ROM 16 - Laibaibal Thiang (BSI)

¹ Kan farnu Fibi Kenkhria khua kawhhran rianṭuantu hi

² mithiangmi hna cung i an tuah tawn bantukin Bawipa min i nan rak cohlan nâkhnga le bomh a herhnâk pauh ah nan rak bomh awkah nawl kan pêk hna, zeitintiah amah zong hi mi tampi bawmtu tak tak a rak si cang i keimah ca zong ah a si.

³ Prisila le Akuila Krih Jesuh i ka ṭuanpi hawi,

⁴ ka nunnâk khamhnâk dingah an hngawng â donhmi hna hi, anmah sin lawngah si loin Gentel kawhhran hna sin zongah lawmhnâk bia ka chim.

⁵ Cuhleiah an innah â pummi kawhhran kha an kut ka tlaih hna i ka dawtmi Epenetas, Asia ram i Krih ah theitlai hmasa bik kha a kut ka tlaih.

⁶ Mary ka caah rian tampi a ṭuntu kha a kut ka tlaih.

⁷ Ka phun hawi Andronikas le Junias ka thong tlakpi hawi kha an kut ka tlaih hna, annih cu lamkaltu hna lakah min thang ngaimi an si i keimah hlan in Krih ah a um hmasami zong an si.

⁸ Amplias Bawipa i ka dawtmi kha a kut ka tlaih.

⁹ Krih i kan rianṭuan hawi Urbanas le ka dawtmi Stakhis kha an kut ka tlaih hna.

¹⁰ Krih i cohlan awktlâk, Apelles kha a kut ka tlaih. Aristubulas chungkhar hna kha an kut ka tlaih hna.

¹¹ Ka phunhawi Herodion kha a kut ka tlaih. Narkissas chungkhar lak i Bawipa ah a ummi kha an kut ka tlaih hna.

¹² Trifana le Trifosa Bawipa caah ba ngaiin rian a ṭuanmi kha an kut ka tlaih hna.

¹³ Bawipa thimmi Rufas le a nu, ka nu zong a simi kha an kut ka tlaih hna.

¹⁴ Asyncritus, Flegon, Hermas, Patrabas, Hermes le a sin i a ummi unau hna he an kut ka tlaih hna.

¹⁵ Filogas le Julia, Nereus le a farnu le, Olimpas le a sin i mithiang ummi vialte he an kut ka tlaih hna.

¹⁶ A thiangmi hnamh nâkin nan kut i tlai u. Krih kawhhran vialte hna nih nan kut an in tlaih hna.

¹⁷ Ule nau hna nan cawnmi biatak si loin cawnpiaknâk dang a cawnpiak i i ṭhennâk le tlukrilhnâk a phâktertu cu ralring ngaiin hnulei chit dingah kan nawl hna.

¹⁸ Zeitintiah cubantuk mi hna nih kan Bawipa Jesuh Krih rian an ṭuan lo i an paw ca i rianṭuantu an si, cun an dangnal le biachim thiam nâkin santlailo lungthin an hlen tawn hna.

¹⁹ Zeitintiah nawl nan ngaihning kha mi vialte sinah a thang dih. Cucaah nan cungah kâ lawm. Asinain ṭhatnâk lei ah nan fimthiam i sualnâk lei ah mitluangtlam nan si ka duh.

²⁰ Cun daihnâk Pathian nih Satan cu nan ke tangah a khuai zau lai. Kan Bawipa Jesuh Krih zângfahnâk cu nan sinah um ko seh. Amen.

²¹ Kan rianṭuan hawi Timote le, ka phunhawi Lusias, Joson le Sosipater hna nih nan kut an in tlaih hna.

²² Keimah, Tertius hi ca a ṭialtu nih Bawipa ah nan kut kan tlaih hna.

²³ Keimah le kawhhran vialte tlunnâk Gaias nih nan kut an tlaih hna.

²⁴ Kan Bawipa Jesuh Krih zângfahnâk cu nan dihlak cungah um ko seh. Amen.

²⁵ Ka Thawngṭha le Jesuh Krih chimmi bang i an fehter khotu hna, Amah sinah vawlei serka in biathli â thupmi phuan a si bangin,

²⁶ cu biathli atu i phuan a simi le mi phunkip theih awkah Cathiang nih a rak chimmi, zungzal Pathian nawlpêk bangin, zumhnâk kha an zumh nâkhnga-

²⁷ A fimmi Pathian sin lawnglawng ah Jesuh Krih thawngin zungzal in sunparnâk um ko seh. Amen.