PHUNGTHLÛKBIA 18 - Laibaibal Thiang (BSI)

¹ Mahlawng i a ummi nih amah duhnâk lawng a kawl i a fimmi biaceihnâk vialte kha a ralchanh tawn.

² Mihrut nih theihthiamnâk ah lawmhnâk a ngei lo; asinain amah lungthin lawng kha a langhter tawn.

³ Misual a phâk tikah, zohchuknâk zong a phân cawlh ve, mualphonâk zulhin chimhhrinnâk zong a um ve.

⁴ Minung kâ in a chuakmi bia cu a thûkmi ti bantuk a si, fimnâk tikhor hram tu cu tiva bangin a luang thliahmah tawn.

⁵ Misuaksual duhsak hi a ṭha lo, biaceihnâk i miding hna diknâk hlawnhpiak zong a ṭha lo.

⁶ Mihrut hmurkâ in siknâk a chuahter i a hmurkâ chuak nih tuknâk a chuahter.

⁷ Mihrut hmurkâ cu amah rawhnâk a si i a hmur zong a caah rap a si.

⁸ Biathli phuangtu hna bia cu a thaw ngaimi rawl bantuk an si i lungthin chungmuru tiang a phân tawn.

⁹ A rian ah a tha a thumi cu, hrawktu lianngan unau pa a si.

¹⁰ BAWIPA min cu a fekmi ralhruang a si, miding cu a lut i a him tawn.

¹¹ Mirum ralhruang cu a chawva kha a si i amah ruahnâk ah a sangmi kulhnâk bantuk a si.

¹² Chiatnâk ton hlanah minung lungput cu a sang tawn i upatnâk a ton hlanah â toidor tawn.

¹³ Ngaih hlan i bialeh hmangmi cu a caah hruh le mualphonâk a si.

¹⁴ Minung thlarau hi zawtlio zongah a kan tlaitu a si i thlarau kehkuai cu ahodah a tuar kho lai?

¹⁵ Khuaruat ngaimi nih hngalhnâk a co chih tawn, cun mifim hna nih hngalhnâk an kawl chap tawn.

¹⁶ Laksawng pêk nih lam a sial kho ngai i mi lianngan hmaiah a phâkpi tawn.

¹⁷ Amah suallonâk kong a chim hmaisatu cu a dik deuhmi bangin a lang tawn, amah bia leh awk ah a inn an phâk hlan tiangin.

¹⁸ Camcawh fung zuhnâk nih elhnialnâk a donghter tawn i mi ṭhawng hna karlak a daihter tawn.

¹⁹ Unau lungtlinter lo cu a ṭhawngmi khualipi tei nâkin a har deuh, bia-alnâk hi thir i i kulhchih bantuk a si.

²⁰ Na hmurkâ chuak theipar nih na paw a khimter lai, na hmurkâ chuak ning tein na khahter lai.

²¹ Nunnâk le thihnâk cu lei ṭhawnnâk ah a ummi a si, a dawtu hna nih a theipar an zun lai.

²² Nupi a hmutu cu thilṭha hmutu a si, BAWIPA duhpiaknâk cotu a si.

²³ Misifak nih a nawl in a nawl i mirum nih a hro in an hro tawn.

²⁴ Hawikawm ngeitu cu, kawmh a nuammi a si ve awk a si, asinain unau nâkin a nai deuhmi hawikawm an um.