ROM 14 - Laibaibal Thiang (BSI)

¹ Zumhnâk i zângdermi kha cohlang hna u, an lunghrinhmi thil kha al hna hlah u.

² Zeitintiah mi pakhat nih thil vialte eikho in â ruah, asinain zângdermi nih tisik anhnah lawng a ei.

³ Zeizong vialte a eimi nih a ei lomi zomhtaih hlah seh, a ei lomi zong nih a eimi zomhtaih hlah seh, zeitintiah Pathian nih a cohlan veve ko hna.

⁴ Midang sin-um a sawitu cu ahodah na si? A dirah siseh, a tlukah siseh, amah uktu sinah a si. Asinain amah cu dirter a si ko lai, zeitintiah Pathian nih a dirter khawh ko.

⁵ Mi pakhat nih nikhat hi nidang nâkin sunglawi khun in a ruah. Midang pakhat nih ni vialte hi â khat dih ah a ruah. Cucaah mikip nih mah le ruahnâk cio ah ṭha tein ruat seh.

⁶ Ni ultu nih Bawipa caah a ulh tawn, ulh khunmi a ngei lomi zong nih a ulh lo cu Bawipa caah a si. Eitu nih Bawipa sinah lawmhnâk bia a chim i Bawipa caah a eimi a si; cun a ei lotu zong nih Bawipa sinah lawmhnâk bia chimin a ei lomi a si.

⁷ Zeitintiah ahohmanh mah caah kan nung lo i ahohmanh mah caah kan thi lo.

⁸ Kan nun le Bawipa caah kan nung i kan thih le Bawipa caah kan thi. Cucaah kan nun ah siseh kan thih ah siseh Bawipa ta kan si.

⁹ Zeitintiah Krih a thih i a thawhṭhannâk le a nun chan cu mithi le minung Bawi a si khawh nâkhnga caah a si.

¹⁰ Asiah nang nih zeiruangahdah na unau na sawi? Zeiruangahdah na unau na serhsatnâk cu na langhter. Zeitintiah Pathian biaceihnâk ṭhutdanh hmaiah kan dih lakin kan dir te lai.

¹¹ Zeitintiah hitihin ṭial a si, “Ka nun bangin, khuk vialte ka hmaiah an i bil lai i lei vialte zong Pathian hmai ah an i phuang lai,” tiah Bawipa nih a ti.

¹² Cuticun kan dih lakin Pathian sinah kanmah kong cio kan chim te lai.

¹³ Cucaah i sawi ti hlah u sih, aho pauh nih mah unau caah dawntu le tluktertu si lo kha i tim cio u sih.

¹⁴ Zeithil pauh hi amah te long ahcun thianglo a um lo tiah Bawipa Jesuh ah fiang tein ka hngalh, asinain thianglo i a ruattu caah a thiang lo a si ko.

¹⁵ Na eidin ruang i na unau a lung a fah ahcun dawtnâk lam na zul ti lo, tinâk a si. Krih nih a ca i a thihpiakmi kha na eidin nih hrawhpiak hlah seh.

¹⁶ Cucaah ṭha nan timi kha mi thangchiat in um hlah seh,

¹⁷ zeitintiah Pathian pennâk cu ei le din a si lo, dinnâk le daihnâk, Thiang Thlarau ah i lawmhnâk te hna hi an si.

¹⁸ Cubantukin Krih riantuantu hna cu Pathian lomhmi le minung zong nih an cohlanmi an si.

¹⁹ Cucaah daihnâk a sertu thil hna le midang thazâng petu a simi thil kha dawi hna u sih.

²⁰ Rawl ruangah Pathian rian kha hrawk hlah. Thil vialte hi an thiang taktak ko, asinain midang tluknâk ca i ei cu, a eitu caah sual a si.

²¹ Na unau tlukrilhnâk ding le thazâng dernâk ding a si ahcun sa ei lo le mitsur hang din lo le zei thil pauh tuah lo hi a ṭhami a si.

²² Zumhnâk na ngei maw? Pathian hmai ah ngei ko. A pommi kongah mah le mah sual â phaw lomi cu mi lunglawm an si.

²³ Asinain lunghrinh bu i ei cu, zumhnâk i a ei lo ruangah thiamlo a co cang, zeitintiah zeithil pauh hi zumhnâk in a si lomi cu sual a si.