ROM 10 - Laibaibal Thiang (BSI)

¹ Unau hna, Israel mi hna ca i ka lungthin duhnâk le an ca i Pathian sinah thla ka camnâk cu khamh an si khawh nâkhnga caah a si.

² Zeitintiah Pathian caah an i zuam ngai ngai ti cu ka hngalhpi hna, asinain hngalhnâk in a si lo.

³ Zeitintiah Pathian dinnâk kha hngal loin, anmah dinnâk tu fehter an timh i Pathian dinnâk ah pêk an i tim lo.

⁴ Zeitintiah zumtu vialte nih dinnâk an hmuhkhawh nâkhnga Krih cu nawlbia donghnâk a si.

⁵ Moses nih nawlbia i dinnâk cu hitihin a ṭial, “Cubantukin a tuahmi hna cu an nung lai,” tiin.

⁶ Asinain zumhnâk i dinnâk tu cu hitihin a chim, “Ahodah vanah a kai lai? (cucu cung leiin Krih ṭumpi ding tinâk a si)

⁷ Ahodah tang leiah a ṭum lai? (cucu thih nâkin Krih kaipi ding tinâk a si) tiin, ruat hlah u.

⁸ Asiah zeitindah a chim? “Bia nih an naih ko cang, na kâ le na lungthin zongah a um,” (cucu zumhnâk bia kan chimmi cu a si).

⁹ Na kâ in Jesuh cu Bawipa a si tiah na ṭanh i thih nâkin Pathian nih a thawhter tiah na lungthin in na zumh ahcun, khamh na si lai.”

¹⁰ Zeitintiah mi nih lungthin in an zumh i dinnâk an hmuh; kâ in an ṭanh i khamhnâk an hmuh.

¹¹ Cathiang nih, “Amah zumtu pauh cu a mualpho lai lo,” tiah a ti.

¹² Judah le Grik kar lakah thleidannâk zeihmanh a um lo, an dihlak cungah Bawipa cu Bawipa pakhat a si. Amah a kotu vialte cungah a ṭha.

¹³ Zeitintiah “Bawipa min a kotu vialte khamh in an um lai.”

¹⁴ An zumh lo ahcun zeitindah an kawh khawh lai? Ahodah a si tiah an theih lomi cu zeitindah an zumh khawh lai? Chimtu um loin zeitindah an theih khawh lai?

¹⁵ Thlah loin zeitindah an chim lai? Daihnâk thawngṭha chimtu hna an ke cu a vâ dawh dah,” tiah ṭialmi bangin.

¹⁶ Asinain thawngṭha bia cu an dih lakin an zum lo. Isaiah nih hitihin a chim. (Bawipa, kan chimmi ahonihdah an zumh?) tiin.

¹⁷ Cuticun theihnâkin zumhnâk a um i theihnâk cu Pathian bia in a um.

¹⁸ Asiah an hna nih a thei lo maw? ka ti ko lai. An theih ko. (An thawng cu ramkip ah a thang i an bia zong vanhram deng tiangin a thang.)

¹⁹ Asiah Israel mi nih an hngal lo maw? Hei ti ko ning law, A hmasa bikah Moses nih, “Miphun zongah rel awk a tlâk lomi hmangin kan hnahchuahter hna lai; miphun hrut hna hmangin na thin kan hunter lai,” tiah a ti.

²⁰ Asinain Isaiah nih ralṭha in hitihin a chim. “A ka kawl lomi hmuh in ka um i a ka ko lomi sinah hngalh terin ka um.”

²¹ Asinain hihi Israel mi hna sinah a chim, “Nawl ngai lo le elhnial hmangmi hna caah chun nitlâk in ka kut ka thlir.”