ROM 2 - Laibaibal Thiang (BSI)

¹ Cucaah maw minung, midang biaceihtu na si zongah, sawnhtarhnâk na ngei lo, zeitintiah midang bia na ceihnâk ah nangmah le nangmah bia â ceihmi na si, zeitintiah nang midang biaceihtu nangmah zong nih cubantuk thil kha na tuah ve ko.

² Pathian nih cubantuk thil a tuahmi hna cung i bia a ceihmi cu biatak ningin a si ti kha kan hngalh.

³ Maw minung, cubantuk thil a tuahtu hna biaceihtu, nangmah zong nih cubantuk na tuah ve tikah, Pathian biaceihnâk in na luat kho lai maw?

⁴ Asiloah, Pathian ṭhatning hngalhnâk nih ngaihchihnâk ah an hruai khawh ti kha hngal loin, Pathian ṭhatnâk, lungsaunâk, a in khawhnâk kha na zomhtaih lai maw?

⁵ Na luhlul le na lungkhawnning rupin thinhunnâk ni le Pathian biaceihnâk fel a ra laimi caah thinhunnâk nâ khon luaimai mi a si.

⁶ Amah nih “Mikip an tuahning cio in a pêk ṭhân te hna lai.”

⁷ Ṭhatnâk a tuah lengmang i sunparnâk le upatnâk le thihkhawhlonâk kawltu sinah zungzal nunnâk a pêk lai,

⁸ asinain mah zawn lawng ruatin biatak zul duh loin dinlonâk a zultu hna sinah thinhunnâk le thinhannâk,

⁹ harnâk le ngaihchiatnâk kha sualnâk a tuahtu hna thlarau cungah a um lai. Judah mi thlarau cungah a um hmasa lai i Grik mi thlarau cung zongah a um lai.

¹⁰ Asinain ṭhatnâk a tuahtu hna cungah sunparnâk le upatnâk le daihnâk kha pêk an si lai. Judah mi sinah pêk hmasat a si lai i Grik mi sin zongah pêk a si lai.

¹¹ Pathian ah thleidannâk a um lo.

¹² Zeitintiah nawlbia loin sualnâk a tuahtu pauh cu nawlbia loin a lotlau lai, nawlbia in sualnâk a tuahtu pauh cu nawlbia in ceih an si lai.

¹³ (Zeitintiah nawlbia hngaltu men hi Pathian hmaiah miding an si lo. Nawlbia ningin a tuahtu kha thiamcoter an si lai.

¹⁴ Zeitintiah nawlbia a ngei lomi Gentel hna nih, nawlbia nih a tinhmi kha anmah lung chuakin an tuah tikah, nawlbia an ngei lo nain, anmah caah nawlbia cu an i ser ve ko.

¹⁵ an lungthin chungah nawlbia cu ṭial a si kha an tuahsernâk nih a langhter, an chiaṭha hngalhnâk nih a hngalhpi hna, a cân ah thiamlo an i coter i a cân ah thiam an i coter tawn),

¹⁶ thawngṭha ka chimmi ningin Pathian nih minung hna biathli cu Jesuh Krih in a ceih te lai.

¹⁷ Nang cu Judah ti na si taktak, nawlbia nâ bochan i Pathian ah nâ porhlaw,

¹⁸ A duhnâk na hngalh i nawlbia ah cawnpiak na si ruangah thilṭha taktak cu na pompi.

¹⁹ Cuticun mitcaw hna caah hruaitu, muinâk i a ummi hna caah ceunâk,

²⁰ mihrut hna chimhringtu, ngakchia hna caah cawnpiaktu, nawlbia ning i fimnâk le biatak umtuning ngeitu ah nâ ruah.

²¹ Cucaah nang, midang cawnpiaktu, nangmah ta nâ cawnpiak bal lo maw? Nang fir lo ding i cawnpiaktu nih na fir maw?

²² Nang, ‘ṭangdang kai hlah’ titu nih ṭangdang na kai maw? Nang milem a fihtu nih, ṭempal thil kha na fir maw?

²³ nang nawlbia â porhlawt pitu, nawlbia buarin Pathian min na chiatter maw?

²⁴ An rak ṭial bantukin “Pathian min cu nanmah ruangah Gentel mi hna lakah thangchiat in a um.”

²⁵ Nawlbia na zulh ahcun cuarpartan cu san a tlai ko, nawlbia buartu na si ahcun na cuarpar tan cu tanlo bantuk a si.

²⁶ Cucaah cuarpar tan lomi nih nawlbia a zulh ahcun cuarpartanlo cu tanmi bangin ruah a si lai lo maw?

²⁷ Cun taksa leiin cuarpar tan lomi nih nawlbia a zulh dih ahcun, ca chung bia le cuarpartan phung le a ṭialnâk ca ngei ko nain a buartu cu bia an ceih lai lo maw?

²⁸ Zeitintiah lenglei men i Judah mi si cu Judah mi taktak an si lo i lenglei men i cuarpartan cu cuarpartan taktak an si lo;

²⁹ chunglei i Judah mi a simi cu Judah mi taktak a si; cun cuarpartan cu ca chung bia si loin, Thlarau in Lungthin ah a si, cuhna cu minung sinin thangṭhat an co lo nain Pathian sin tuin thangṭhat an co.