PHUNGTHLÛKBIA 3 - Laibaibal Thiang (BSI)

¹ Ka fapa, ka nawlbia hi philh hlah, na lungthin in ka nawlpekmi kha i cinken.

² Zeitintiah cu nih cun nun khua saunâk le daihnâk an in chap chih lai.

³ Vêl le biatak nih in kaltâk hlah seh; nahngawng ah i bah law, na lungthin tlap cungah ṭial hna.

⁴ Pathian le minung hmaiah mithmai ṭha le cawisannâk na hmuh lai.

⁵ Na lungthin dihlakin BAWIPA i bochan law, nangmah theihthiamnâk i rinh hlah.

⁶ Na lam kip ah Amah hngal law, nalam kip ah an hruai lai.

⁷ Nangmah mithmuh ah i fimter hlah, BAWIPA ṭih law sual kaltâk.

⁸ Na taksa caah ngandamnâk a si lai i na ruh caah ṭhawnnâk a si lai.

⁹ Na ngeihmi hna he BAWIPA upat law, na hmuh hmasa bik le theitlai hmasa bik hna he.

¹⁰ Cuticun na buh in cu an khat lai i na misur nennâk khor misur thar in a khat lai.

¹¹ Ka fapa, BAWIPA chimhrinnâk kha zeirel loin um hlah, asiloah a nunchimhnâk cu duh loin um hlah.

¹² Zeitintiah pa nih a lawmhmi fapa nun a chimh bantukin, BAWIPA nih a dawtmi kha nun a chimh tawn hna.

¹³ Fimnâk a hmutu cu lunglawmmi a si i theihthiamnâk a ngeimi zong lunglawmmi a si.

¹⁴ Zeitintiah ngun karhter luaimaimi nâkin a ṭha deuh i a ṭhami sui nâkin a ṭha deuh.

¹⁵ Lungvar nâkin a sunglawi deuh i duhbia na phaimi vialte zong nih an tluk lo.

¹⁶ A orhlei kut ah nunsaunâk a um i a kehlei kutah chawva le upatnâk a um.

¹⁷ Alam hna cu lamnuam an si i a lamthluan vialte cu daihnâk an si.

¹⁸ Â tlaihtu hna caah nunnâk thingkung a si i â nunpimi vialte cu lunglawmmi an si.

¹⁹ BAWIPA nih fimnâk in vulei hi a dirh i theihthiamnâk in van khi a fehter hna.

²⁰ A hngalhnâk in rili a ṭhen hna i khuadawm nih dai a tlakter.

²¹ Ka fapa, fimnâk dik le ruahthiamnâk kha i tlaih law, namit nih chuahtâk hna hlah seh.

²² Cuticun na thlarau caah nunnâk a si lai i nahngawng caah zângfahnâk a si lai.

²³ Cuticun nalam ah him tein na kal lai i na ke zong nâ chuih lai lo.

²⁴ Na ih tikah na ṭih lai lo, asi, mitkuh thaw tein nâ hngilh lai.

²⁵ ṭih a nungmi launâk zong ṭihhlah, asiloah misuaksual hna tonmi buainâk zong ṭih hlah.

²⁶ Zeitintiah BAWIPA cu na himnâk a si lai i nake cu rap chungin a himter lai.

²⁷ Tuah ding i ṭhawnnâk na kut i a um ko lio ah, hmuh awkah â tlakmi hna cungah thilṭha siang loin um hlah.

²⁸ Pêk awk naput ko lio ah, “Kal law, ra ṭhân te, thaizing ah kan pêk te lai,” tiah na innpa sinah ti hlah.

²⁹ Na innpa sinah thil ṭhalo tuah i tim hlah, zeitintiah nangmah kilvennâk in a ummi a si.

³⁰ A chan um lo in ahohmanh ralchanh hna hlah, fahnâk zeihmanh an pêk lo ahcun.

³¹ Mi nunchia hna hngar hna hlah, anlam zong i thim hlah.

³² Zeitintiah mi nunchia hna cu BAWIPA caah fihnung an si, asinain a nunchimhnâk biathli cu midik caah a si.

³³ Misuaksual inah BAWIPA chiatserhnâk a um, asinain midik hna inn tu cu thluachuah a pêk hna.

³⁴ Zomhtaih a hmangmi cu a zomhtaih hna i toidormi cu zângfahnâk a pêk tawn hna.

³⁵ Mifim nih sunparnâk ro an co lai i mihrut hna coding cu ningzahnâk a si.