MATTHAI 2 - Laibaibal Thiang (BSI)

¹ Herod siangpahrang a ṭuan lio ah Judia ram Bethlehem khua i Jesuh a chuah tikah, ngaihmanh, nichuahlei in mifim Jerusalem khua ah an ra,

² “Judah Siangpahrang a chuakmi cu khuazeiahdah a um? Nichuahlei ah a arfi kan hmuh i Amah biak awkah kan ra” tiah an ti.

³ Cucu Herod nih a theih tikah, amah le Jerusalem i a ummi vialte an awlok a chong.

⁴ Tlângbawi upa le phungbia cawnpiaktu kha a kawh hna i Krih chuahnâk kong kha a hal hna.

⁵ Annih nih, “Judia ram Bethlehem khua ah, profet nih hitihin a rak ṭial:

⁶ ‘Nang, Bethlehem, Judia ram chungmi, Judia khuapi hna lakah na hmebik naisai lo; zeitintiah na chungin ka mi Israel hna kilvengtu ding Uktu kha a chuak lai,” tiah an ti.

⁷ Cuhnuah Herod nih mifim kha a thli tein a kawh hna i arfi a chuah cân kha ṭha tein a hal hna.

⁸ Bethlehem khua ah a kalter hna i, “Vakal u law, Ngakchia cu ṭha tein va kawl law nan hmuh tikah, kei zong nih ra in ka biak khawh ve nâkhnga, thawng rak ka thanh te u,” tiah a ti hna.

⁹ Siangpahrang bia an theih hnuah, an kal i zohhmanh, nichuahlei i an hmuhmi arfi kha, Naute umnâk cung a phanh i a dir hlan lo an hmaiah a kal.

¹⁰ Arfi an hmuh tikah an i lawm ngai ngai.

¹¹ Cubangin inn chung an luh tikah, Naute cu a nu Mary he an hmuh, cun an bawk i an biak. Cuticun an robawm kha ong in Sui, Frankinsen le Mura kha laksawng an pêk.

¹² Herod sinah kir ti lo dingin Pathian nih an mangah ralrin a pêk hna caah lam dangin an ram lei ah an kal.

¹³ An kal hnu ah, ngaihmanh, Bawipa vancungmi pakhat Josef sinah â lang i, “Naute le anu kha hruai hna law, Ezip ramah zâm, kan chimh ṭhân hlantiang cuka ah um, zeicatiah Herod nih Naute thah awkah a kawl,” tiah a ti.

¹⁴ Cuticun a tho i cu zan lila ah Naute le a nu cu hruai in Ezip ramah a kal,

¹⁵ Herod a thih hlantiang cuka ah an um, Bawipa nih profet hmangin, “Ka Fapa cu Ezip ram in ka auh,” tiah a rak chimmi a tlin nâkhnga caah a si.

¹⁶ Cuticun mifim hna nih an hlen ti kha Herod nih a hngalh tikah a thin a hung ngai ngai; a cân kong mifim hna sinin a rak theih cang bangin, Bethlehem khua le a pawngkam vialte i pa ngakchia kum hnih tanglei pauh that dingin ralkap kha a thlah hna.

¹⁷ Profet Jeremiah nih:

¹⁸ Ramah khua ah thawng a thang, ṭah le aihramnâk thawng a si; Rachel nih a fale a ṭah hna i an um ti lo caah hnemh khawh a si ti lo,” tiah a rak chimmi a tlin nâkhnga caah a si.

¹⁹ Herod a thih hnu ah, ngaihmanh, Bawipa vancungmi pakhat Ezip i a ummi Josef mangah â lang,

²⁰ “Tho law, Naute le anu kha hruai hna law, Israel ramah kal, zeitintiah Ngakchia pa thah a timtu kha a thi cang,” tiah a ti.

²¹ A tho i Naute le anu kha hruai in Israel ram kha an phân.

²² Asinain Arkelau nih apa Herod chângin Judia ramah Siangpahrang a ṭuan ti kha Josef nih a theih tikah, cuka i kal kha a ṭih, Pathian nih mangin ralrin a rak pêk cang bangin Galili ramah a kal.

²³ Nazaret khua ah an um i profet nih, “Nazaret khuami ti a si lai” tiah a rak chim chungmi a tlin nâkhnga caah a si.