SALM 102 - Laibaibal Thiang (BSI)

¹ Maw BAWIPA, ka thlacamnâk ka ngaihpiak law, ka ṭahnâk hi na sinah phân seh.

² Ka vansan lioah ka sinin na hmai thup sawh hlah; keimah lei ah na hnâ chi law, kan auh tikah khul rangin ka let.

³ Zeitintiah ka nun chung cân hna hi meikhu bangin an lo dih i ka ruh hna hi meiphu bangin a kâng.

⁴ Ka lungthin hi a uaimi ramhring bangin hliamhma a tuar i rawl ei tiangin ka philh tawn.

⁵ Ka hrum-ainâk ruangah, ka ruh le ka vun tiang â sêng dih.

⁶ Ramcar vate bantuk ka si i ṭiotâkmi khua i chimbu bantuk ka si.

⁷ Ka it i ka mit â chin thiam lo, inn cung zimah amah lawng i a ṭhumi pithlung bantuk ka si.

⁸ Ka ral hna nih nitlâk tein anka congoih, aka diriamtu hna nih chiat i serh tiangin chiat anka serh.

⁹ Zeitintiah vutcam hi rawl ah kâ rinh i ka dinawk ti ah ka mitthli â cawh tawn.

¹⁰ Lung tling lo tuk i na thin a hun tuk ruangah, naka cawi i naka hlawnh.

¹¹ Ka nunchung ni hna hi sautermi thladêm bantuk a si i ramhring bangin ka uai.

¹² Maw BAWIPA, nang cu zungzal in na hmun, na min philhlonâk cu chan vialte a nguh.

¹³ Na tho lai i Zion cu vêl na ngeih lai, zeitintiah amah cu zângfah cân a si, asi, khiahmi cân cu a phân.

¹⁴ Zeitintiah cuka i lung rualmi ah na sak kha an i lawm i a vutcam tiang nih an lung a lênter hna.

¹⁵ Cuticun mi phunkip nih BAWIPA min cu an ṭih lai, vulei cung i siangpahrang vialte zongnih na sunparnâk cu an ṭihzah lai.

¹⁶ Zeitintiah BAWIPA nih Zion kha a dirh ṭhân lai, a sunparnâk in â thuam lai i a lang ṭhân lai.

¹⁷ Chambaumi hna thlacamnâk cu a ngaihpiak hna i an nawlnâk cu zeirel loin a um lo.

¹⁸ Cucu ara laimi chanthar caah ṭial a si lai i a dirh hngami miphun hna nih BAWIPA cu an thangṭhat lai.

¹⁹ Zeitintiah a sangmi a hmunthiang in a run zoh hna i BAWIPA nih van in vulei hi a cuanh peng ko.

²⁰ Thong a tlami hna ainâk thawng ngai ding le, thi dingah ruahmi hna luatter dingah,

²¹ Zion in, BAWIPA min phuang ding le, Jerusalem in amah thangṭhat dingah,

²² BAWIPA rian ṭuan dingin mikip le ramkip mi kha hmunkhat ah a pumh tikah.

²³ Lam thluan in ka ṭhawnnâk a zawrter i ka ni hna a tawiter.

²⁴ “Maw, ka Pathian ka chan laifang ah ka la sawh hlah” ka ti tawn, nang nakum cu chan vialte caah a si.

²⁵ Hlan lio piin vawlei hram na rak bunh cang i van hna khi na kut chuak an si.

²⁶ Cu hna cu an lo tlau lai i nang cu zungzal in na hmun lai; asi cu hna cu hnipuan bangin anhlun lai; puan bangin na thlen hna lai i thlen an si dih lai.

²⁷ Asinain nang cu na hmun i na kum zong an dongh lai lo.

²⁸ Na sal le an fale hna zong an um peng lai i an techin fapar kha na hmaiah fekfuan ngaiin an um lai.