MATTHAI 27 - Laibaibal Thiang (BSI)

¹ Zingkâ te ah, tlângbawi upa hna le zatlâng upa hna kha Jesuh thahnâk ding khua khângin an i tong.

² Amah cu an ṭem hnuah an kalpi i Mangki bawi Pailat sinah an pêk.

³ Amah rawitu Judas nih Jesuh thiamlo an coter ti a hngalh tikah â ngaihchih i phaisa sawmthum kha tlângbawi le upa hna sinah a ratpi,

⁴ “Sualnâk a ngei lomi thisen ka rak rawi kha ka sual,” tiah a ti. Annih nih, “Cucu kan zeidah poi, nangmah nawl pei a si ko cu,” tiah an rak ti.

⁵ Ngun tangka cu ṭempal chungah a va hlawnh, a kal i ai awk.

⁶ Tlângbawi hna nih ngun tangka cu an lâk i, “Hihi tangka chiah nâkah chiah a ṭha lai lo, zeicatiah thisen man a si,” tiah an ti.

⁷ An i caih`i hnu ah, khual phumnâk dingah ûmsertu hna hmun kha an cawk.

⁸ Cucaah dah kaw, cu hmun cu atu tiangin, ‘Thisen hmun’ tiah an kawhnâk a si cu.

⁹ Cuticun Profet Jeremiah nih a rak chim chungmi kha a hung tling.

¹⁰ Hi ti hin a rak chim. ‘Ngun tangka sawmthum an lâk i a manah an ruah, Israel fale mi zei maw nih a man caah an ruahmi kha, an lâk i ûmsertu lo cawk nâkah an hman. Cucu Bawipa nawlpêk ning a si.”

¹¹ Cuticun Jesuh cu Mangki bawi hmaiah a dir i Mangki bawi nih, “Judah Siangpahrang na si maw? tiah a hal. Jesuh nih, “Na chimning te cun a si ko,” tiah a ti.

¹² Tlângbawi hna le upa hna nih lih in a sual an kawl lio ah kâ khat hmanh in a let hna lo.

¹³ Cuhnuah Pailat nih, “Na sual an kawlnâk vialte hi na thei lo maw? tiah a ti.

¹⁴ Asinain kâ khat hmanh a let lo, Mangki pa cu a khuaruah a har ngai ngai.

¹⁵ Mangki bawi nih Thô ni ah thongtla pakhat mizapi nih an duhmi kha a chuahpiak tawn hna.

¹⁶ Culio ah a min a thang ngaimi thongtla, Barabbas timi an ngei.

¹⁷ Cucaah an rak i pumh tikah Pailat nih an sinah, “Ahodah in chuahpiak hna ning law nan duh? Barabbas maw, Jesuh, Krih an timi dah? tiah a ti.

¹⁸ Zeitintiah hnahchuah ruangah an tlaihmi a si kha a hngalh.

¹⁹ Biaceihnâk ṭhutdanh i a ṭhut lioah a nupi nih, “Kha miding pa kha zeiti hmanh in rak ti hlah, nihin ah Amah ruangah ka mangin thil tampi ka tuar,” tiah bia a cah.

²⁰ Asinain tlângbawi hna le upa hna nih Barabbas chuahter i Jesuh hloh dingin mipi an rak lêm khawh cang.

²¹ Mangki bawi nih a hei chawnh ṭhân hna i, “Annih pahnih lakah hin aho deuh dah chuahpiak nan duh?” tiah a ti. Annih nih, “Barabbas” tiah an ti.

²² Pailat nih an sinah, “Jesuh, Krih an timi hi zeitindah ka tuah kun lai?” tiah a ti. An dih lakin, “Khenhchih ko” tiah an ti.

²³ Mangki pa nih, “Zeiruangah, zei sualnâkdah a tuah?” tiah a ti. Annih nih, “Khenhchih ko” tiah an au.

²⁴ Pailat nih, zeitihmanhin dan khawh a si ti lo ti kha a hmuh i a buai chin chin lai ti kha a hmuh tikah, ti â lak i mizapi hmaiah a kut â ṭawl. “Hi miding thisen ah hin ka thiang. Nanmah thu si seh,” tiah a ti.

²⁵ Mi vialte nih, “A thisen mawh cu kanmah le kan fa le cungah tla ko seh,” tiah an leh.

²⁶ Cuticun Barabbas cu a chuahpiak hna i Jesuh cu a velh hnuah, khenhchih awkah a pêk hna.

²⁷ Cuhnuah mangki bawi ralkap hna nih Jesuh cu mangki bawi innpi chungah an kampani dih lakin an dûm.

²⁸ A puan an phoih piak i angki sen an aihter.

²⁹ Hling luchin an tuah i alu ah an chinh. A orhlei kutah thluang kung an putter. A hmaiah an khuk an i bil i Judah siangpahrang, sau piin nung seh, tiah nichuak saih nâkah an hman.

³⁰ Amah cu cil an châk i hluang fungin an tuk,

³¹ An cawhdeh hnu ah, a angki an phoih i Amah angki kha an ngaihter ṭhân i khenhchih dingin an kalpi.

³² An chuah lio ah, Sairin khua mi Simon kha an hmuh, cupa cu a vailam put piaktu ah an tlaih.

