ROM 15 - Laibaibal Thiang (BSI)

¹ Kannih a ṭhawngmi hna nih mah lawmhnâk lawng kawl loin zângdermi kha kan bomh hna awk a si.

² Kan dihlak in mah le innpa ṭhatnâk le ṭhathnemnâk caah lawmhter i tim cio usih.

³ Zeitintiah Krih zong nih Amah lawmhnâk a kawl lo. “Nangmah situ hna siknâk cu keimah cungah a tla,” tiah ṭialmi bantuk kha a si.

⁴ Zeitintiah Cathiang chungah inkhawhnâk, hnangamnâk le ruahchannâk kan ngeih khawh nâkhnga hlan lioah an rak ṭialmi hna kha kanmah cawnpiaknâk dingah ṭialmi an si.

⁵ Cubangin lungsaunâk le hnangamnâk Pathian nih Krih Jesuh bia bantukin pakhat le pakhat ruahnâk pakhat in ngeihter hna seh.

⁶ Cuticun lungthin pakhat le kâ pakhat in Pathian le kan Bawipa Jesuh Krih a Pa kha nan thangṭhat khawh lai.

⁷ Cucaah Krih nih Pathian sunparnâk dingah an cohlan hna bantukin nannih zong pakhat le pakhat i cohlang ve u.

⁸ Cubangin hringtu hna sinah a sermi a biakam fehter dingah Pathian biatak thawngin, Jesuh Krih cu cuarpartanmi hna sinum ah â cang,

⁹ cucu a vel thawngin Gentel mi hna nih Pathian an thangṭhat khawh nâkhnga caah a si. “Hi ruangah hin Gentel hna sinah na min ka thangṭhat lai i na min in hla ka sa lai” tiah ṭial a si.

¹⁰ Cun “Maw Gentel mi hna, a mi le hna he i lawm tuah u!” tiah a chim ṭhân.

¹¹ Cun “Nannih Gentel mi vialte hna, Bawipa cu thangṭhat u, Mi vialte hna Amah cu thangṭhat u,” a ti ṭhân rih.

¹² Cun Isaiah nih, “Jessi zunghram cu a um lai i Amah cu Gentel mi hna uk dingah a rung chuak lai; Gentelmi hna nih Amah kha an i ruahchan lai,” tiah a chim ṭhân.

¹³ Thiang Thlarau ṭhawnnâk thawngin ruahchannâk in a khatmi nan sikhawh nâkhnga, ruahchannâk Pathian nih nan zumhnâk ah lomhnâk le daih nâkin in khahter hna seh.

¹⁴ Atu ah ka u le ka nau hna, hngalhnâk vial tein khahter nan si i ṭhatnâk zongin nan khat, pakhat le pakhat â chimhring kho in nan um ca ah, nan kongah keimah zong hnangam tein ka um.

¹⁵ Asinain ule nau hna, Pathian sinin zângfahnâk pêk ka si caah thil sining cheukhat theihter ṭhânnâk dingah ralṭha in nan sinah ka ṭialmi a si,

¹⁶ cuticun Gentel mi hna thilpêk cu cohlan awktlâk, Thiang Thlarau i thiantermi a sikhawh nâkhnga, Gentel mi hna sinah Jesuh Krih ca i Pathian thawngṭha bia rianṭuantu ka si kho lai.

¹⁷ Cucaah Pathian kongah Krih Jesuh ah hmaihngal khawhnâk ka ngei.

¹⁸ Zeitintiah Gentel mi hna zumhter dingin Krih nih keimah ah a lîmcangmi dah ti lo cu bia in siseh tuahsernâk in siseh ka phuang ngam lo,

¹⁹ Krih thawngṭha bia cu hmelchunhnâk le khuaruahhar thil lianngan hna le, Pathian Thlarau thiltikhawhnâk thawngin Jerusalem in Illirikum tiangin tling tein ka chim cang.

²⁰ Midang hram bunhmi cung i a sami ka si nâkhnga lo, thawngṭha bia cu Krih min kawh cianâk hmun a si lomi ah chim hi ka timhmi a si,

²¹ “A thawngpang an thanh bal lonâk mi hna nih an hmuh lai, cun a thei bal lomi hna nih an theih lai.” tiah ṭialmi bang khan.

²² Hiruangah hin nan sin i rat dingah donhkhanh i ka um tawnnâk cu a si.

²³ Asinain atu ah hi ram hrawngah umnâk ka ngei set ti lo, kum tampi nan sin rat ka duh tuk nâk he,

²⁴ Spain ram i ka kal tik pauh ah nan sinah ka ra lai. Zeitintiah ka khual tlawnpah ah nanmah hmuh lai kâ ruahchan, nanmah he cân khat te i hawikomh nâkah kâ lomh khawh ahcun, ka kal ṭhânnâk dingah nan ka bomh zong kâ ruahchan.

²⁵ Asinain atu mithiang hna rian ṭuan dingin Jerusalem ah ka kal rih lai.

²⁶ Zeitintiah Mesidonia le Akai rammi hna nih lunglawm ngaiin Jerusalem khua i misifâk hna caah chawva an pêk cang.

²⁷ Cu nih cun a lomhter tak tak hna, cun annih cu an lei a battu an si. Zeitintiah thlarau lei thil hna Gentel mi nih an i hrawm ahcun thilri lei in an bomhchanh hna ding kha an ṭuanvo a si.

²⁸ Cucaah hi rian ka ṭuan dih i hi theitlai hi an hmuh hnuah, Spain ram i ka kalpah in kan pal te hna lai.

²⁹ Asinain nan sin i ka rat tikah Krih thawngṭha thluachuahnâk tlamtling he ka ra lai tiah ka hngalh.

³⁰ Cubangin unau hna, Bawipa Jesuh Krih le Thlarau dawtnâk in, biatak tein Pathian sinah thla kan camṭi nâkah hin, thla ka campiak ve u tiah kan nawl hna,

³¹ Judia ram i a zum duh lotu hna lakah khamh ka si khawh nâkhnga le, Jerusalem ca i rian ka ṭuanmi hi mithiang hna ca ah cohlan awktlâk a si khawh nâkhnga,

³² Pathian hnatlâk nâkin lunglawm tein nan sin ka rat khawh nâkhnga le nanmah hna he hmunkhat teah kan i tharchuah khawh nâkhnga.

³³ Daihnâk Pathian nih nan dihlak in umpi ko hna seh. Amen.