ROM 5 - Laibaibal Thiang (BSI)

¹ Cucaah zumhnâk thawngin thiamcoter kan si caah, ka Bawipa Jesuh Krih thawngin Pathian he remnâk kan ngei.

² amah thawng lila in atu i kan dirnâk, hi zângfahnâk ah hin, zumhnâk in kan lut i lawmhnâk he Pathian sunparnâk kan i ruahchan.

³ Culawng hmanh si loin, kan harnâk zongah kan i lawm. Harnâk nih inkhawhnâk a chuahter ti kha kan hngalh;

⁴ cun inkhawhnâk nih ziaza, ziaza nih ruahchannâk a chuahter.

⁵ Cun ruahchannâk nih kan lung a donghter bal lo, zeicatiah kan sinah a kan pêkmi Thiang Thlarau thawngin Pathian dawtnâk cu kan lungthin chungah toih a si cang.

⁶ Zeitintiah ṭhawnnâk ngei loin kan um ko lioah, cu cân theng te ah Krih cu Pathian-zeirellotu kan caah a thi.

⁷ Zeitintiah miding ca i thih-ngamhmi an har lai nain miṭha ca i thih ngamh cu an um kho men.

⁸ Asinain Pathian nih a dawtnâk cu kan sinah hitihin a langhter. Misual kan si ko rih lioah Krih cu kan caah a thi.

⁹ Culawng hmanh si loin, a thisen i thiamcoter kan si hnu ah, Amah thawngin thinhunnâk chungin khamh kan si lai.

¹⁰ Zeitintiah ral kan si lio hmanhah a Fapa thihnâk thawngin Pathian he kan i remṭhân ahcun, atu kan i remṭhân hnu ah a nunnâk ruangah khamh kan si chin chin lai.

¹¹ Culawng a si lo, atu Amah thawngin remṭhannâk kan co hnu ah kan Bawipa Jesuh Krih thawngin Pathian zongah kan i lawm.

¹² Cucaah mi pakhat ruangah sual vawlei ah a luh bantukin, sual ruangah thihnâk a lut. Cun mi vialte an sual dih bangin mi vialte sinah thihnâk a phân.

¹³ (Zeitintiah nawlbia um hlanah vawlei ah sualnâk a um cang; nawlbia a um lo ahcun sual cu sualah ruah a si lai lo).

¹⁴ Asinain Adam thawkin Moses tiangah Adam nawlbuar bantukin sualnâk a tuah lomi hna cung zongah thihnâk nih a uk dih hna, Adam cu Ara laimi hmanthlâk a si.

¹⁵ Asinain thilpêk le sualnâk hi â lo lo. Zeitintiah mi pakhat sual ruang hmanh i mi tampi an thih ahcun, Pathian zângfahnâk le mi pakhat, Jesuh Krih zângfahnâk thawng i thilpêk cu mi tampi cungah tam chin chin in a um lai.

¹⁶ Cun mipa sualnâk nih a chuahpimi le thilpêk cu â lo lo. Zeitintiah mi pakhat sualnâk nih thiamlo-coternâk biaceihnâk a chuahter, asinain sualnâk tampi ruangah man loin pêkmi thil nih thiamcoternâk a chuahter.

¹⁷ Zeitintiah mi pakhat sual ruang hmanhah thihnâk nih a uk a si ahcun, a tlingmi zângfahnâk le dinnâk thilpêk a comi hna nih mi pakhat, Jesuh Krih thawngin nunnâk nih a uk chin chin hna lai.

¹⁸ Cucaah mi pakhat sual ruangah thiamlocoternâk biaceihnâk cu mi vialte cungah a um bantukin, mi pakhat dinnâk tuahmi thawngin zungzal nunnâk ngeih awkah thiamcoternâk laksawng man loin pêkmi cu mi vialte cungah a um ve.

¹⁹ Zeitintiah mi pakhat nawl ngaihlo ruangah mi tampi cu misual ah an i cang, cubantukin mi pakhat nawl ngaihnâk thawngin mi tampi cu miding ah an i cang lai.

²⁰ Cu hlei ah, nawlbia a um tikah sualnâk a tam chin. Asinain sualnâk a tam pauh le zângfahnâk a tam chinchin ve,

²¹ cuticun sualnâk nih thihnâk in a uk bangin, zângfahnâk nih dinnâk in kan Bawipa Jesuh Krih thawngin zungzal nunnâk tiangin a uk khawh.