ROM 7 - Laibaibal Thiang (BSI)

¹ Asiloah ule nau hna, (nawlbia a hngalmi hna sinah ka chim lai) nawlbia nih mi a nun chung vialte a cungah nawl a ngei tiah nan hngal lo maw?

² Zeitintiah va a ngeimi nu cu ava nun chung vialte cu nawlbia nih ava ah a ṭemchih tawn. Asinain ava a thih ahcun ava i ṭemchih a simi phungin phoih a si.

³ Cuticun ava nun lioah va dang a ngeih ahcun ṭangdang kai an ti lai; ava a thih ahcun, va phungin thlah a si caah, vadang a ngeih zongah ṭangdang kai a si lai lo.

⁴ Cucaah ka ule nau hna, Krih pum ruangah nawlbia chungin nan thi cang; cuticun midang, thihnâk in thawhter Mi kha nan vat khawh cang i Pathian sinah theitlai nan chuah khawh cang lai.

⁵ Zeitintiah thisa i kan um lioah khan, nawlbia nih a thawhtermi sual duhnâk nih kan pum ṭengnge hna ah thihnâk tiang a chuahpitu theitlai a chuahpi tawn.

⁶ Asinain atu nawlbia chungin chuahter kan si cang i a kan ṭemtu kha kan thihtâk cang, cuticun ca i ṭialmi phunghlun si ti loin Thlarau tharin rianṭuantu kan si cang.

⁷ Zeidah kan chim kun lai? Nawlbia cu sual a si maw? Si naisai hlah! Khatte lei khelin, Nawlbia um hlah sehlaw sual hi sual a si kan hngal lai lo. Nawlbia nih, ‘hngar hlah’ ti hlah sehlaw, ‘hngar’ hi sual a si kan hngal lai lo.

⁸ Asinain nawlpêk hi sual nih cân rem ah a lâk i keimah ah duhnâk sual a phunphun a chuahter. Zeitintiah Nawlbia a umlonâk ah sual cu thi a si.

⁹ Nawlbia loin ka rak nung tawn. Asinain nawlpêk a um le cângkâ sual â hlau i ka thi.

¹⁰ Cun nunnâk ding i nawlpêk cu thihnâk tu a si kha ka hngalh.

¹¹ Zeitintiah sualnâk nih nawlpêk kha cân remah hmangin a ka hlen i nawlpêk kha hmangin a ka thah.

¹² Cucaah nawlbia cu a thiang, nawlpêk zong a thiang, a dik i a ṭha.

¹³ Asiahcun thilṭha cu ka caah thihnâk a rak si maw? Si naisai hlah! Asinain sual, sual zia a langh khawh nâkhnga, thilṭha cu hmangin keimah ah thihnâk a phâkter, cuticun nawlpêk he ṭangṭi in sual sualning kha a fianter.

¹⁴ Zeitintiah nawlbia cu thlarau lei thil a si. Kei tu cu thisa mi, sual sal i zuarmi ka si.

¹⁵ Zeitintiah ka tuahmi zong hi zei a si ka theithiam lo. Tuah ka duhmi hi, ka tuah lo i ka huatmi tu ka tuah tawn,

¹⁶ cuticun ka duh lomi kha ka tuah ahcun, nawlbia a ṭha tiah pompitu ka si.

¹⁷ Asinain a tuahtu kha keimah ka si lo, ka chung i a ummi sual nih a tuahmi a si.

¹⁸ Zeitintiah keimah ah (cucu ka thisa ah tinâk a si) ṭhatnâk a um lo ti kha ka hngalh; zeitintiah ṭhatnâk tuah duhnâk cu ka ngei, asinain zeitindah ṭhatnâk cu ka tuah lai ti kha a lam ka hmu lo.

¹⁹ Zeitintiah ṭhatnâk tuah ka duhmi ka tuah lo, ka duh lomi Ṭhatlonâk tu ka tuah tawn.

²⁰ Ka duh lomi kha ka tuah ahcun, a tuahtu cu keimah si loin ka chung i a ummi sual nih a tuahmi a si.

²¹ Cuticun hi nawlbia hi ka hmuh khawh cang, ṭhatnâk tuah ka duh lioah, Ṭhatlonâk ka sinah a um tawn.

²² Zeitintiah ka chunglei minung cu Pathian nawlbia ah â lawm tawn.

²³ Asinain ka pum ṭengnge ah hin nawlbia phundang a um ti kha ka hngalh, cu nih cun ka ruahnâk nawlbia kha an ralchanh i ka pum ṭengnge i sual nawlbia a ummi sinah sal ah a ka hruai tawn.

²⁴ Maw, zângfah awktlâk ka va si dah! Hi thihnâk pumsa chungin ahonihdah a ka khamh khawh lai?

²⁵ Kan Bawipa Jesuh Krih thawngin Pathian sinah lawmhnâk bia ka chim! Cuticun ka ruahnâk nih Pathian nawlbia kha a rian i ka pumsa tu nih sual nawlbia kha a rian tawn.