MATTHAI 18 - Laibaibal Thiang (BSI)

¹ Cu cân ah lamkaltu kha a sinah an ra i, “Vanbawi pennâk ah ahodah a ngan bik a si lai,” tiah an ti.

² Jesuh nih ngakchia kha a auh i an laiah a dirter i

³ “Biataktein kan chimh hna, nan i leh i ngakchia bantuk ah nan i can lo ahcun vanbawi pennâk ah nan lut hrimhrim lai lo.

⁴ Cucaah hi ngakchia bantuk i toidormi pauh cu vanbawi pennâk ah mingan bik an si lai.

⁵ Hi ngakchia pakhat te hi Keimah min in a cohlangmi pauh cu Keimah cohlangtu an si.

⁶ A ka zumtu lak i a hmebik zong a sualtertu pauh cu facang rialnâk lung a hngawng ah thlaih i rili a thuhnâk bik i pilter kha a caah a ṭha deuh.

⁷ Tluknâk ruangah vawlei hi chiatserh si ko seh. Zeitintiah tluknâk kha a um awk hrimhrim a si; asinain tluknâk a umtertu cungah chiatserhnâk tlung ko seh.

⁸ Na kut siseh, na ke siseh an thukter ahcun, tan law hlawnh ko; kut pahnih le ke pahnih he zungzal mei chung hlawnh nâk cha cun pum tling loin nunnâk i luh na caah a ṭha deuh.

⁹ Na mit nih an tlukter ahcun khoih law hlawnh. Mit pahnih he hell mei i kal nâk cha cun mit pakhat he nunnâk i luh na caah a ṭha deuh.

¹⁰ Hi mi hme bik hna hi zomhtaih lo dingin i ral ring u; zeitintiah an vancungmi hna nih van i Ka Pa mit hmai cu an hmuh tawn, tiah kan chimh hna.

¹¹ Zeitintiah Mi Fapa hi a tlaumi khamh awkah a rami a si.

¹² Zeitindah nan ruah? Mi nih tuu zakhat ngei in an lakah pakhat te tlau sehlaw, sawmkua le pakua kha kaltâk in tlangah a kai lai i a tlaumi kha a kawl hnga lo maw?

¹³ Biataktein kan chimh hna, a hmuh ṭhân ahcun a tlau lomi sawmkua le pakua hna nâkin pakhat te cungah khan â lawm deuh lai.

¹⁴ Cubantukin hi hna lak i a hme bik pakhat te tlau hmanh hi van i nan Pa duhning a si lo.

¹⁵ Cun na unau nih na cungah sualnâk a tuah ahcun, va kal law, amah le nangmah lawng nan si lio ah na chimhhrin lai. Na bia a ngaih ahcun, na unau na tei cang.

¹⁶ Asinain na bia a ngaih duh lo ahcun, mi dang pakhat, asiloah pahnih maw nâ sawm lai; cuticun bia vialte hi mi pahnih, asiloah pathum theihpinâk in fehter a si lai.

¹⁷ Cun an bia zong a ngaih duh lo ahcun kawhhran sinah na kalpi lai. Kawhhran bia zong a ngaih duh lo ahcun, amah cu zumh lotu ngunkhuai khawltu bantuk a si cang lai.

¹⁸ “Biataktein kan chimh hna, vulei cungah nan ṭemmi vialte vanah ṭem an si lai i vulei cungah nan phoihmi vialte vanah phoih an si lai.

¹⁹ Biataktein kan chimh hna, vulei cungah mi pahnih an thil halmi kongah an lung â ruan ahcun van i ka Pa nih a tuah piak hna lai.

²⁰ Zeitintiah mi pahnih, pathum, ka min i an i pumhnâk pauh ah an sinah ka um tawn,” tiah a ti.

²¹ Peter a ra i, “Bawipa, ka unau nih ka cungah sualnâk tuah sehlaw, voi zeizat tiang dah ka ngaih thiam lai? Voi sarih tiang in maw?” tiah a ti.

²² Jesuh nih, “Voi sarih tiangin kan ti lo, voi sarih let 70 tiangin kan ti,” tiah a ti.

²³ Cucaah vanbawi pennâk cu, bawi pakhat nih a sal hna sinah phaisa kong fel fai tein tuah a timhmi he tahchunh a si lai.

²⁴ Cun rian ṭuan a thawk nâkah, tangka talen thonghra a batu a sinah an ratpi.

²⁵ Asinain a cham khawh lo caah, amah le a nupi le fale he, a ngeihmi vialte he zuar i cham dingin a bawipa nih nawl a pêk.

²⁶ Cucaah cu salpa cu a bawi hmai ah a bawk i, “Ka bawipa, ka cungah vel ngei ko, a dih lakin kan pêk dih te ko lai, tiah a nawl.

²⁷ A bawipa nih a salpa cu a zângfah i a chuahter hnu ah a leiba cu a ngaihthiam dih.

²⁸ Asinain cu salpa cu a chuah hnu ah, a sal hawi ngamu zakhat a batu kha a va hmuh; a tlaihbawh i na leiba kha ka pe, tiah a hrom in a dih.

²⁹ Cuticun a sal hawi cu a bawk i ka cungah vel ngei ko, a dih lakin kan cham te ko lai, tiah a nawl.

³⁰ A duh lo i a leiba a cham hlan lo thongah a thlak.

³¹ Cuticun sal dang hna nih a tuahmi an hmuh tikah, an lung a fak i a tuahmi vialte kha an bawipa an va chimh.

³² Cutikah a bawipa nih cupa cu a kawh i a sinah, “Sal chiava, naka nawl tuk ruangah kan ngaihthiam a si lo maw?

³³ Kan zângfah bantuk tein na sal hawi zong na zângfah awk a si lai lo maw? tiah a ti.

³⁴ An bawipa cu a thin a hung tuk i a leiba vialte a cham hlan lo mi hremtu hna sinah a pêk.

³⁵ Cuticun lungthin tak tein nan unau sualnâk nan ngaihthiam hna lo ahcun, van i ka Pa zong nih cubangin nan cungah a tuah ve lai.