ROM 13 - Laibaibal Thiang (BSI)

¹ Mikip an cung i nawlngeitu hna nawl tangah an um awk a si. Zeitintiah Pathian tel loin nawlngeitu an um lo, nawlngeitu hna hi Pathian ruahmi an si.

² Cucaah ahopauh nawlngeitu bia al cu Pathian ruahmi altu an si i altu hna cu dântat an tong lai.

³ Zeitintiah uktu hna hi thilṭha a tuahtu caah ṭihnung an si lo, asinain misual caah ṭihnung an si. Nawlngeitu ṭih lo tein um na duh maw? Ṭhatnâk tuah law, an sinin thangṭhat na co lai.

⁴ Zeitintiah anmah cu na ṭhatnâk dingah Pathian rianṭuantu an si. Asinain sualnâk na tuah ahcun, ṭih hna; zeitintiah vainam cu â put sawh sawh lai lo. Anih cu Pathian rianṭuantu, sualnâk a tuahmi cungah a thin a hung i phuhlamtu a si.

⁵ Cucaah an thin hun lai ṭih ruang lawngah si loin, na chia ṭha hngalhnâk ruang zongah an nawl ngaihnâk tang i kun ding na si.

⁶ Zeitintiah hiruangah hin ngunkhuai zong nan pêknâk hi a si. Cubantuk rian `uanpeng dingin Pathian rianṭuantu an si.

⁷ Cucaah nan batmi vialte pe hna u, leiman pêknâk dingah leiman pe ulaw, ngunkhuai pêknâk dingah ngunkhuai pe u. ṭih awk ṭih ulaw, hmaizah awk hmaizah u.

⁸ Pakhat le pakhat i dawt dah tilo cu lei i ba hlah u, zeitintiah midang a dawtu nih cun nawlbia cu a zulh dih cang.

⁹ Zeitintiah nawlpêkmi hna, “Ṭangdang kai hlah,” “Lai nawng hlah,” “Fir hlah,” “Lih in biahngaltu va si hlah,” “Hngar hlah,” timi le a tângmi nawlpêk dang hna zong, “Nangmah nâ dawt bangin na inpa na dawt lai,” timi nih a fun dih.

¹⁰ Dawtnâk nih inpa a fahter bal lo; cucaah dawtnâk hi nawlbia tlamtlinnâk a si.

¹¹ Cun atu hi â hngilhmi hna i hlauh cân a si kha nan hngalh bangin hihi tuah u, zeitintiah atu ah cun kan zumh hramthawknâk nâkin kan khamhnâk ni cu a nai cang.

¹² Zan hi a dih dengmang i khua a dei dengmang cang, cucaah khuamui tuahsernâk kha hlawnh in khua ceu thuam kha i hruk u sih.

¹³ Chun i um bangin dawh tein um u sih. Zuri le hnahnok i um loin, hor le pumsa duhnâk tuah loin, buaibai le i hnahchuah loin.

¹⁴ Bawi Jesuh Krih tu in i thuam ulaw, nan pumsa duhnâk tlinter dingin zeihmanh tuah hlah u.