ROM 1 - Laibaibal Thiang (BSI)

¹ Paul, Jesuh Krih ṭemmi sal, lamkaltu si dingin kawhmi, Pathian thawngṭha caah thleidanmi nih,

² A thiangmi Cathiang ah Profet hna hmangin tuanah a rak kamh cangmi,

³ A Fapa kan Bawipa Jesuh Krih, taksa phungin David ci in a hung chuak,

⁴ thianhlimnâk Thlarau phungah thihnâk i a thawhṭhannâk nih Pathian Fapa a si zia thiltikhawhnâk in a phuan.

⁵ Amah min thawngin zumhnâk cu miphun vialte zumhter dingah amah ah zângfahnâk le lamkaltu sinâk kan co,

⁶ cu hna lakah nannih zong Jesuh Krih kawhmi nan si.

⁷ Rom khua i Pathian dawtmi, mithiang si dingin kawhmi vialte sinah Pathian, kan Pa le Bawi Jesuh Krih sin in zângfahnâk le daihnâk nan cungah um ko seh.

⁸ A hmaisa bikah, vawlei vialte ah nan zumhnâk kong a than dih caah nan dihlak cung i kâ lawmhnâk kha Jesuh Krih thawngin ka Pathian sinah ka chim.

⁹ Zeitintiah thla ka camnâk ah ngol loin nan min ka chim tawn ti hi a Fapa thawngṭha, ka thlarau i a rian ka ṭuanpiakmi Pathian cu aka hngalhpitu a si.

¹⁰ Pathian hnatlâknâk in nan sin rat khawhnâk lam a um hnga maw tiah ka nawl tawn.

¹¹ Zeitintiah nan hram a feh khawh nâkhnga thlarau lei thilpêk pe dingin hmuh kan duh hringhran hna.

¹² Cucu nan zumhnâk le ka zumhnâk ṭangṭi in pakhat le pakhat thazâng kan i pêk khawh nâkhnga caah a si.

¹³ Cubangin unau hna, Gentel dang hna sinin theipar ka hmuh cang bangin nan sin zongin ka hmuh khawh nâkhnga nan sin i rat hi voi tampi kâ timh cangnâk kha theihter kan duh hna. (Asinain atu tiang kham ka si ko rih)

¹⁴ Grik mi hna le mi puarthau hna sin zongah leiba ka ngei, mifim le mifimlo hna sin zongah.

¹⁵ Keimah lei ah, nannih Rom khua i a ummi sin zongah thawngṭha chim dingin timhcia ka si.

¹⁶ Krih thawngṭha cu ka zahpi lo, zeitintiah a zummi vialte caah khamhnâk dingah Pathian ṭhawnnâk a si; a hmasa in Judah mi caah a si i Grik mi ca zongah a si.

¹⁷ Zeitintiah cuka ah zumhnâk in zumhnâk lila ah Pathian dinnâk cu langhter a si. “Miding cu zumhnâk in a nung lai,” tiah ṭial a si bangin.

¹⁸ Dinlonâk in biatak lamhchihtu le Pathian-zeirellonâk le dinlonâk vialte cungah Pathian thinhunnâk cu van in langhter a si,

¹⁹ zeicatiah hngalhkhawh a simi Pathian cu anmah ah langhter a si, zeitintiah Pathian nih ansin ah a hmuhsak cang hna.

²⁰ Vawlei ser kain Amah i hmuhkhawh lomi thil kha fiang te i hmuhkhawh in a um i zungzal a ṭhawnnâk le Pathian a sinâk zong sermi thil ah langhter an si, cucaah i silhnalh khawhnâk an ngei lo,

²¹ zeicatiah Pathian an hngal ko nain, Pathian bangin an thangṭhat duh lo, lawmhnâk bia zong an chim duh lo, pakpalawng a simi tu kha an ruat i a hrutmi an lungthin kha muihnâk in a khat.

²² An i fimter ngai nain, mihrut ah an cang,

²³ a thi kho lomi Pathian sunparnâk cu a thi khomi minung le vanva le, ke pali ngei saram le a paw in a lawnmi saram bantuk ah an thlen.

²⁴ Cucaah an taksa kha ningzah awktlâk a simi thilah an hman i an lungthin nih tuah a duhmi thurhnawmhnâk ah i hmang lawlaw dingin Pathian nih hnulei a chit hna.

²⁵ Pathian biatak kha lih ah an thlen i Sertu bia loin sermi kha an biak i a rian kha an ṭuanpiak. Sertu kha pei zungzal i thangṭhat awktlâk a si cu. Amen.

²⁶ Hi ruangah a chia-khâmi hornâk lam zul dingin Pathian nih hnulei a chit hna, annu hna hmanhnih an sining kha siloning ah an thlen.

²⁷ Cubantuk ṭhiamṭhiamin pa zong nih nu he ningcang te i hman ding a simi kaltâkin anmah le anmah an i duh i pa le pa sualnâk an tuah i an hmuh awk â tlakmi dântatnâk kha an hmuh.

²⁸ Pathian kong hngalh kha an duh lo i a niammi ruahnâk ngeih awk le tuah awkah â tlak lomi tiang tuah dingin Pathian nih hnulei a chit hna.

²⁹ Dinlonâk in an khat i nupa sualnâk, suahsualnâk, hakkauhnâk le min chiatter duhnâk in an khat. Hnahchuahnâk, lainawnnâk, i remlonâk, hlennâk, sualnâk lei lawng duhnâk, thlithup biaruah hmannâk,

³⁰ kongceih hmang, Pathian a huatu, mipuarthau, miporhlaw, miruamkai, sualnâk thar chuahtertu, nu le pa nawl a ngai lomi,

³¹ khuaruahnâk a ngei lomi, zumhawk a tlâk lomi, dawtnâk a ngei lomi, zângfahnâk a ngei lomi le zawnruahnâk a ngei lomi an si.

³² Cubantuk thil a tuahtu hna cu thih awkah an i tlâk ko tiah a dingmi Pathian biaceihnâk kha an hngalh ko nain, anmah nih an tuah lawng hmanh si loin midang tuahmi zong kha an hnatlâkpi hna.