MATTHAI 26 - Laibaibal Thiang (BSI)

¹ Cubangin cu bia vialte a chimh hna hnu ah, Jesuh nih a lamkaltu hna sinah,

² “Nihnih hnu ah Lanhtâk Thô a um lai tiah nan theih, Mi Fapa hi khenhchih dingah an tlaih lai” tiah a ti.

³ Cuticun tlângbawi Ngan bik Kaiafas timi innah tlângbawi upa hna le nawlbiacawnpiaktu hna le zatlang upa kha an i pum;

⁴ Jesuh cu hlenthawinâk hmangin tlaih i thahnâk ding khua an khâng.

⁵ Asinain thô lio ah cun sihlah seh, zeicatiah zatlâng sinah buainâk a chuak sual lai, tiah an ti.

⁶ Cun Jesuh cu Betheni khua i thinghmui Simon inn i a um lio ah,

⁷ minu pakhat lungrang thawlin a man a fak ngaimi zihmui i put in a sinah a ra, rawl an ei lio ah a lu ah a toih.

⁸ Asinain lamkaltu nih an hmuh tikah an thin a hung i, “Zeiruangahdah hibantukin a sawksâm hnga.

⁹ Zeitintiah hi zihmui hi man tampi ah zuar i misifak hna pek khawh a si, tiah an ti.

¹⁰ Jesuh nih cucu a theih tikah, “Minu hi zeicadah hna nan hnawh? Ka cungah thilṭha ngai a tuahmi a si.

¹¹ Zeitintiah mi sifak cu nan sinah an um peng ko lai, Kei tu cu nan sinah sau ka um ti lai lo.

¹² Zeitintiah hi zihmui aka tawihmi hi phum awkah a ka timhlamhnâk a si.

¹³ Biataktein kan chimh hna, vawlei khuazakip i Thawngṭha an chimnâk pauh ah hi minu tuahmi hi amah philhlonâk caah an chim ve lai,” tiah a ti hna.

¹⁴ Cuhnuah hleihnih hna lak i pakhat Judah Iskariot an timi cu tlângbawi upa hna sinah a kal i

¹⁵ “Amah cu in tlaihter hna ning law, zeidah nan ka pêk lai,” tiah a va ti hna. Cuticun phaisa sawmthum pêk an timh.

¹⁶ Cucân thawk in tlaihternâk cân rem lawng a ngiat cang.

¹⁷ Thilnu cawhlo changreu einâk Thô ni hmaisa bikah Lamkaltu kha Jesuh sinah an ra i “Lanhtâk Thô rawl einâk dingah khuazeiahdah timh piak na duh,” tiah an ti.

¹⁸ Anih nih, “Khuapi ah mi pakhat sinah kal ulaw, Cawnpiaktu nih, ka cân a nai cang; ka Lamkaltu hna he, Lanhtâk Thô na inn ah kan tuah lai, a ti, tiah nan va ti lai,” tiah a ti hna.

¹⁹ Jesuh nih tuah awkah a chimh hna bantuk tein lamkaltu hna nih an tuah i Lanhtâk Thô rawl cu an timh lamh.

²⁰ Zanlei a si tikah, hleihnih hna he rawl cu an dûm;

²¹ Rawl an ei lioah, Biataktein kan chimh hna, nanlak i mi pakhat nih a ka rawi lai,” tiah a ti.

²² Cuticun an ngaih a chia i a sinah, pumpâk cio in, “Bawipa, keimah maw ka si,” tiah an ti cio.

²³ Anih nih, “Ka kheng ai hrawmmi pa nih a ka rawi lai,” tiah a leh hna.

²⁴ Mi Fapa hi a kong an rak ṭial bantuk te khan a kal lai. Asinain Mi Fapa a rawitu cungah chiat tlung ko seh! cu minung cu chuak loin rak um sehlaw a caah a ṭha deuh lai,” tiah a ti.

²⁵ Cuticun a rawitu ding Judas nih a leh i, “Rabbi, keimah maw ka si? tiah a ti. Anih nih a sinah, “Na chim cang cu ta,” tiah a ti.

²⁶ Rawl an ei lioah Jesuh nih changreu a lâk i thluachuah a pêk, a cheu i lamkaltu hna sinah a pêk, “La u law, ei tuah u; hihi ka pum a si,” tiah a ti.

²⁷ Hrai zong kha a lâk i lawmhnâk bia chimin an sinah a pêk i “Nan dih lakin ding tuah u.

