ROM 4 - Laibaibal Thiang (BSI)

¹ Pumsa lei in hringtu kanpa Abraham nih zeidah a hmuh kan ti lai?

² Zeitintiah Abraham kha tuahsernâk in thiamcoter a si ahcun hmaihngalpi awk a ngei lai asinain Pathian hmai ah a ngei lo.

³ Zeitintiah Cathiang nih zeidah a chim? “Abraham nih Pathian a zumh i cucu a dinnâk ah ruahpiak a si.” tiah a ti.

⁴ Rianṭuantu sinah, pekmi ṭuanman cu zângfahnâk ah ruahpiak a si bal lo, batmi ah ruahpiak a si.

⁵ Asinain rian zong ṭuan lo, Pathian zong zeirel lo, thiamcotertu a zumtu zumhnâk kha a dinnâk ah ruahpiak a si.

⁶ Tuahsernâk tel loin, Pathian nih miding i a ruahmi hna lunglawmhnâk David nih a rak chimmi ah,

⁷ “An nawl buarnâk ngaihthiam a simi hna le, an sualnâk khuhpiak a simi hna cu lunglawmmi an si.

⁸ Bawipa nih sualnâk ngei i a ruah lomi cu lunglawmmi an si.” tiah a ti.

⁹ Cu lunglawmhnâk cu cuarpar tanmi hna ca lawngah maw a si, tan lomi caah ta? Zeitintiah Abraham zumhnâk cu a dinnâk ah ruah a si kan ti fawn.

¹⁰ Cucu zeitindah ruah a si? A cuarpar tan hlanah maw? tan hnu ah dah? A cuarpar tan hnuah si loin cuarpar a tan hlanah a si.

¹¹ Cuarpar tan lo i a um lioah, zumhnâk thawngin dinnâk a hmu tiah hmelchunhnâk, cuarpartan hmelchunhnâk zong a simi cu a hmuh cang; cuticun cuarpar tan lomi zong siseh miding i ruah an si khawh nâkhnga le, a zumtu vialte pa a si khawh nâkhnga,

¹² cuarpar tanmi hna anpa a si, cuarpar tanmi hna pa lawng si loin kan pa Abraham cuarpar tan lo i a um lio ah zumhnâk i a nun bantukin a nungmi ca zongah a si ve.

¹³ Zeitintiah Abraham le a tefa hna sin i vawlei ro co lainâk biakam kha nawlbia thawngin a si lo i zumhnâk thawng i dinnâk in a si.

¹⁴ Zeitintiah nawlbia zultu kha rocotu an si ahcun, zumhnâk cu zeihmanhlo ah a cang lai, biakammi zong sullam ngei lo a si lai,

¹⁵ zeicatiah nawlbia nih thinhunnâk a chuahter, zeitintiah nawlbia um lo nâkah nawlbuarnâk zong a um kho lo.

¹⁶ Cucaah biakamnâk nih mi vialte a khumh khawh nâkhnga nawlbia ngeitu hna lawng si loin, kan dihlak zumhnâk pa Abraham bantuk i zumhnâk ngeitu zong a khumhchih khawh nâkhnga zumhnâk thawngin zângfahnâk i pêk a si.

¹⁷ A zumhmi Pathian, mithi hna nuntertu le a um lomi thil zong a ummi bang i a autu hmai ah, (tefa tampi pa ah kan siter, tiah ṭial a rak si cang).

¹⁸ Ruahchan ding a um lo lio zongah, i ruahchan ngaiin a zumh, cucu miphun tampi pa ah a can khawhnâk zong a si. “Khizat khin na tefa hna cu an um te lai tiah” chimh a si bantuk khan.

¹⁹ A pumsa a thi ciami bang (kum 100 a si cangmi) le Sarah cinnâk zong hngalh buin, zumhnâk kongah a lung a dong lo.

²⁰ Pathian biakam cu lunghrinh in a pialtâk lo, a zumhnâk tu a ṭhawng chin i Pathian tu thangṭhatnâk a pêk i

²¹ A biakam cu Amah nih a tlinter khawh tiah a dihumnâk in a zumh.

²² Cucaah “Cucu a dinnâk ah ruahpiak a si.

²³ Cubangin a dinnâk i ruahpiak timi cu amah ca lawngah a si lo,

²⁴ kanmah ca zongah a si ve. Kan Bawipa Jesuh thihnâk in a thawhtertu a zumtu kan ca-ah ruah a si ve lai,

²⁵ Amah cu kan nawlbuarnâk ruangah tlaih a si i thiam kan co khawh nâkhnga thawhter a si.