PHUNGTHLÛKBIA 8 - Laibaibal Thiang (BSI)

¹ Fimnâk cu a au i theihthiamnâk nih a aw a chuah lo maw?

² Tlângsannâk ah ṭhutnâk â ser i lamkam le lamṭe ah a dir tawn.

³ Khualipi luhnâk kutka hram le, luhnâk innkâ hram hna ah thang ngaiin a au,

⁴ Maw, minung fale hna, kan auh hna hih; ka aw hi minung fale caah a si.

⁵ Aw mi sawsawh hna, fimnâk hi theithiam u, nannih mihrut hna theithiamnâk lungthin hi ngei tuah u.

⁶ Ngaihmanh u, a ṭhabik mi ka chim hna lai i ka kâ chungchuak cu a dikmi an si lai.

⁷ Zeitintiah ka hmurkâ nih biatak a chim lai, suahsualnâk hi ka hmur caah fihnung a si.

⁸ Ka kâ chungchuak bia vialte cu dinnâk an si dih; a ngawimi le â ngerhmi bia zeihmanh a um lo.

⁹ A theithiammi caah a tluangtlam i hngalhnâk a ngeimi caah a dikmi an si.

¹⁰ Phaisa si loin, ka cawnpiaknâk hi cohlang u; a ṭhami sui nâk in hngalhnâk hi i thim deuh u.

¹¹ Zeitintiah fimnâk hi Rubi lungvar nâk in a ṭha deuh; duh bia na phaimi vialte nih a tluk lai lo.

¹² “Kei, fimnâk hi fim ngai in ka um, hngalhnâk le ruahthiamnâk zong ka hmuh hna.

¹³ BAWIPA ṭihzah cu sual huat hi a si; porhlawtnâk le, ruamkainâk, sualnâk lam le biadik lo chimnâk hmur hi ka huat hna.

¹⁴ Remruatnâk le fimnâk taktak hi ka ta an si; theihthiamnâk ka si i ṭhawnnâk ka ngei.

¹⁵ Keimah thawngin siangpahrang hna nih an uk i uktu hna nih dik ngaiin bia an khiah tawn.

¹⁶ Keimah thawngin, uktu hna le, milian hna le, ṭihzahmi hna le, leicung i biaceihtu vialte nih rem an ruat tawn.

¹⁷ Aka dawtu cu ka dawt ve hna i biatak tein aka kawltu hna nih anka hmuh lai.

¹⁸ Rumnâk le upatnâk hi ka sinah a ummi an si, a hmunmi rumnâk le dinnâk a si.

¹⁹ Ka theitlai cu sui nâkin a ṭha deuh, asi, sui thiangmi nâkin a ṭha deuh; cun ka hmuhmi chawva cu a ṭhami ngun nakin a ṭha deuh.

²⁰ Dinnâk le diknâk lamthluan laifang ah ka kal.

²¹ An robawm ka khahter khawh nâkhnga aka dawtu hna cu chawva ka coter hna.

²² “BAWIPA nih hram a rak thawk lio ah khan a ka ngeih diam cang, hlanlio pi i rian a ṭuan hlan ah khan.

²³ Zungzal in dirhmi ka rak si, vawlei a um hlan ah, a hramthawk ah khan.

²⁴ A thûkmi rili a um hlanah ka chuak diam cang, ti hnâ vialte an chuah hlan ah khan.

²⁵ Tlânghna a um hlan le, mual hna a um hlan hmanh ah ka chuak diam cang.

²⁶ Lei le ram hna a ser hlan le, vawlei le leidip hna an um hlan ah khan.

²⁷ Van hna a timhtuah lio ah khan ka um cang i a thûkmi rili cung i hêlnâk lam a ser lio ah khan.

²⁸ Vanrâng i khuadawm a zâmter lio le, a thûkmi rili, a luangmi cerhti thazâng a pêk lio ah khan.

²⁹ Ti nih a nawlpêk an buar nâkhnga lo, rilipi ca i ri a khiahpiak lio ah khan, vulei hram arak bunh lio ah khan.

³⁰ Zungthiammi bangin a pawngah ka rak um i ni chiarte amah lawmhtertu ka si, a pawngah kâ lawm tawn.

³¹ Umnâk ding i a sermi vawlei nih aka lomhter, minung fale hna nih anka lomhter chin chin.

³² “Cucaah ka fale, atu ka bia ngai tuah u; zeitintiah ka lam a zultu hna cu mithluachuak an si.

³³ Cawnpiaknâk hi ngai ulaw, fim tuah u; zeirello in um hlah u.

³⁴ Nichiarte ka innkâ hram in aka hngak i ka innkâ pawngin a rak ka bawh, ka bia a ngaitu cu mithluachuak an si.

³⁵ Zeitintiah aka hmutu pauh cu nunnâk a hmutu an si, BAWIPA duhpiaknâk zong a hmuh tawn.

³⁶ Asinain ka cungah sualnâk a tuahtu nih amah nunnak a hrawh i aka huatu vialte cu thihnâk a dawtu an si.”