MATTHAI 22 - Laibaibal Thiang (BSI)

¹ Cun Jesuh nih tahchunh nâkin an sinah bia a chim ṭhân.

² “Vanbawi pennâk cu siangpahrang pakhat nih a fapa caah nupi ṭhit rawldanghnâk a tuahpiakmi bantuk a si,

³ ṭhitumhnâk rawl ei awkah a sawmmi hna va au dingin sinum kha a thlah hna; a sinain an ra duh lo.

⁴ Sinum dang a thlah ṭhan i an sinah, ka sawmmi hna sinah, rawl ei awk ka timh dih cang ka cawpa le satil thau thau ka thah hna i timh cia tein a um dih cang, ṭhit umhnâk rawl ei awkah ra cang u, tiah nan ti hna lai,” tiah a ti hna.

⁵ Asinain zei rel lo in an kaltâk hna, pakhat lo ah, pakhat a chawlehnâk ah an kal.

⁶ Midang nih sinum kha an tlaih hna i fak piin an hrem i an thah hna.

⁷ Cu thil cu siangpahrang nih a theih tikah a thin a hung ngaingai. Ralkap a thlah hna i lainawngmi kha hrawkin an khua zong mei in a khanghter dih hna.

⁸ Cun sinum hna sinah, rawl cu timh cia a si, asinnain ka sawmmi hna kha ei awkah an i tlâk lo.

⁹ Cucaah zatlâng lamah kal ulaw, nan hmuhmi pauh rawl ei awkah va sawm hna u,’ tiah a ti.

¹⁰ Cuticun sinum hna cu zatlâng lamah an kal, an hmuhmi pauh misual he miṭha he an rak hruai hna i ṭhitumhnâk in kha an khat.

¹¹ Siangpahrang cu a sawmmi hna zoh awk i a rat tikah an lakah ṭhitumhnâk puan â aih lomi pakhat a hmuh i

¹² a sinah, ‘Ka kawi zeiruangahdah ṭhitumhnâk puan aih loin hika ah na rat? tiah a ti. Anih nih zeihmanh a chim lo.

¹³ Siangpahrang nih sinum hna sinah, ‘A kut le ke ṭem ulaw, khualeng mui lakah hlawnh u, cukâ ah cun ṭah le hacang rialnâk a um lai, ’tiah a ti.

¹⁴ Zeitintiah sawmmi cu tampi an si i thimmi cu tlawm te an si, tiah a ti.

¹⁵ Cuticun Farasih hna cu an i tong i a chimmi bia in Amah an tlaihkhawh nâkhnga khua an khâng.

¹⁶ Anmah zultu le Herod zultu hna he a sinah an thlah i, “Cawnpiaktu, midik na si i Pathian kong biatak in na cawnpiak tawn, minung mithmai na zoh ballo ti kha kan theih, ahohmanh na thleidang hna lo.

¹⁷ Cucaah zeitindah na ruah? Sizar sin i ngunkhuai pêk hi phungning a si maw?” tiah an ti.

¹⁸ Jesuh nih an suahsualning kha a hngalh i, “Mi depde hna, zeicadah nan ka hnek sak?

¹⁹ Ngunkhuai phaisa kha ka hmuhsak tuah u,” tiah a ti hna. Cuticun nga-mu kha an pêk.

²⁰ Anih nih, “Hihi aho hmânthlâk le min dah a si?” tiah a ti hna.

²¹ Annih nih, “Sizar” tiah an ti. Anih nih, “Sizar thil cu Sizar pe ulaw, Pathian thil cu Pathian pe u,” tiah a ti hna.

²² Cubia cu an theih tikah an khuaruah a har tuk i lo koin an zâm.

²³ Cuni ṭhiamṭhiam ah Sadusih, thawhṭhânnâk a um lo, titu kha a sinah an ra i bia an hal.

²⁴ “Cawnpiaktu, Moses nih, fa ngei loin mi a thih ahcun, a nau nih fa a ngeihpiak lai tiah,” a ti.

²⁵ Asi, kan lakah unau pasarih an um, upa bik nih nupi a ngei i a thi, fa a ngeih manh lo caah a nau pa nih a ngeih ṭhân.

²⁶ Pahnihnâk zong fa ngei loin a thi, pathumnâk le pasarihnâk tiangin fa ngei loin an thih tâk.

²⁷ Andih lak an thih hnu ah minu zong a thi ve.

²⁸ Cuticun thawhṭan niah aho nupi bik dah a si hnga? An dih lakin an ṭhit dih fawn, tiah an ti.

²⁹ Jesuh nih, “Cathiang le Pathian thiltikhawhnâk nan hngalh lo caah nan palh tawn.

³⁰ Zeitintiah thawhṭhannâkah cun nupi le pasal an i ngei ti lai lo, van i Pathian vanmi hna bantuk an si lai.

³¹ Asinain mithi thawhṭhannâk kongah Pathian nih nan sin i a chimmi,

³² “Kei, Abraham Pathian, Isak Pathian, Jokob Pathian ka si, a timi kha nan rel bal lo maw? Pathian cu a thimi Pathian a si lo i a nungmi Pathian a si,” tiah a leh hna.

³³ Cu bia cu zapi nih an theih tikah a cawnpiakmi ah an khuaruah a har ngai ngai.

³⁴ Farasih hna nih, Sadusih hna holh kho loin a tuah hna ti an theih tikah hmun khatah an i pum.

³⁵ Cuticun an lak i phungthiam pakhat nih Amah hneksak nâkah,

³⁶ “Cawnpiaktu, nawlpek miah a zeihidah a nganbik hnga?” tiah a hal.

³⁷ Jesuh nih, “Bawipa, na Pathian cu na lungthin dihlak, na thlarau dihlak na ruahnâk dih lakin na dawt lai,” tiah a ti.

³⁸ Hihi nawlpêk nganbik le hmasa bik a si.

³⁹ A changtu cu, “Nangmah nâ dawt bangin na innpa na dawt lai” timi hi a si.

⁴⁰ Hi nawlpêk pahnih ah hin nawlbia le Profet hna bia vialte an i fun dih,” tiah a ti.

⁴¹ Farasih hna an i ton lio ah Jesuh nih bia a hal hna,

⁴² “Krih kong hi zeitindah nan ruah” Aho fapa dah a si? tiah a ti. Annih nih, “David Fapa,” tiah an ti.

⁴³ Anih nih, “Asiahcun David nih Thlarau thawngin zeitindah ‘Bawipa’ tiah a auh kun?

⁴⁴ David nih, ‘BAWIPA nih, ka Bawipa sinah, na ral hna na ke tangah ka chiah hlan lo cu, ka orh leiah ṭhu’ a timi kha.

⁴⁵ David nih ‘Bawipa’ a timi kha zeitindah a fapa cu a si khawh kun? tiah a ti.

⁴⁶ Kâ khat hmanh in an let kho lo, cuni thawk cun ahohmanh nih bia kâ khat hmanh an hal ngam ti lo.