MATTHAI 13 - Laibaibal Thiang (BSI)

¹ Cu ni ah Jesuh inn in a chuak i rili kamah a ṭhu.

² Cun a sinah mi tampi an i pum i tilawng cungah a kai, a ṭhut hnu ah mizapi kha tikam ah an dir.

³ Tahchunhnâk hmangin bia tampi a cawnpiak hna, “Ngaihmanh u, thlaici vorhtu thlaici vorh ah a kal.

⁴ Thlaici a vorhmi cheukhat cu lam lakah an tla i vate nih an char dih.

⁵ A cheu lung lak lei a pannâk hmunah a tla. Lei a pan caah a keuh cawlh.

⁶ Asinain ni a hung tlân tikah uai lak in a emh, hram a bunh lo caah a lo cawlh.

⁷ Cheukhat hling lakah a tla, hlingkung a ṭhang i lo lak in a khuh.

⁸ Sihmanhsehlaw cheukhat lei ṭha ah tla i a let zakhat, a let sawmruk, a let sawmthum in theitlai an chuah.

⁹ Theihnâk dingah hnâ a ngeimi pauh nih thei hna seh,” tiah a ti.

¹⁰ Cun lamkaltu kha a sinah an ra i, “Zeiruangahdah tahchunhnâk in an sinah bia na chim?” tiah an ti.

¹¹ Anih nih, “Vanbawi pennâk biathli hi nan hngalh dingah pêk nan si, asinain annih cu pêk an si ve lo ruangah a si,” tiah a ti.

¹² Zeitintiah a ngeimi pauh tam chinchin in a ngeih nâkhnga an chap chih hna lai, a ngei lomi cu a ngeihchun hmanh an lâkpiak lai.

¹³ Curuangahdahkaw an sin i tahchunhnâk i bia ka chimh hna cu, an hmu ko nain an hmu taktak lo. An thei ko nain an hngal taktak lo, a sullam an hngalh khawh lo caah.

¹⁴ Cun an sining Isaiah nih a rak chim chungmi kha a tling. Hnâ in an thei ko nain, a sullam an hngal kho lo. Hmuh cu nan hmuh ko nain nan lung a piang kho lo.

¹⁵ Zeitintiah hi miphun hna lungthin hi a khong cang i an hnâ zong a chêt. An mit zong an i au kho lo. Culoahcun, an mit in an hmuh lai, an hnâ zong nih a theih lai i an lung in an hngalh lai, an i mer lai i ka rak damter sual hna lai,” tiah a rak ti.

¹⁶ Nan mit hi a van a ṭha i nan hnâ hi a van a ṭha tuk. zeicatiah an hmuh i an theih cang.

¹⁷ Biataktein kan chimh hna, “Profet tampi hna le miding fel tampi hna nih nan hmuhmi hi hmuh an duh nain an hmu kho lo, nan theihmi hi theih an duh nain an thei kho lo.

¹⁸ Cucaah thlaici vorh tahchunhnâk hi rak ngai hmanh u:

¹⁹ Mizei pauh nih pennâk Thawngṭha hi a theih i a sullam a hngalh lo ahcun, mi ṭhalopa cu ara i a lungthin i a tlami thlaici cu a lâkpiak tawn. Cucu lamlak i a tlami cu a si.

²⁰ Lungtamnâk hmun i a tlami cu, bia kha an theih i lungtho ngai in a cohlang cawlhmi an si;

²¹ Asinain a chungah hram a thlak lo caah, cân toi te lawng a nguh. Bia ruang i serhsatnâk le hremnâk a phâk tikah a tlu tawn.

²² Hling lak i a tlami cu, bia cu a theih ko. Asinain hi vawlei thil le rum duhnâk nih bia cu a khuh caah theitlai a chuah kho lo.

²³ Asinain lei ṭha i a tlami cu bia a hnâ in a theih i a sullam a hngalmi kha an si; theitlai a chuahmi cu a let zakhat, a let sawmruk le a let sawmthum in a karh tawn.

²⁴ Tahchunhnâk dang an sinah a chim ṭhân, “Vanbawi pennâk cu a lo i ciṭha a vorhtu bantuk a si.

²⁵ Asinain zan i â hngailh lio ah a ralpa a ra i ciṭha lakah ciṭha lo a deu kha a rak vorh i lo diam a kal.

²⁶ Thlaici kha a keuh i theitlai a chuah tikah a deu kha a rak lang ve.

²⁷ Longeitu sinum kha an ra i, ‘Bawipa, lo ah ciṭha na vorh a si lo mei? A deu khi zeitindah a um khawh ê? tiah an ti.

²⁸ An sinah, ‘Kan ralpa cawlcanghnâk a si,’ tiah a ti. Sinum hna nih a sinah, “Asiahcun cu hna cu kan va khawmh hna lai maw? tiah an ti.

²⁹ Anih nih, “Sihlah e, a deu nan khawmhnâk ah a tak nan hrawh sual lai.

