MATTHAI 1 - Laibaibal Thiang (BSI)

¹ Abraham Fapa, David Fapa, Jesuh Krih hringtu hna ṭialnâk cauk:

² Abraham nih Isak a hrin, Isak nih Jakob a hrin, Jakob nih Judah le a unau a hrin hna.

³ Judah nih Tamar sinin Perez le Zerah a hrin hna; Perez nih Hezron a hrin; Hezron nihRâm a hrin;

⁴ Râm nih Aminnadad a hrin, Aminadad nih Nason a hrin, Nason nih Salmon a hrin.

⁵ Salmon nih Rahab sin in Boaz a hrin, Boaz nih Ruth sinin Obed a hrin, Obed nih Jessi a hrin.

⁶ Jessi nih David a hrin; David nih Uriah nupi sinin Solomon a hrin.

⁷ Solomon nih Rehoboam a hrin, Rehoboam nih Abijah a hrin, Abijah nih Asa a hrin.

⁸ Asa nih Jehosafat a hrin, Jebosafat nih Joram a hrin, Joram nih Uziah a hrin.

⁹ Uziah nih Jotham a hrin, Jotham nih Ahaz a hrin, Ahaz nih Hezekiah a hrin.

¹⁰ Hezekiah nih Manase a hrin, Manase nih Amon a hrin, Amon nih Josiah a hrin.

¹¹ Babilon i sal an tân lio ah Josiah nih Jekoniah le a nau a hrin hna.

¹² Babilon saltân hnu ah Jekoniah nih Shealtiel a hrin i Shealtiel nih Zerubabel a hrin.

¹³ Zerubabel nih Abiud a hrin, Abiud nih Eliakim a hrin, Eliakim nih Azor a hrin,

¹⁴ Azor nih Zadok a hrin, Zadok nih Akim a hrin, Akim nih Eliud a hrin.

¹⁵ Eliud nih Eleazar a hrin, Eleazar nih Mathan a hrin, Mathan nih Jakob a hrin.

¹⁶ Jokob nih Josef, Mary va cu a hrin i cu Mary sin in Jesuh, Krih timi cu a chuak.

¹⁷ Abraham in David tiang chan 14 a si i David in Babilon saltan tiang chan 14 a si ṭhân, Babilon saltan in Krih tiang chan 14 a si.

¹⁸ Jesuh Krih chuah ning cu hitihin a si: Anu Mary cu Josef he an i ham i an i umh hlanah, Thiang thlarau nih nau a pawiter tiah hngalh a si.

¹⁹ Ava Josef, miding a simi nih mualphoter a duh lo i a thli tein an i hamnâk kha lêt a timh.

²⁰ Asinain cu kong a ruah lio ah ngaihmanh, Bawipa vancungmi a mangah â lang i, “Josef, David fapa, Mary hi na nupi ca i ṭhit awkah ṭih hlah, zeicatiah fa a pawimi hi Thiang thlarau sinin a si.

²¹ Fapa a hrin lai i a mi hna an sualnâk chungin a khamh hna lai caah a min ah JESUH tiah na sak lai,” tiah a ti.

²² Hi thil vialte hi BAWIPA nih Profet hmangin a rak chimmi,

²³ “Ngaihmanh, ngaknu thiang fa a pawi lai i Fapa a hrin lai, A min ah Immanuel an ti lai,” timi a tlin nâkhnga ca-ah a si. Immanuel ti cu, “Kan sinah Pathian a um” tinâk a si.

²⁴ Josef cu â hlau i BAWIPA vancungmi nih a chimh bangin Mary kha a ṭhit,

²⁵ Fapa hmaisa bik a hrin hlan pauh cu a ihpi lo. Cun amin ah JESUH tiah a sak.