²⁸ Zeitintiah hihi ka thisen i biakam thar, mi tampi sual ngaihthiamnâk ca i a chuak hngami cu a si.

²⁹ Asinain kan chimh hna, “Ka Pa pennâk ah nanmah he a thar in ka din cân a phanh hlan lo, atu riin misur hang hi ka ding ti lai lo,” tiah a ti.

³⁰ Cun hla an sak dih in an chuak i Olive tlângah an kal.

³¹ Cuticun Jesuh nih, “Tuzan ah hin nan dih lakin keimah ruangah nan tlu dih lai, hitihin ṭial a rak si cang. ‘Tukhal cu ka velh lai i Tuu run kha an i ṭhek dih lai’ tiah a ti hna.

³² Asinain thawhter ka si hnu ah Galili ramah nan hmaiah ka kal lai,” tiah a ti.

³³ Peter nih, “An dih lakin nangmah ruangah tlu hmanh hna sehlaw, kei cu kan tluktâk bal lai lo,” tiah a leh.

³⁴ Jesuh nih, “Biataktein kan chimh, tuzanah ar a khuan hlanah voithum naka hlawt lai,” tiah a ti.

³⁵ Peter nih, “Na thih nâkah thiding ka si hmanhah kan hlawt hrimhrim lai lo,” tiah a ti. Lamkaltu vialte zong nih cubantukin an ti cio.

³⁶ Cun Jesuh cu annih hna he hmun pakhat Gethsemani an timi kha an phân, A Lamkaltu hna sinah, “Khika i thla ka cam chung hi ka ah hin rak ṭhu u,” tiah a ti.

³⁷ Peter le Zebedi fapa pahnih hna kha â kalpi hna i a ngaih a chia i a awlok a chong ngaingai.

³⁸ Cuticun an sinah, “Ka ngaih a chia tuk hringhran i thihpi tlâk a si. Hika ah hin um ulaw, ka ven pi u” tiah a ti hna.

³⁹ Hmailei ah tlawmpal a kal i a bawk, “Maw Ka Pa, a si khawh ahcun, hi hrai nih ka lanhtâk ko seh. Asinain keimah thu si loin, nangmah thu si seh, tiah thla a cam.

⁴⁰ Cuhnuah a Lamkaltu sinah a ra, annih cu an rak i hngilh i Peter sinah, “Ai ze,’ suimilam pakhat hmanh naka veng kho lo maw?

⁴¹ Tukforhnâk i nan luh nâkhnga lo, ralring tein thlacam tuah u. Thlarau nih cun a tlinh ko, titsa bel nih a zo lo, tiah a ti.

⁴² A voihnihnâk ah a va kal ṭhân i “Maw ka Pa, hi hrai hi din loin aka lanhtâk khawh lo ding a si ahcun, nangmah thu si ko seh,” tiah a ti.

⁴³ A rak kir ṭhân tikah annih cu an rak i hngaih ṭhân. An mit a ku tuk hring hran.

⁴⁴ A kaltâk ṭhân hna i a chim ciami chim ṭhânin a vawi thumnâk thla a cam ṭhân.

⁴⁵ Lamkaltu sin a rak kirṭhân tikah an sinah, “Atu tiangin nan it i nan i din ko rih mu? Ngaihmanh u a cân a nai cang. Mi Fapa hi misual hna kutah phâkter a si cang lai.

⁴⁶ Tho ulaw kal u sih. Zohhmanh u, a ka rawitu cu a nai tuk cang” tiah a ti hna.

⁴⁷ Cuti i a chim lioah, zohhmanh, Judas, hleihnih hna lak i mi pakhat kha tlângbawi upa hna le zatlâng upa hna sinah a rami mibu hna he, vainam le tanbo he an rak phân.

⁴⁸ A rawitu nih, “Ka hnamhmi pauh kha Amah a si lai i nan tlaih lai,” tiah hmelchunhnâk a rak pek cang hna.

⁴⁹ Jesuh cu ava panh cawlh i, “Daihnâk, Rabbi!” tiin a hnamh.

⁵⁰ Jesuh nih a sinah, “Ka kawi, zeiruangahdah na rat?” tiah a ti. Cuticun an ra i Jesuh kha an tlaih i an kalpi.

⁵¹ Hmakhatteah, Jesuh sin i a ummi pakhat nih a kutin vainam â phoi i tlângbawi Nganbik sinum pa kha a hna pet lakin a tuk.

⁵² Asinain Jesuh nih, “Na vainam kha a kawngah sawh ṭhân, zeitintiah vainam a hmangmi vialte cu vainam in a thi te lai.