³⁰ Rawlṭuan tiangin umṭi ko hna seh, rawlṭuan tikah a ṭuntu hna sinah, a deu kha khawm hna ulaw meiphu ah paih hna u, a ṭhami kha buk chungah khumh hna u, ka ti te hna lai,” tiah a ti.

³¹ Tahchunhnâk dang kha an sinah a chim ṭhân, “Vanbawi pennâk cu an`amci fangkhat a lâk i a lo ah a tuhmi bantuk a si;

³² Ci vialte lakah a hme bik a si nain a ṭhan tikah thlai dang nâkin a ngan deuh i thingkung ah â cang; vanva an ra i a nge ah an riak tawn,” tiah a ti.

³³ Tahchunhnâk dang a chimh ṭhân hna i, “Vanbawi pennâk cu nu pakhat nih thilnu â lâk i changvut relkhat thawhter ding i a phulhmi bantuk a si.

³⁴ Cuvialte cu Jesuh nih tahchunhnâk in mizapi sinah a chim i tahchunhnâk lo cun an sinah zeihmanh a chim lo.

³⁵ Profet nih, “Tahchunhnâk in ka kâ ka pau lai i vawlei serka i â thupmi kha ka chim hna lai” tiah a rak chimmi kha a tlin nâkhnga caah a si.

³⁶ Cuhnuah Jesuh nih mizapi a ṭinter hna hnu ah inn ah a lut. A lamkaltu kha a sinah an ra i, “Lo i ṭhlaici deu kong kha kan chimfiang tuah,” tiah an ti.

³⁷ Anih nih an sinah, “Ciṭha vorhtu cu Mi Fapa hi a si.

³⁸ Lo cu vawlei hi a si. ciṭha cu pennâk fale hi an si. cideu cu misual fale an si.

³⁹ Ralchanhtu, cideu a vorhtu cu khuachia a si, Rawlṭuan cu vawlei donghnâk ding kha a si; rawl ṭuntu cu vancungmi an si.

⁴⁰ Cucaah a deu kha an khawmh hna i mei ah an paih bantukin vawlei donghnâk ah cun a um te lai.

⁴¹ Mi Fapa nih vancungmi kha a thlah hna lai, a pennâk chungin Ṭhatlonâk a tuahtu hna le, nawl buartu vialte an khawmh dih hna lai.

⁴² Meiphu chungah an hlawnh hna lai i cuka ah ṭah le hacang rialnâk a um lai.

⁴³ Miding cu an Pa pennâk ah ni bangin an ceu cang lai. Theihnâk dingah hnâ a ngeimi nih thei ko hna seh.

⁴⁴ Vanbawi pennâk cu lo i ro an phummi, mi nih a hmuh i a thuhmi bantuk a si. Â lawmhtuk ah a ngeihmi vialte a zuar i lo cu a va cawk.

⁴⁵ Vanbawi pennâk cu lungvar dawh kawlin chaw a lettu bantuk a si;

⁴⁶ Lungvar mansung a hmuh tikah a ngeihmi vialte a zuar dih i a cawk.

⁴⁷ Vanbawi pennâk cu rili chung i lênkhang zam i nga phunkip an awhmi bantuk a si.

⁴⁸ Lênkhang kha a khah hnu ah tikam ah an hnuh i ṭhutbu in a ṭhami an thim i a ṭha lomi kha an hlawnh ṭhân hna.

⁴⁹ Vawlei a dongh tik zongah cubantuk cu a si te lai. Vancungmi kha an chuak lai i miṭha sinin miṭha lo kha an thleidan hna lai;

⁵⁰ Meiphu chungah an hlawnh hna lai. Cukâ ah cun ṭah le ha cang rialnâk a um lai,” a ti hna.

⁵¹ Jesuh nih an sinah, “Hi thil vialte hi nan theithiam maw? a ti hna. Annih nih Aw, kan theihthiam ko, Bawipa,” tiah an ti.

⁵² Anih nih “Nawlbia cawnpiaktu, vanbawi pennâk kong a cawng cangmi hna cu, inn ngeitu a ro bawm chungin thilhlun le thilthar a chuah tertu bantuk a si,” tiah a ti hna.

⁵³ Jesuh nih tahchunhnâk a chimdih hnu ah cu hmun cu a chuahtâk.

⁵⁴ A umnâk khua a rak phân i an Sinagog ah a cawnpiak hna, an khuaruah a har ngaingai. “Hipa nih hin hi fimnâk le khuaruahhar tuahkhawhnâk hi khauzeiindah a hmuh?

⁵⁵ Hipa hi zungthiampa fapa kha a si lo maw? Anu zong Mary an timi a si lo maw? A nau le zong Jeim, Josef, Simon le Judas an timi an si lo maw?

⁵⁶ Afar le zong kan sin i ummi an si lo maw? Hipa nih hin khuazeiindah hi thil vialte hi a hmuh hnga?” tiah an ti.

⁵⁷ Cuticun Amah cu an zum kho lo. Jesuh nih an sinah, “Profet cu amah khua dah ti lo ah cun conglomh lo in a um bal lo,” tiah a ti.

⁵⁸ An zumhlonâk ruangah cuka ah thil lianngan tampi a tuah lo.