ROM 8 - Laibaibal Thiang (BSI)

¹ Cucaah atu cu Krih Jesuh ah a um i thisa duhnâk zul loin, Thlarau duhnâk a zulmi hna caah cun thiamlocoternâk zeihmanh a um ti lo.

² Zeitintiah Krih Jesuh nunnâk Thlarau nawlbia nih sual le thihnâk nawlbia chungin a ka chuahter cang.

³ Zeitintiah thisa zângder ruangah nawlbia nih a tuah khawh lomi kha, Pathian nih a Fapa kha sual thisa bantukin, sual ruangah a run thlah i thisa ah a ummi sualnâk cu thiam lo a coter,

⁴ thisa duhnâk ah nung ti loin, Thlarau duhnâk ah kan nun i nawlbia nih tuahter a timhmi dinfelnâk kha kanmah ah a tlin khawh nâkhnga caah a si.

⁵ Zeitintiah thisa duhnâk i a nungmi hna nih thisa duhnâk lawng an ruah i Thlarau duhnâk i a nungmi nih Thlarau duhnâk kha an ruah tawn.

⁶ Thisa duhnâk lawng ruah cu thihnâk a si. Thlarau thil ruah cu nunnâk le daihnâk a si.

⁷ Zeicatiah thisa lungput nih Pathian a ralchanh i Pathian nawlbia tangah um a duh lo, a um zong a um kho lo.

⁸ Cuticun thisa in a ummi hna nih Pathian an lawmhter kho lo.

⁹ Asinain Pathian Thlarau nanmah i a um taktak ahcun, thisa i ummi si loin, Thlarau i ummi nan si. Mizei pauh Krih Thlarau a ngeih lo ahcun Amah ta an si lo.

¹⁰ Cun Krih cu nanmah i a um ahcun, pum cu sual ruangah a thi i Thlarau tu cu dinnâk thawngin a nung.

¹¹ Asinain thihnâk in Jesuh a thawhtertu Thlarau nan chungah a um ahcun, thihnâk in Krih a thawhtertu nih khan, nan chungah a ummi Thlarau thawngin a thi khomi nan pum cu a nunter lai.

¹² Cucaah u le nau hna leiba kan ngei, thisa leiin thisa phung i nun awkah a si lo.

¹³ Zeitintiah thisa leiin nan nun ahcun nan thi lai, asinain pumsa duhnâk kha Thlarau in nan thah ahcun nan nung lai.

¹⁴ Zeitintiah Pathian Thlarau hruaiin a ummi vialte cu Pathian fa an si.

¹⁵ Zeitintiah ṭihnâk le sal sinâk thlarau nan co lo i fa sinâk Thlarau tu nan co. Amah thawngin, “Abba, Kapa” tiah kan au tawn.

¹⁶ Thlarau hrimhrim nih kanmah thlarau he Pathian fa kan si kha a kan hngalhter,

¹⁷ fa kan si ahcun, ro cotu kan si. Pathian ro cotu Krih ro copi hawi kan si, Amah kan tuarpi taktak ahcun a sinah thangṭhat kan si ve lai.

¹⁸ Zeitintiah atu cân i temtuarnâk hna hi hmailei i langhter ding sunparnâk he cun tahchunh tlâk ah ka ruat lo.

¹⁹ Zeitintiah Pathian fale langhter an si lainâk kha sermi thil vialte nih hngahhlang ngai le i ruahchan ngaiin an cuan.

²⁰ Zeitintiah sermi thil vialte cu rawhralhnâk tangah umter an si. Anmah thu si loin, A umtertu nih ruahchanh nâkin a um termi an si.

²¹ Zeicatiah sermi thil vialte zong rawhralhnâk chungin luatter an si lai i a liannganmi Pathian fale zalonnâk ah an lut ve lai.

²² Zeitintiah sermi thil vialte hi atu tiangin aihramnâk le nau nganfah tuarin an um tiah kan hngalh.

²³ Culawng hmanh si loin, kannih Thlarau theitlai a ngei cangmi zong hi kan pumsa tlanhnâk le fa i canter lai cu hngahhlang ngaiin kan hngak i kan hrum ai ve ko.

²⁴ Zeitintiah ruahchannâkin dahkaw khamh kan si cu. Asinain hmuh khawhmi ruahchannâk cu ruahchannâk a si bal lo. Zeitindah mi nih a hmuh cangmi cu â ruahchan khawh lai?

²⁵ Kan hmuh rih lomi khi kan i ruahchan ahcun lungsau ngaiin kan hngak tawn.

²⁶ Cubangin Thlarau nih kan thazâng dernâk ah a kan bomh tawn. Zeitindah thla cam awk a si, ti hmanh kan hngalh lo cân ah Thlarau nih hmurkâ in chimkhawh lomi aihrâm nâkin kan caah thla a kan campiak tawn.

²⁷ Cubangin Pathian duh ningin mithiang hna caah a halpiak tawn caah lungthin a zohtu nih Thlarau lungput cu a hngalh tawn.

²⁸ Cun Pathian a dawtu amah nih a duhning i a kawhmi hna caah zeizong vialte hi a ṭha leiah a tuahpiak hna, ti kha kan hngalh.

²⁹ Zeitintiah a fapa cu unau tampi lak i fater a si khawh nâkhnga, a hngalh chungmi hna cu, Amah fapa bantuk i um dingah a khaukhih diam cang hna.

³⁰ Cu hlei ah a khaukhihmi hna cu a kawh hna i a kawhmi hna cu thiam a coter hna, thiam a cotermi hna cu a thangṭhat hna.

³¹ Hi kongah hin zeitindah kan chim lai? Pathian kan leiah a `an ahcun ahonihdah a kan doh khawh lai?

³² A fapa hmanh zuah loin kan dihlak caah a kan pêk ahcun, zeitindah thil vialte zong Amah sinah manlo tein pêkchih loin a kan um hnga?

³³ Pathian thimmi cu ahonihdah sual an puh khawh hna lai? Thiamcotertu kha Pathian a si i

³⁴ ahonihdah thiamlo a coter lai? A thimi kha Krih a si, culawng hmanh si loin, a tho ṭhân i Pathian orhlei kamah um in a kan nawlpiaktu cu amah ṭhiamṭhiam kha a si.

³⁵ Krih dawtnâk chungin zeinihdah a ka ṭhen khawh lai? Harnâk nih maw, ngaihchiatnâk nih maw, serhsatnâk nih maw, pâmnâk nih maw, taklawng umnâk nih maw, ṭihnung nih maw, vainam nih maw a kan ṭhen hnga maw?

³⁶ “Zeitintiah Nangmah ruangah nitlâk tein thah kan tong, thah ding a simi tuu bang i ruah kan si” tiah ṭialmi bang khan.

³⁷ Ṭhen hlah e! Cu thil vialte hna cu a kan dawtu thawngin teitu hna nâkin teitu kan si deuh.

³⁸ Thihnâk le nunnâk, vanmi le buainâk, thiltikhawhnâk, thil um liomi le thil um laimi,

³⁹ sannâk le thuhnâk, sermi thil dang vialte zong nih, kan Bawipa Jesuh Krih i a ummi Pathian dawtnâk chungin a ka ṭhen kho lai lo tiah fiang tein ka hngalh.