⁵³ Asiloah atu zongah hin vanmibu tampi bu hleihhnih nâk tam run thlah cawlh dingin ka Pa sinah a hal kho lo tiah maw, na ruah?

⁵⁴ Hei hal ning law, zeitindah Cathiang nih hibantuk thil a tlungte lai a timi cu a tlin khawh kun lai? tiah a ti.

⁵⁵ Cu lio ah Jesuh nih mizapi sinah, vainam le tanbo i put in damiah tlaiding bangin nan rak pok maw? Nichiarte ṭempal ah ka cawnpiak hna i nanka tlai fawn lo.

⁵⁶ Asinain Profet hna chimmi kha a tlin khawh nâkhnga hi thil vialte a rak umnâk hi a si,” tiah a ti. Cu lio hrimhrim ah lamkaltu vialte nih Amah lawng umter in an zâm tâk dih.

⁵⁷ A tlaitu hna nih Jesuh cu nawlbia cawnpiaktu hna le zatlang upa hna an i pumhnâk hmun, Tlângbawi Nganbik Kaiafas inn ah an kalpi.

⁵⁸ Peter zong nih lamhlat nawn in a zulh ve i tlângbawi nganbik tualrawn a phân ve. A va lut ve i a donghtiang thil umtuning hngalh awkah sinum hna sinah a um.

⁵⁹ Tlângbawi ngan hna le, upa hna le biaceihtu vialte hna nih an thah khawh nâkhnga lih in sualphawtnâk an kawl,

⁶⁰ asinain an hmu lo. Lihchimmi tehte tampi an hung chuak nain an hmu kho hlei lo. A hnu ah lih tehte pahnih an rak chuak i

⁶¹ “Hipa nih hin Pathian ṭempal hi `hetin nithum chungah ka sak khawh lai,” a ti, tiah an ti.

⁶² Tlângbawi nganbik cu a rak dir i “Kâ khat hmanh in na let hna lo maw” Hi hna nih sual a nin puhmi hi zeidah a si? tiah a ti.

⁶³ Asinain Jesuh cu dai tein a um. Tlângbawi ngan bik nih, “Pathian nung chalh in nawl kan pek, Krih, Pathian Fapa cu na si maw, kan chim tuah? tiah a ti.

⁶⁴ Jesuh nih, “Na chimning kha a si ko. Asinain kan chimh, tu hnu ah Mi Fapa hi Thiltikho orhlei kam i a ṭhut le, van in khuadawm lak i a rat kha na hmuh lai,” tiah a ti.

⁶⁵ Tlângbawi nganbik nih a hnipuan kha a thleh i “(Pathian) a cawhdeh cang! Tehte dang kan herh ti hnga maw? Zohhmanh u, (Pathian) cawhdehnâk bia nan theih cang kha!

⁶⁶ Zeitindah nan ruah? tiah a ti. Annih nih, “Thih awkah â tlâk,” tiah an leh.

⁶⁷ A hmaiah cil an châk i an tuk, cheukhat nih bengh pahin,

⁶⁸ “Nang, Krih nih kan chim ngat,’ Ahonihdah an bengh? tiah an ti.

⁶⁹ Cu cân ah Peter cu kulhmi tualrawn chungah a ṭhu. Sinum ngaknu pakhat hi a pawngah a ra i “Nangzong hi Jesuh sin um Galili mi na si,” tiah a ti.

⁷⁰ Asinain an dihlak hmaiah, “Na chimmi cu ka hngal hrimhrim lo, tiah a hlawt.

⁷¹ Cun in kulhnâk hau i a chuah lioah, ngaknu dang nih a rak hmuh i a pawngkam i a ummi hna sinah, hipa zong hi Nazareth Jesuh pawng i a um tawnmi a si,” tiah a ti.

⁷² Asinain chiatserh in, “Cu mipa cu ka hngal lo ê,” tiah a hlawt ṭhân.

⁷³ Cân tlawmpal hnu ah a pawng i a dirmi hna nih, Peter sinah, “Nangzong an lak i â telmi na si ve ko; na aw cawiin hngalh khawh a si,” tiah an ti.

⁷⁴ Cuticun chiat i serh in, “Cu minung cu ka hngal hrimhrim lo,” tiah a ti i ar a khuang cawlh.

⁷⁵ Peter nih, “Ar khuan hlanah, voithum naka hlawt lai,” tiah Jesuh nih a rak chimmi kha a hun hngalh tikah, lêngah a chuak i a ṭap thluah mah.