MATTHAI 20 - Laibaibal Thiang (BSI)

¹ “Zeitintiah vanbawi pennâk cu, inn ngeitu nih a misur dûm i rian ṭuntu kawlah zingka teah a thomi bantuk a si.

² Anih nih rian ṭuntu hna he nikhat i ngamu pe dingah bia an khiah hnu ah, misur dûm ah a thlah hna.

³ Zing lei suimilam pakua hrawng i a chuah lio ah, chawdawr hmun i a dir sawsawh mi kha a hmuh hna i

⁴ an sinah, ‘Nannih zong misur dûmah vakal u law nan hmuh awk a simi cu kan pêk ve hna lai, tiah a ti hna i an kal.

⁵ Chun lai le zan lei suimilam pathum hrawngah, cubangin a tuah ṭhân.

⁶ Cun zanlei pa nga hrawngah ava chuak ṭhân i a dir sawsawh mi midang kha a hmuh ṭhân hna. Zeicadah ni tlâk te nan dir ko? tiah a ti hna.

⁷ Annih nih, ‘Ṭuannâk kan thei lo,’ tiah an ti. Anih nih, “Nan nih zong misur dûmah va ṭuan ve u, nan hmuh awk a simi cu nan hmu ko lai,” tiah a ti hna.

⁸ Zanlei ah dûm ngeitu nih dûm congtu hna sinah, “Rianṭuantu kha au hna law a hnu bik in a hmasa bik tiang an hlawh pe hna,” tiah a ti.

⁹ Zan lei pa nga hrawng i a ṭuanmi hna an ra i ngamu cio an hmu.

¹⁰ A hmaisa bik hna cu tam deuh hmuh ruahchan in an ra, asinain ngamu cio an hmu.

¹¹ Cun hlawh an lâk lio ah inn ngeitu sinah an phunzai,

¹² “Hi hmadung bik hna nih suimilam pakhat chung lawng an ṭuan i kan nih chun nitlâk nilin khua al lakah a ṭuanmi he â khat in nakan pêk,” tiah an ti.

¹³ Anih nih an lak i mi pakhat sinah, ka kawi, na cungah diklonâk ka ngeih ṭung lo, ngamu hlawh dingin hnatlâknâk kan tuah a si lo mei?

¹⁴ Na ta kha i lak law, kal ko, na sin i kapêk zat hi hma dung bik sin zongah pêk ka duh a si ko,

¹⁵ kata a simi cu ka duhning poh in ka tuah khawh ko, ka ṭhatnâk hi nannih nih nan hnahchuah awk a si maw? tiah a ti hna.

¹⁶ Cuticun hmadung bik hmasa bik a si lai i hmasa bik hmadung bik a si lai. Zeitintiah sawmmi cu tampi an si i thimmi bel tlawmte an si, tiah a ti.

¹⁷ Cun Jerusalem khua i Jesuh a kal lio ah, Mi Fapa hi tlângbawi upa hna le nawlbia cawnpiaktu hna kutah tlaihter a si lai, annih nih thiding in a cungah bia an chah lai,

¹⁸ “Zohhmanh u, Jerusalem ah kan kal lai, Mi fapa hi tlângbawi sâng hna le nawlbia cawnpiaktu hna sinah tlaihter a si lai i thi dingin thiamlo coter a si lai,

¹⁹ nichuak saihnâk le vuakding le vailamtahnâk i khenhchih dingin Gentel mi hna sinah an pêk lai. Cun ni thum ni ah a thoṭhân lai, tiah a ti hna.

²⁰ Cu cân ah Jebedi fapa pahnih annu cu a fapa le ratpi in a sinah a ra i khukbil i biak pah in thil a hal.

²¹ Anih nih, “Zeidah na duh,” tiah a ti. Anih nih, “Hi ka fapa pahnih hna hi na pennâkah na orhlei le na kehlei i an ṭhut khawh nâkhnga, ka hna tlâkpi hrâm ko,” tiah a ti.

²² Jesuh nih, “Nan halmi hi nan hngalh lo caah a si. Ka dinmi hrai nan ding kho lai maw? cun baptisma ka in ding nan ing kho ve lai maw? tiah a leh hna. Annih nih, “Kan ti khawh ko lai,” tiah an ti.

²³ Cuticun an sinah, “Ka hrai cu nan din ko lai, ka in hngami baptisma zong nan in ve ko lai, asinain ka orh le keh i ṭhutnâk nawl cu Keimah pek awk a si lo, ka Pa nih a timhhlamh piakmi hna caah a si,” tiah a ti.

²⁴ Lamkaltu pahra hna nih cucu an theih tikah unau pahnih hna cungah an i lawm lo ngai ngai.

²⁵ Asinain Jesuh nih a sinah a auh hna i, “Gentel biaceihtu hna cu an ukmi hna cungah an i bawiter ngai ngai i an mi rum hna nih nawlngeihnâk cu a hleihluat in an hman hnawh tawn hna.

²⁶ Asinain nan lakah cubantuk cu a si awk a si lo; nan lakah mi ngan bik si a duhmi cu nan sinum a si hmasa lai.

²⁷ Cun hmaisa bik si a duhmi pauh cu nan sal a si hmasa lai.

²⁸ Mi fapa hmanh hi rianṭuanpiakmi si awk ah a rat ṭung lo, rianṭuan ding le mitampi tlanhnâk caah a nunnâk pêk awkah pei a rat cu, tiah a ti.

²⁹ Jeriko khua in an chuah lio ah mi tampi nih Amah cu an zulh.

³⁰ Cun ngaihmanh mit caw pahnih lamkam i a ṭhumi hna nih Jesuh a lan lio ti an hngalh le cang ka, “Bawipa, David fapa kan zângfah ko,” tiah an au.

³¹ Mizapi nih an sik hna i daite i um dingin an chimh hna; asinain annih nih, “Maw Bawipa, David Fapa, kan zângfah ko,” tiah an au chinchin.

³² Jesuh cu a dir i anmah kha a kawh hna, “Zeidah tuahpiak awkah nanka duh?” tiah a ti.

³³ Annih nih, “Khua hmuh kan duh,” tiah an ti.

³⁴ Jesuh nih a zângfah hna i an mit kha a tongh. Hmakhatteah khua an hmu cawlh i Amah kha an zulh.