MATTHAI 19 - Laibaibal Thiang (BSI)

¹ Jesuh nih bia a chim dih in hitihin a si, Galili ram a chuahtâk i Jordan varal Judia ramah a kal.

² Mi tampi nih an zulh i cukâ ah a rak damter hna.

³ Farasih zong a sinah an ra i hniksak del nâkah, “Zeiruang zongah, mi nih a nupi a ma kho maw? tiah an hal.

⁴ An sinah, “A hramthawk ah anmah Sertu nih ‘Pa le nu ah a ser hna,’ ti le

⁵ ‘Hiruangah hin pa nih anu le apa a kaltâk lai i a nupi â tlaih lai; cuticun titsa pumkhat an si cang lai,’ a ti, timi hi nan rel bal lo maw?

⁶ Cuticun pahnih an si ti lo i titsa pumkhat an si cang. Cucaah Pathian nih a fawnhmi cu minung nih ṭhen hlah seh,” tiah a leh hna.

⁷ Annih nih, “Asiah zeicadah Moses nih mâknâk ca pêk i mâk khawh a si,” a ti kun? tiah an ti.

⁸ Anih nih, “Nan lung a khon ruangah dah kaw, Moses nih mâknâk nawl an pêk hna cu, asinain a hramthawk ah cubantuk a rak si lo.

⁹ Kei nih cun nupa sualnâk an tuah ruangah si loin, nupi a ma i midang a `himi pauh cu ṭangdang kaimi an si. Cun mâkmi a `hitu zong ṭangdang kai a si,” tiah kan ti hna.

¹⁰ Lamkaltu hna nih, “Nuva kong i pa dirhmun cu ti a si ahcun nupi ngeihlo a ṭha deuh a si cu,” tiah an ti.

¹¹ Anih nih, “Cu bia cu a pêkmi hna ca dah ti lo ahcun mikip pom khawh a si lo.

¹² Zeitintiah cheukhat cu nu paw chungin tildih cia i a chuakmi an um, a cheu cu mi nih an til an dih chawmmi an um, cun vanbawi pennâk ruang i mahte i til â dikmi zong an um. A pom khomi pauh nih pom ko seh.” tiah a ti hna.

¹³ Cu cân ah an cungah kut a chuan i thla a campiak hna awkah ngakchia an ratpi i lamkaltu hna nih an rak sik hna.

¹⁴ Asinain Jesuh nih, “Ngakchia kha ka sinah ratter hna ulaw, dawn hna hlah u; zeitintiah vanbawi pennâk cu hibantuk hna caah hin a si,” tiah a ti.

¹⁵ An cungah akut a chuan i cuka hmun cu a chuahtâk.

¹⁶ Cun zohhmanh, mi pakhat a ra i a sinah, “Cawnpiaktu Ṭha zungzal nunnâk ngeih awkah zei bantuk ṭhatnâk dah ka tuah lai,” tiah a ti.

¹⁷ Anih nih, “Zeiruangahdah ṭha tiah naka ti? Ṭha cu pakhat lawnglawng a um. Cucu Pathian a si. Nunnâk i luh naduh ahcun nawlpêk kha zul hna,” tiah a ti.

¹⁸ Anih nih, “A zei cem hi dah,” tiah a ti. Jesuh nih, “Lai va nawng hlah, ṭangdang kaihlah, fir hlah, biahngaltu deu va si hlah,

¹⁹ ‘Nanu le napa upat hna, timi le, nangmah nâ dawt bangin na innpa na dawt hna lai,’ timi hna hi,” tiah a ti.

²⁰ Tlangval pa nih, “Cu vialte cu ka ngakchiat lio in ka zulh dih cang, zeidah a baumi a um maw? tiah a ti.

²¹ Jesuh nih, “Tlamtlingmi si na duh ahcun, va kal law, na ngeihmi vialte zuar law, mi sifak va pe hna, cun vanah ro na ngei lai, cun ra law ka zul,” tiah a ti.

²² Tlangval pa nih cu bia a theih tikah hmaichia ngaiin a kal, zeitintiah chawva tampi a ngeimi a si.

²³ Jesuh nih lamkaltu hna sinah, “Biataktein kan chimh hna, mirum caah vanbawi pennâk chung i luh cu a har tak takmi a si.

²⁴ Kan chimh ṭhân hna, “Pathian pennâk chung i mirum luhnâk cha cun kalauk ṭhim hna i luh a fawi deuh,” tiah a ti.

²⁵ Cu bia cu lamkaltu hna nih an theih tikah, an khuaruah a har ngaingai, “Ahodah khamh a si kun lai? tiah an ti.

²⁶ Jesuh nih a zoh hna i an sinah, “Cucu minung caah tuahkhawh a si lo, asinain Pathian he cun zeizong vialte tuah khawh a si,” tiah a ti.

²⁷ Peter nih leh pah in a sinah, “Zohhmanh, zeizong vialte kaltâk in kannih nih kan in zulh. Zeidah kan hmuh kun lai? tiah a hal.

²⁸ Jesuh nih, “Biataktein kan chimh hna, sertharnâk ah, Mi Fapa hi a bawiṭhutdanh cung i a ṭhut tikah, nannih aka zultu hna hi, Israel phun hleihnih cungah biaceihtu siin, bawiṭhutdanh hleihnih cungah nan ṭhu ve lai.

²⁹ Ka min ruangah inn, unau, farnu, nu le pa, fale hna le loram a kaltâkmi cu a letza in an hmu ṭhân lai i zungzal nunnâk zong an ngei lai.

³⁰ Asinain mi tampi hmasa bik kha a hnu bik an si lai i a hnubik a hmasa bik an si lai.