MATTHAI 17 - Laibaibal Thiang (BSI)

¹ Niruk hnu ah Jesuh nih Peter, Jeim le a nau Johan kha a kalpi hna i tlâng sângpi ah a kaipi hna;

² an hmaiah a muihmai kha â thleng. A hmai cu ni bangin a ceu i a hnipuan kha rang cercur in an um.

³ Cun zohhmanh, Moses le Elijah an rung lang i Amah he bia an i ruah.

⁴ Cuticun Peter nih, “Bawipa, hika i um hi kan caah a ṭha; na duh ahcun thlâm pathum in ka sak lai; pakhat na ca, pakhat Moses ca, pakhat Elijiah ca,” tiah a ti.

⁵ A chim lioah khan, zohhmanh, a rângmi minmei nih a tuam hna i chikkhatteah minmei chungin aw pakhat a hung chuak, “Hihi Ka Fapa dawtmi a si, Amah bia kha ngai u,” tiah a ti.

⁶ Lamkaltu nih cucu an theih tikah, an ṭih tuk i an bawk.

⁷ Asinain Jesuh nih a rak tongh hna i, “Tho u, ṭih hlah u,” tiah a ti hna.

⁸ An hun zoh tikah Jesuh dah ti lo cu ahohmanh an hmu ti hna lo.

⁹ Cun tlâng cungin an ṭum lioah Jesuh nih an sinah, “Mi Fapa hi thih nâkin thawhter a si ṭhân hlan lo, hi langhnâk hi ahohmanh chim hna hlah u,” tiah nawl a pêk hna.

¹⁰ A Lamkaltu hna nih, “Zeiruangahdah nawlbiacawnpiaktu hna nih Elijah a ra hmasa lai, an ti tawn,” tiah an hal.

¹¹ Jesuh nih, “Asi, Elijah cu a rat hmasat awk a si taktak ko, zeizong vialte a remh ṭhân lai,” tiah a leh hna.

¹² Asinain kan chimh hna, Elijah cu a ra diam cang, amah cu an rak hngal lo i a cungah an duh ning pauhin an rak tuah. Cubantukin Mi Fapa zong nih anmah kut in a tuar ve te lai,” tiah a ti.

¹³ Cuticun Lamkaltu hna nih Baptisma petu Johan kong a chimmi a si ti kha an hun hngalh.

¹⁴ Cun mizapi umnâk hmun an phâk tikah, mi pakhat a sinah a ra i a hmai ah kun in,

¹⁵ “Bawipa, ka fapa hi zângfah hrâm ko, mi tlu a si i a temtuarning a fak tuk: voi tampi ti le mei ah a tlu tawn.

¹⁶ Na lamkaltu sinah ka ratpi i an damter kho lo,” tiah a ti.

¹⁷ Jesuh nih, “Maw, zumhnâk ngeilo le ningcang loin a nungmi hna, nan sinah zeicandah ka um ko rih lai? Zeicandah kan in ko rih hna lai? Amah cu ka sinah ratpi u,” tiah a ti.

¹⁸ Jesuh nih khuachia cu a sik i a chungin a chuak; cu cân thawkin ngakchia cu a dam.

¹⁹ Lamkaltu hna cu anmah te lawng Jesuh sinah an ra, “Zeiruangahdah kan ṭhawl khawh lo? tiah an ti.

²⁰ Jesuh nih an sinah, “Nan zumh lo ruangah a si; biatak kan chimh hna an `amci tia zumhnâk nan ngeih ahcun, hi tlâng hi, khi ka ah vâ thawn, nan ti lai i â thawn ko lai, nan tuah khawh lomi zeihmanh a um lai lo,” tiah a ti hna.

²¹ Asinain, “Hibantuk hi thlacamnâk le rawl ulhnâk dah ti lo cun a chuak kho lo,” tiah a ti.

²² Galili ram i an um ko lio ah, Jesuh nih an sinah, “Mi Fapa hi minung hna kut ah tlaihter a si te lai,

²³ an thah lai i nithum ni ah thawh terin a um lai,” tiah a ti. Cun an ngaih a chia ngai ngai.

²⁴ Kapernaum khua an phâk tikah, ṭempal ngunkhual khawltu kha Peter sinah an ra i, “Nan Cawnpiaktu nih ṭempal ngunkhuai a pe bal maw? tiah an ti.

²⁵ Anih nih, “A pêk tawn ko,” tiah a ti. Inn i a luh tikah Jesuh nih, “Simon, zeitindah na ruah? Vawlei bawi hna nih thilri ngunkhuai le pumpâk ngunkhuai hna hi ahosinindah an lâk tawn? An fale sin in maw, midang sin in? tiah a ti.

²⁶ Peter nih, “Midang sin in,” tiah a ti. Jesuh nih, cuti a si ahcun a fale cu an luat tinâk a si.

²⁷ Asinain lungsilo i kan umter suak nâkhnga lo tiva ah va kal law, sio va thla. A hmaisa bik a chuakmi nga kha tlai, a kâ na kau lai i fanghnih na hmuh lai, cucu la law, nang le kei caah va pe hna,” tiah a ti.