MATTHAI 23 - Laibaibal Thiang (BSI)

¹ Cuticun Jesuh nih a lamkaltu le mizapi sinah bia a chim i

² “Nawlbiacawnpiaktu le Farasih hna cu Moses ṭhutdanh ah an ṭhu.

³ Cucaah tuah dingah an chimmi pauh cu tuah ko u. Asinain an tuahmi cu tuah ve hlah u, zeitintiah an chim i an tuah fawn lo.

⁴ Zeitintiah thilrit ngaimi an tuah i mikha an phorhter hna, anmah tu nih an kutdong par hmanh in an tawng duh fawn lo.

⁵ An tuahmi vialte cu minung hmuh ding lawngah an tuah. An bânbunh le an calkhimhmi an puamter i an angki fual an bawrhter.

⁶ Rawl dangh nâkah ṭhutnâk ṭha bik, sinagog ah ṭhutdanh sâng bik,

⁷ chawdawr hmun i kuttlaih le, ‘Rabi, Rabi, tiah kawh kha an tlaihchan.

⁸ Asinain nan nih cu, ‘Rabi’ i ti hlah u; zeitintiah Cawnpiaktu pakhat lawng lawng nan ngei, Krih Amah lawng lawng hi, nan dih lakin unau nan si.

⁹ Leicungah hin ahohmanh ‘Kapa’ ti hlah u; zeitintiah nan Pa cu pakhat lawng lawng a si i van i a ummi khi a si.

¹⁰ Cawnpiaktu, tiah i ti hlah u; zeitintiah Cawnpiaktu pakhat lawnglawng nan ngei, ‘Krih’ lawng hi a si.

¹¹ Nan lakah lianngan bik cu nan rianṭuantu ah a um deuh awk a si.

¹² Amah le amah â santermi pauh ṭhumh an si lai i amah le amah â ṭhummi pauh santer an si lai.

¹³ Nannih nawlbia cawnpiaktu le Farasih depde hna, ngaihchia nan va si dah! Zeitintiah vanbawi pennâk kha mi nan kharkanh hna, nanmah le nan lut duh lo, luh a duhmi zong nan kham hna.

¹⁴ Nannih nawlbiacawnpiaktu le Farasih depde hna, ngaihchia nan va si dah! Zeitintiah nuhmei chawva nan lâk piak hna i zapi hlen nâkah ngol hngal loin thla nan i camter. Cucaah thiam lo fak chin chin in nan co te lai.

¹⁵ Nannih nawlbiacawnpiaktu le Farasih depde hna, ngaihchia nan va si dah! Zeitintiah mi pakhat zumtu siter dingin rili le fingtlang nan ṭol dih, zumtu i nan sermi kha nanmah nâk leh hnih in hell fa ah nan canter ṭhân.

¹⁶ Nannih hruaitu mitcaw hna! Ṭempal chalh in biakam cu zeihmanh a si lo, asinain ṭempal i sui chalh i biakammi tu tlinter ding a si titu hna, ngaihchia nan va si dah!

¹⁷ Nan nih mihrut le mitcaw hna! Sui maw biapi deuh sui thiantertu ṭempal cu dah?

¹⁸ Biakṭheng chalh i biakam cu zeihmanh a si lo, a cung i pêkchanhmi chalh i biakam kha tlinter ding a si, titu hna,

¹⁹ Mihrut le mitcaw hna, thil pêkmi maw biapi deuh thilpêk thiantertu biakṭheng cu dah?

²⁰ Biakṭheng chalh i mi nih bia a kam ahcun a cung i pêkchanhmi zong â tel dih cang.

²¹ Ṭempal chalh i biakamtu zong nih a chung i a ummi chalh in bia â kam chih tawn.

²² Van chalh in bia â kammi nih Pathian Bawi ṭhutdan i a ṭhumi chalh in bia â kam tawn.

²³ Nannih nawlbiacawnpiaktu le Farasih depde hna, ngaihchia nan va si dah! Zeitintiah puṭinan, hamhhuai le aithing tiangin cheuhra cheukhat nan pêk, a biapi deuhmi nawlbia dinnâk, zângfahnâk le zumhnâk te hna nan thlah dorh fawn ṭung. Hi hna hi pei nan tuah deuh awk a si cu, a dang zong kha thlahdorh hlei lo in.

²⁴ Nannih hruaitu mitcaw, hmaisem a zeng i kalauk a dolhtu hna.

²⁵ Nannih nawlbiacawnpiaktu le Farasih depde hna, ngaihchia nan va si dah! Zeitintiah kheng le hrai a leng lei nan ṭawl i a chung lei tu cu ziarngeihnâk le nun thladorh nâkin a khat.

²⁶ Nang Farasih mitcaw, hrai le kheng chunglei kha ṭawl hmasa, cuticun a lenglei zong a thiang lai.

²⁷ Nannih nawlbiacawnpiaktu le Farasih depde hna, ngaihchia nan va si dah! Zeitintiah ṭamhmi thlân, lenglei dawh ngai, asinain a chungah mithi ruh le a thurmi bantuk khi nan si.

²⁸ Nannih zong lenglei mi hmuh nâkah mifel ngai nan lo, nan chung lei cu depdetnâk le nawlbuar nâkin a khat fawn.

²⁹ Nannih nawlbiacawnpiaktu le Farasih depde hna, ngaihchia nan va si dah! Zeicatiah Profet thlân nan ṭamh i miding hna thlân nan ṭamh,

³⁰ kan pu le chanah rak um u sih law, Profet an thah nâkah kan i tel hnga lo, nan ti tawn.

³¹ Profet hna thattu tefa nan si zia nan langhter chin chin.

³² An hringsor tuhna sual tahnâk hrai cu khahter law law u.

³³ Rul hna, rul fale hna, hremhmun hremnâk cu zeitindah nan luat khawh lai.

³⁴ Cucaah nan sinah, profet hna le, mifim hna le, nawlbiacawnpiaktu kha ka rak thlah hna lai, cheukhat nan rak thah hna lai i vailamah nan tah hna lai, cheukhat sinagog ah nan velh hna lai, khua kipah nan rak serhsat ṭhân hna ko lai.

³⁵ Abel midingpa thisen thawkin ṭempal le biakṭheng karlak i Barakiah fapa zekariah nan thahmi thisen tiang khan, miding nan thahmi thisen vialte kha nanmah cungah a tla te lai.

³⁶ Biataktein kan chimh hna, cu thil vialte hna cu atu chanmi hna cungah a phân te lai.

³⁷ Maw Jerusalem, Jerusalem! Profet hna thattu, na sin i thlahmi lungin a rak cheptu, Arpi nih a thla tangah a fale a huh bantukin, voi zeizatdah na fale huhphenh ka timh hna, asinain na duh fawn lo.

³⁸ Zohhmanh na inn cu a lawngin kaltâk a si te lai.

³⁹ Bawipa min i a rami cu thangṭhat si ko seh, nati hlan pauh atu thawkin naka hmu ti lai lo,” tiah a ti hna.