³³ Golgotha an timi hmun kha an phân, cucu Luruh hmun tinâk a si,

³⁴ Misur hang, thilkhâ he cawhmi din awkah an pêk, asinain a hun tep i a ding duh lo.

³⁵ Cuhnuah an khenhchih i a hnipuan kha camcawh fung zukin an i phaw. Profet nih, “Ka hnipuan an i phaw i ka angki caah camcawhfung an zuh,” tiah a rak timi a tlin nâkhnga caah a si.

³⁶ Cuka ah ṭhut buin Amah cu an congh.

³⁷ Cun Alu cungah sual an phawtnâk ca, “HIHI JESUH, JUDAH MI HNA SIANGPAHRANG A SI” timi an tar.

³⁸ Amah sinah damiah pahnih a orh leiah pakhat a keh leiah pakhat an khenhchih.

³⁹ Cuka pawng i â chawk letmi hna nih an lu an thin hnawh i

⁴⁰ “Nang, ṭempal ṭhet i nithum chungah a sa ṭhân khotu, i damter ngat! Pathian Fapa na si lo mei, vailamtahnâk cung khan rung ṭum ngat,” tiah an serhsat.

⁴¹ Cubangin tlângbawi hna le nawlbiacawnpiaktu hna le upa hna zong nih diriam ngai in,

⁴² midang a damter ko nain, Amah le Amah â damter kho ṭung lo, Israel Siangpahrang a si taktak ahcun, vailam in rung ṭum sehlaw, kan zumh ko hnga.

⁴³ Pathian a zumh a si lo maw, a duh ahcun atu hrimhrim ah hin run khamhseh. Pathian Fapa ka si, â ti fam cu ta,” tiah an ti.

⁴⁴ Damiah an khenhchih mi hna zong nih cubantukin an nihsawh ve.

⁴⁵ Chun suimilam hleihnih in zanlei pathum tiang khua a mui dih.

⁴⁶ Zanlei pathum hrawngah Jesuh cu aw thang piin, “Eli, Eli, Lama sabakthani” tiah a au. Cucu, “Ka Pathian, Ka Pathian, zeicadah na ka kaltâk?” tinâk a si.

⁴⁷ Cuka i a dirmi cheukhat nih cucu an theih tikah, “Elijah a auh a si cu,” tiah an ti.

⁴⁸ Hmakhatteah an lak i mi pakhat a va tli i misur thor puanchia ah a ciahmi kha fungparah a ṭem bawh i a dinter.

⁴⁹ Midang nih, “Um ko seh, Amah khamh awkah Elijah a ra maw, ra lo, kan zoh hnik lai,” tiah an ti.

⁵⁰ Jesuh cu thang ngaiin a au ṭhân i a thlarau a thlah.

⁵¹ Cuticun zohhmanh, ṭempal puangzar kha a cung leiin a tanglei tiang a tlekdih, li â hnin i lungpi kha an kuai,

⁵² thlân kha an i ong i mithiang tampi â hngilhmi hna an pum kha thawhter an si.

⁵³ Cuhna cu, a thawhṭan hnuah thlân in an chuak i khua thiang ah an lut i mi tampi sinah an i lang.

⁵⁴ Cuticun ralbawipa le a sin i Ralkap a um vemi hna nih thil umtuning an hmuh tikah an ṭih ngaingai. Hipa hi Pathian Fapa a si hrimhrim ko, tiah an ti.

⁵⁵ Cuka ah nu tampi, Galili in Amah rian ṭuan piakin a rak zultu hna nih lamhlat nawn in an cuanh,

⁵⁶ cu hna lakah, Mary Magdalin, Jeim le Joses nu, Mary, le Zebedi fapa le annu le an si.

⁵⁷ Zanlei a si tikah, Arimathia khua mi, mirum a min Josef Jesuh hnuzul a simi kha a ra.

⁵⁸ Cu pa cu Pailat sinah a kal i Jesuh ruak kha a hal. Pailat nih a ruak kha laknâk nawl a pêk.

⁵⁹ Josef nih aruak cu a lâk i khiangrâng a thiangmi in a tuam i

⁶⁰ amah thlân thar, lung a khermi ah a vui. Thlân inkâ ah lung nganpi in a khar i a kaltâk.

⁶¹ Cuka ah Mary Magdalin le Mary dang kha an um ve, thlân hmai lei ah an ṭhu.

⁶² A thaizing ah, cucu zarhte ni a dih zing a si, tlângbawi hna le Farasih hna cu Pailat sinah an i pum i

⁶³ “Ka pu, kha mihlengtu nih khan a nun lioah, nithum hnuah ka tho ṭhân lai, tiah a chimmi kan theih.

⁶⁴ Cucaah thlân cu nithum tiang veng dingin nawl pe tuah, culoahcun a zultu hna zanah ra in Amah kha an fir lai i mizapi sinah, ‘Thihnâkin a tho ṭhân cang’ an ti lai i hlennâk hmadung cu hlennâk hmasanâk khan a zual deuh lai,” tiah an ti.

⁶⁵ Pailat nih, “Vengtu ralkap nan ngei a si lo maw? vakal ulaw, a himkhawhnâk ding nan hngalh ning ṭha bikin va venter ngat u,” tiah a ti hna.

⁶⁶ Cuticun an kal i thlân cu him tein an ser. Lung kha hmel an chunh i kilvengtu ralkap kha an venter hna.