MATTHAI 4 - Laibaibal Thiang (BSI)

¹ Cuhnuah Jesuh cu khuachia nih rak tukforh dingin Thlarau nih ramcar ah a hruai.

² Ni sawmli le zan sawmli rawl a ulh hnu ah a rawl a ṭâm.

³ Tukforhtu cu a ra i, “Pathian Fapa na si ahcun, hi lung hi changreu i cang dingin nawl pe hna ngat,” tiah a ti.

⁴ Anih nih, “Minung hi rawl lawngin a nung lai lo, Pathian kâ in a chuakmi bia in a nung deuh lai, tiah ṭial a si,” tiah a leh.

⁵ Cu hnu ah khuachia nih khawthiang chungah a kalpi, ṭempal zimah a chiah i

⁶ A sinah, “Pathian Fapa na si ahcun vung zuang tuah, “Zeitintiah nangmah kongah a vanmi a thlah hna lai i na ke lungah nâ khawn nâkhnga lo an kutin an in cawi lai,’ tiah ṭial a si,” tiah a ti.

⁷ Jesuh nih, “BAWIPA na Pathian na hneksak lai lo,” tiah, ‘ṭial a si kha,’ tiah a ti.

⁸ Khuachia nih a sâng ngaimi tlângcung ah a kalpi ṭhân i hi vulei pennâk le a sunparnâk vialte kha a hmuhsak.

⁹ Cun a sinah, “Bawk in naka biak ahcun, hi vialte hi kan pêk lai,” tiah a ti.

¹⁰ Jesuh nih, “Satan, lo ko in tli! ‘Zeitintiah BAWIPA na Pathian bia law, Amah rian lawng lawng va ṭuan,’ tiah ṭial a si,” tiah a ti.

¹¹ Cuhnuah khuachia nih Amah cu a kaltâk i zohhmanh, vancungmi kha ra in an zohkhenh.

¹² Johan kha thongah thlâk a si ti kha Jesuh nih a theih tikah, Galili ah a kal.

¹³ Nazaret kha chuahtâk in Zebulun Naphtali peng rili kamah a ummi Kapernaum ah a phân i khua a sa.

¹⁴ Cucu Profet Isaiah nih a rak chim chungmi,

¹⁵ “Zebulun le Naphtali ram, rihli panhnâk lam, Jordan va ral i a ummi Galili Gentel hna;

¹⁶ Muihnâk chung i a ummi hna nih a liannganmi ceunâk an hmuh i thihnâk thladem tang i a ummi hna sinah ceunâk a chuak cang” timi a tlin nâkhnga caah a si.

¹⁷ Cu cân thawkin Jesuh nih, “I ngaihchih u, vanbawi pennâk cu a nai cang” tiah chim hram a thawk.

¹⁸ Jesuh cu Galili rili pawng i â chawh lio ah, unau pahnih Simon Peter timi le a nau Andria sur an vorh lio kha a hmuh hna; annih cu ngatlaitu an si.

¹⁹ Cuticun an sinah, “Ka zul u law ngatlaitu in minung tlaitu ah kan ser hna lai,” tiah a ti.

²⁰ An sur kha kaltak in an zulh cawlh.

²¹ Cuka cun a kal i unau dang pahnih, Zededi fapa Jeim le Johan anpa Zebedi he tilawng chung i sur an thlawp lio kha a hmuh hna i annih zong a kawh hna,

²² an tilawng le anpa kha hmakhat teah kaltâk in an zulh.

²³ Jesuh nih an sinagog ah cawnpiak in pennâk thawngṭha kha chim in, zawtnâk le fahnâk phunkip chungin mizapi kha damter in Galili ram vialte kha a ṭol.

²⁴ Cuticun a thawngpang cu Siria ram vialte ah a thang; zawtnâk le fahnâk phunkip a tuarmi kha an ratpi hna, cheukhat cu khuachia tuahmi, mitlu le mizeng an si i arak damter dih hna.

²⁵ Galili ram, Dekapoli, Jerusalem, Judia ram le Jordan tiva ral tiangin mibu tampi an ra i Amah kha an zulh.