ROM 12 - Laibaibal Thiang (BSI)

¹ Cucaah ule nau hna, Pathian zângfahnâk ruangah hin raithawinâk nung le thiang, Pathian cohlan awktlâk si dingin nan pum cu pe dingin kan nawl hna, cucu ruahawk a tlâkmi nan rian cu a si.

² Hi vawlei sining he i pehtlai hlah u, thilṭha le cohlan awktlâk, a tlingmi Pathian duhnâk cu nan hngalhkhawh nâkhnga nan ruahnâk kha tharchuah le thlen in um ko seh.

³ Zeitintiah Pathian pekmi zângfahnâk ruangah hin, nan lakah ahohmanh nih mah sinâk cungah i santer loin, Pathian nih mikip sinah zumhnâk a pêkning cio in, felfai tein ruat cio hna seh ti ka duh.

⁴ Taksa pum ah hin nge tampi kan ngei, nge vialte rianṭuan tu cu â lo cio lo,

⁵ cubangin kannih zong, tampi kan sikonain, Krih ah taksa pumkhat kan si, pakhat cio in a nge kan si dih.

⁶ Zângfahnâk a kan pêkning cio in thilpêk zong kan ngei cio. Chimchungtu kan si ahcun, zumhnâk kan ngeihning cio in chimchung u sih.

⁷ rianṭuantu kan si ahcun, taihmâk chuah tein ṭuan u sih. Cawnpiaktu zong nih cawnpiak sehlaw;

⁸ Chimhringtu zong nih chimhring seh. Thil petu nih siang ngaiin pe seh, hruaitu nih biatak tein hruai hna seh, zângfahtu nih lunglawm tein zângfah seh.

⁹ Dawtnâk cu zernâk tel loin si seh. Thil ṭhalo kha hua hna ulaw, thilṭha kha i tlaih peng u.

¹⁰ Unau i dawt bangin i daw cio u; mah nâkin midang kha sâng deuh ah chia u.

¹¹ Taihmâk leiah daithlang loin, thlarau ah ṭhahnem ngai ulaw, Bawipa kha rian u,

¹² ruahchanhnâk ngeiin i lawm ulaw, harnâk lakah inkhawhnâkin, ṭhahnem ngaiin thla cam lengmang ko u.

¹³ mithiang hna chamhbaunâk bawm hna ulaw, khual tlung ṭha tein zohkhenh u.

¹⁴ An serhsattu hna kha thluachuah pe ulaw, chiat serh hna hlah u.

¹⁵ Â lawmmi lawmhpi ulaw, a ṭapmi ṭahpi hna u.

¹⁶ Ruahnâk hmunkhat in um ulaw, i santer hlah u, dirhmun niammi hna komhkhawh dingin um u. Mah le mah i fimter hlah u.

¹⁷ Sual kha sual in lehrul hlah u, mi vialte hmuhnâk i ṭhatnâk kha tuah u.

¹⁸ A si khawh ahcun nanmah lei kam tal in mi vialte he rualrem tein um u.

¹⁹ Dawtmi hna, teirul i cham hlah u, thinhunnâk caah hmun tu kian u; zeitintiah, “Phuhlam cu Keimah rian a si, Keimah nih ka lehrulh lai, Bawipa nih a ti,” tiah ṭial a si.

²⁰ Cucaah, “Na ral a rawl a ṭam ahcun, ei awk pe; a ti a hal ahcun din awk pe; cubangin na tuah ahcun a lu cungah meiṭil na chonh a si lai.

²¹ Sualnâk teiin umhlah, ṭhatnâk in sualnâk kha va tei deuh.