan he a hme he.

²⁶ Cuka ah tilawng a nganmi an kal i cuka ah Leviathan zong a um; cuka i lente celhawk ah na ser bantukin.

²⁷ Cuticun an dihlak in nangmah an in hngalh i an cân cio ah rawl na pek khawh hna nâkhnga.

²⁸ Na pekmi pauh an i lak i na kut na samh ahcun thilṭha in an i cawm tawn.

²⁹ Na hmai na thuh ahcun an van a sâng tawn i an thaw na lakpiak ahcun an thi i leidip ah an kir ṭhân.

³⁰ Na Thlarau na thlah i umter an si; vulei muisam zong na tharchuah tawn.

³¹ BAWIPA sunparnâk cu zungzal in hmun seh; BAWIPA cu a ṭuanmi ah i lawm seh.

³² Lei a hun zoh i a ther; tlâng hna cu a tongh i a khu an chuak.

³³ Ka nunchung vialte BAWIPA ka thangṭhat lai i ka nunchung vialte ka Pathian thangṭhat in hla ka sa lai.

³⁴ Ka khuaruahnâk hi a caah thlum seh, cuticun BAWIPA ah kâ lawm lai.

³⁵ Misual hna cu lei in hrawhdih si hna seh, um ti hna hlah seh. Maw ka nunnâk BAWIPA cu thangṭhat! BAWIPA cu thangṭhat u!