SALM 101 - Laibaibal Thiang (BSI)

¹ Velngeihnâk le diknâk cu hla in ka sak lai, Maw BAWIPA, na sinah thangṭhatnâk hla ka sa lai.

² Tlâm a tlingmi lamah fim ngaiin ka nung lai, aw zeitikahdah ka sinah na rat lai? Ka inn chungah a tlingmi lungthin he ka um lai.

³ Ka mit hmuh ah suahsualnâk zeihmanh ka chia lai lo; a tlumi hna tuahsernâk kha ka huat hna i ka sinah a um hrim hrim lai lo.

⁴ A ngawimi lungput nih aka kaltâk lai, suahsualnâk cu ka hngal lai lo.

⁵ A thli in a innpa a congoihtu cu, ka hrawh hna lai; a mit a sângmi hna le ruamkaimi kha ka hmunhter hna lai lo.

⁶ Hi ram i zumhawk a tlâkmi cungah ka mit â fu lai, ka sinah an um khawh nâkhnga; Tlam a tlingmi lam a zultu nih ka rian a ṭuan lai.

⁷ Hlen a hmangmi cu ka inn chungah an um lai lo; lihchim a hmangmi hna cu ka mithmuh ah an um peng lai lo.

⁸ Ram chung miṭhalo hna cu tuanah ka hrawh hna lai, BAWIPA khualipi chungin Ṭhatlonâk tuahtu vialte kha ka hrawh khawh hna nâkhnga.