MATTHAI 28 - Laibaibal Thiang (BSI)

¹ Sabbath ni a liam i zarhkhat chung ni hmasa bik khua a dei dengmang ah khin Mary Magdalin le Mary dang kha thlân zoh dingin an kal.

² Ngaihmanh, li fakpi in â hnin i Bawipa vancungmi van in a rung`um, thlân inkâ in lung kha a hrilh i a cungah a ṭhu.

³ A mui langhning cu nimtlau bantuk a si i a hnipuan cu hawhra bantukin a râng.

⁴ Vengtu hna cu an ṭih tukah an ther i mithi bangin an um.

⁵ Vancungmi nih nu hna sinah, “Nannih cu ṭih hlah u, Jesuh, an khenhchihmi kha nan kawl, ti kha ka hngalh.

⁶ Hika ah a um ti lo, Arak chim cang bantuk te khan a thoṭhân cang. Ra ulaw, Bawipa an vuinâk hmun hi rak zoh hmanh u, tiah a ti hna.

⁷ Cun khul rangin kal ulaw, A lamkaltu hna sinah, “Thih nâkin a tho ṭhân cang, Galili ramah nan hmaiah a kal, cuka ah nan hmuh lai,” tiah va chim hna u. Ngaihmanh u, kan chimh cang hna hi” tiah a ti.

⁸ Cuticun ṭih le lawmhnâk nganpi he thlân in an kal i lamkaltu hna chimh awkah a tlik in an tli.

⁹ Cun a lamkaltu hna chimh awk i an tlun lio ah, zohhmanh, Jesuh nih arak ton hna i “I lawm u” tiah a ti. Annih nih ake i tlaih in an biak.

¹⁰ Jesuh nih, “Ṭih hrimhrim hlah u, kal ulaw, Galili ram i kal dingin ka unau kha va chim hna u, cuka ah cun anka hmuh lai,” tiah a ti.

¹¹ Cu ti an kal lioah, zohhmanh, vengtu ralkap cheukhat cu khawpi chungah an lut i tlângbawi hna sinah thil umtuning vialte kha an chimh dih hna.

¹² Annih cu upa hna he an i tong i an i ceih hnu ah, ralkap hna sinah phaisa tampi an pêk hna,

¹³ “Zan i kan i hngilh lio ah, a zultu an ra i Amah kha an fir, nan ti hna lai.

¹⁴ Cun hi thawng nih Mangki bawi sin a phâktik zongah, alung kan daihter lai, nannih zong him tein nan um ko lai,” tiah an ti.

¹⁵ Cuticun phaisa cu an i lâk i an chim ning tein an tuah, cu bia cu atu tiangin Judahmi hna lakah chim a dai lo.

¹⁶ Lamkaltu hleikhat hna cu Galili ramah, Jesuh nih a rak timhmi tlângah an kal.

¹⁷ Amah an hmuh tikah an biak i cheukhat an lung a hring.

¹⁸ Cun Jesuh cu an sinah rain bia a chimh hna, “Lei le van i nawlngeihnâk vialte ka sinah pêk a si cang.

¹⁹ Cucaah kal ulaw, miphun kip kha ka zultu va siter hna u, Pa le Fapa le ThiangThlarau minah Baptisma pe hna u law,

²⁰ nawl kan pekmi vialte an zulh nâkhnga cawnpiak hna u; cun zohhmanh u, Kei, a zungzal in, vawlei dongh tiangin nan sinah ka um peng lai,” tiah a ti. Amen.