ROM 9 - Laibaibal Thiang (BSI)

¹ Krih ah biatak ka chim i ka lih lo, Thiang Thlarau ah ka chiaṭha hngalhnâk zong nih a ka hngalhpi,

² ka lungthin ah hin ngaihchiatnâk nganpi le a dong thiam lomi fahnâk ka ngei.

³ Zeitintiah thisa lei i ka unau, ka miphun hna caah chiatserhnâk hmanh in i Krih he i ṭhen tiang hmanh ka duh.

⁴ Israel mi an si, fa sinâk, sunparnâk, biakam, nawlbia, Pathian rian le bia kamhmi hna an ta a si,

⁵ hringtu hna kha an ta a si rih, thisa leiin ti ah Krih cu an chung i a chuakmi a si, Amah cu thil vialte cung i ummi, zungzal in thangṭhat awktlâk Pathian a si. Amen.

⁶ Asinain Pathian bia cu zeihmanhloah â cang lo. Zeitintiah Israel mi hna hi Israel mi taktak an si dih theng lo.

⁷ Abraham fa le an si ruangah an dihlak in fa an si dih hlei lo, “Isaak ah hin na fale tiah ti an si lai,” tiah ti a si.

⁸ Pumsa i hrinsornâk i hrinmi kha Pathian fa an si hlei lo, bia kamhmi fa le tu kha, phuntungtu i relchihmi cu an si.

⁹ Zeitintiah bia kamhmi cu hihi a si, “Atu cân ah hin ka ra ṭhân lai i Sarah nih fapa a hrin lai,” timi hi.

¹⁰ Culawng cu a si lo, Rebekah zong nih mi pakhat, kan pu Isaak sinin fa a pawi lioah,

¹¹ ( ngakchia hna an chuah hlan i sualnâk le ṭhatnâk zong an tuahkhawh hlan ah khan, tuahsernâk ruangah si loin, A kotu hna thawngin, Pathian timhmi zoh chihin thimmi an sining a feh khawh nâkhnga)

¹² a sinah hitihin a chim, “A upa deuh nih a nau a rianh lai,” tiin.

¹³ “Jacob ka dawt i Esau ka huat” tiah ṭialmi bangin.

¹⁴ Zeidah kan chim kun lai? Pathian ah dinlonâk a um maw? Um naisai hlah!

¹⁵ Zeitintiah Moses sinah, “Zângfah ka duhmi pauh ka zângfah lai i vêlngeih ka duhmi pauh vêl ka ngeih lai,” tiah a chim.

¹⁶ Cuticun a duhtu le a panhtu ruangah a si lo i a zângfahtu Pathian thawngin a si deuh.

¹⁷ Zeitintiah Cathiang nih Faraw sinah, “Vawlei vialte ah ka min hi phuan a si khawh nâkhnga le ka thiltikhawh zia kan hmuhsak khawh nâkhnga ca i kan dirtermi na si,” tiah a rak ti.

¹⁸ Cucaah Pathian nih a duhmi pauh a zângfah i a duhmi pauh an lung a khawnter tawn.

¹⁹ Nang nih ka sinah, “Zeitindah naka mawhchiat khawh rih? Ahonihdah a duhmi a ralchanh khawh lai?” na ti khawh kun.

²⁰ Asinain, maw minung, Pathian ralchanh i lettu cu ahodah na si? Sermi nih a sertu sinah, “Zeiruangahdah hitihin naka ser a ti lai maw?

²¹ Bêllei tlangkhat chungin ûm ṭha deuh le a dang ṭhalo deuh ser dingin ûmsertu nih nawl a ngei lo maw?

²² Pathian nih a thinhunnâk a langhter nâkah le, a thiltikhawhnâk a langhter khawh nâkhnga hrawh awk i a rak timhlamhmi thinhunnâk ûm hna cu lung sau ngaiin a hngah hna,

²³ A sunparnâk lianhngan ning a langhter khawh nâkhnga zângfahnâk ûm hna cu sunglawi ngai i um dingin a rak timhlamh cia hna,

²⁴ kannih zong hi a kawhmi kan si, Judah mi lawng si loin Gentel mi zong an si ve lo maw?

²⁵ Hosea cauk ah, “Ka mi si lomi cu, ka mi ka ti hna lai, dawt lomi cu dawtmi ka ti lai.

²⁶ Hitihin a si lai. Ka mi le nan si lo, ka tinâk hmun ah khan Pathian nung fale hna, ti an si lai.” tiah ṭialmi bang khan.

²⁷ Isaiah zong nih Israel mi hna kongah hitihin a rak au pi. “Israel mi hna cu rili kam i these zat in tam hmanh hna sehlaw, a tângmi mi tlawmte lawng khamh an si lai.

²⁸ Zeitintiah rian cu a lîm lai i dinnâk in a tawiter lai, Zeicatiah Bawipa nih leicung ah hin rian cu a lîm zau lai,”

²⁹ Isaiah ṭhiamṭhiam nih hitihin a rak chim cang: “Mizapi hna Bawipa nih ci rak kan chiahpiak hlah sehlaw, Sodom khua bang kan si diam cang lai i Gomora khuami bang kan si diam cang lai.”

³⁰ Zeidah kan chim kun lai? Gentel mi, dinnâk a dawi lomi hna nih zumhnâk thawngin dinnâk kha an phâk cang,

³¹ asinain Israel mi dinnâk nawlbia a dawi lengmangmi hna nih nawlbia i dinnâk kha an phân kho lo.

³² Zeiruangah? Zumhnâk in an kawl lo i nawlbia tuahsernâk in an kawl caah a si. Tluknâk lungpi ah an tlu.

³³ Hitihin ṭial a si, “Zohhmanh, Zion ah tluknâk le rilhnâk lungpi ka chiah, amah zummi pauh cu an mualpho lai lo.”