ROM 3 - Laibaibal Thiang (BSI)

¹ Judah mi nih zei santlaihnâk dah an ngeih hlei? Asiloah cuarpartan hi zeidah a ṭhathnemnâk?

² A lamkip in san a tlai! A biapi bik cu an sin i Pathian bia pêk an si caah a si.

³ Zeitintiah cheukhat nih zum loin um hna sehlaw zeitindah a si lai? An zumhlonâk nih khan Pathian zumhtlâk a sinâk kha zeihmanh loah a canter tinâk a si maw?

⁴ Si naisai hlah! Pathian cu a dikmi si sehlaw, mikip hi lih chimmi si hna seh. “Nang nih Na bia in thiam na co i biaceih na si tikah na tei khawh nâkhnga,” tiah ṭialmi bang khan.

⁵ Kan dinlonâk nih Pathian dinnâk cu a langhter ahcun zeidah kan chim kun lai? Pathian nih thinhunnâk a langhter ah hin a dik lo tinâk a si hnga maw? (Minung phung ningin ka chimmi a si)

⁶ Si naisai hlah! Cuti’n sisehlaw zeitindah Pathian nih vawlei bia a ceih kun lai?

⁷ Zeitintiah lih ka chimmi nih Pathian diknâk le sunparnâk a chapchin a si ahcun zeicadah keimah zong cu misual aka ti ko rih lai?

⁸ Cun zeiruangahdah, “Thilṭha a chuah khawh nâkhnga, sualnâk tuah usih, tiah kan ti ko lo? Mi cheukhat nih cubantuk chimtu ah anka puh. A cheu nih a chim tak takmi ah anka ruah. Thiamlo an co termi cu a dikmi a si.

⁹ Zeidah a si kun lai? Annih nâkin kan ṭha deuh hlei maw? Ṭha deuh hlei naisai hlah. Zeitintiah Judah mi le Grik mi hna cu sualnâk salah an um dih tiah kan chim cang kha.

¹⁰ Hitihin ṭial a si: Ahohmanh miding an um lo, pakhat hmanh an um lo.

¹¹ Ahohmanh theithiammi an um lo, ahohmanh Pathian a kawlmi an um lo.

¹² An dih lakin an pial dih cang, an dih lakin zeihmanh loah an cang dih. Ahohmanh ṭhatnâk tuahmi an um lo, pakhat te hmanh an um lo.

¹³ An hrom cu onmi thlân a si, an lei cu hlennâk ah an hman i an hmur ah rul sivai a um.

¹⁴ Ankâ cu thangchiatnâk le bia chia-khâ in a khat,

¹⁵ anke cu thisen chuah dingin a ṭhawng i

¹⁶ an lamah lohtlaunâk le ngaihchiatnâk a um.

¹⁷ Daihnâk lam an hngal lo.

¹⁸ Pathian ṭihnâk mithmai zong an ngei lo.

¹⁹ Cubangin nawlbia nih a chimmi pauh cu nawlbia tang i a ummi caah a chimmi a si tiah kan hngalh. Kâ vialte cu huh a si nâkhnga le vawlei mi vialte Pathian hmai i thiamlo coh an si khawh nâkhnga.

²⁰ Cucaah nawlbia tuahsernâk in a hmai ah thiamcomi ahohmanh an um lai lo; zeitintiah nawlbia cu sual hngalhnâk a si.

²¹ Asinain nawlbia tel loin Pathian dinnâk, nawlbia le profet hna nih an rak hngalhpimi kha, atu ah langhter in a um,

²² cucu Pathian dinnâk, Jesuh Krih zumh ruangah a zummi vialte sin i langhtermi cu a si. Zeitintiah thleidannâk zeihmanh a um lo;

²³ mi vialte an sual dih cang i Pathian sunparnâk an co kho ti lo,

²⁴ Jesuh Krih i a ummi tlanhnâk in a zângfahnâk ruangah man loin thiamcoter an si.

²⁵ Pathian lung saunâk nih cuhlan i sualnâk rak tuahmi kha hngalhpiak ti loin a dinnâk langhter nâkah zumhnâk in a thisen cu lungdamternâk bangin Pathian nih a umtermi a si,

²⁶ atu cân ah a dinnâk langhter nâkah, amah zong cu midik a si khawh nâkhnga le Jesuh zumtu pauh thiamcotertu a si khawh nâkhnga.

²⁷ Nâ uahnâk cu khuazeiahdah a um? Lodiam hlonh a si cang. Zei phunglam in? Tuahsernâk in maw? A si lo, zumhnâk phungin a si.

²⁸ Cucaah nawlbia tuahsernâk si loin zumhnâk in mi nih thiam an co deuh.

²⁹ Asiloah Pathian cu Judah mi Pathian lawng maw a si? Gentel mi hna Pathian zong a si ve lo maw? A si. Gentel mi Pathian zong a si,

³⁰ Pathian pakhat lawnglawng a um i zumhnâk thawngin cuarpar tanmi hna le, zumhnâk in cuarpartan lomi hna thiamcotertu a si.

³¹ Asiah, zumhnâk ruangah nawlbia cu zeihmanhlo ah kan canter maw? Canter naisai hlah! Nawlbia kha kan fehter leh lam.