MARKA 9 - Laibaibal Thiang (BSI)

¹ Anih nih, “Biataktein kan chimh hna hika i a dirmi hna lakah a cheu cu thiltikhawhnâk he Pathian pennâk a phânmi an hmuh hlan lo thihnâk a tep lo dingmi an um.

² Cubangin niruk hnuah Jesuh nih Peter le, Jeim le, Johan a hruai hna i a dang tein tlângsângpi cungah a kaipi hna. An hmaiah a muihmai â thleng.

³ A hnipuan kha a tleu i hawhra bantukin a râng, lei i thil sutu hna nih an suk khawh lo tiangin a râng.

⁴ Cun Elijah kha Moses he an rung lang i Jesuh he bia an i ruah.

⁵ Peter nih Jesuh sinah, “Rabbi, hika i um hi kan caah a ṭha, thlâm pathum in kan sak lai, Na caah pakhat, Moses caah pakhat, Elijah caah pakhat,” tiah a ti,

⁶ a ṭihtuk caah chimawk hmanh a hngal lo.

⁷ Cun minmei a rak zâm i lo lakin a tuam hna, cun minmei in aw a hung chuak i, “Hihi ka dawtmi Fapa a si, Amah bia ngai u,” tiah a ti.

⁸ Hmakhatteah an hun i mer i an zoh tikah, Jesuh le anmah dah ti lo cu ahohmanh an hmu ti lo.

⁹ Tlâng cungin an rung ṭum i Mi Fapa hi thihnâk in thawhter a si hlan pauh cu nan hmuhmi thil hi ahohmanh chim hna hlah u tiah nawl a pêk hna.

¹⁰ Cu bia cu an lungthin ah an chiah i thihnâk in thawhṭhân timi sullam cu zeidah a si hnga tiah an i hal tawn.

¹¹ A sinah, “Zeiruangahdah nawlbia cawnpiaktu hna nih, Elijah a ra hmasa lai, an ti tawn,” tiah an hal.

¹² A leh hna i, “Elijah cu a rat hmasat awk a si, zeizong vialte a remh dih lai. Mi Fapa kongah thil tampi tuarin mi zawmhtaih in a um lai, tiah zeiruangahdah an rak ṭial hnga?

¹³ Asinain kan chimh hna, Elijah cu a ra ko cang, an rak ṭial cang bangin, an duh duhin a cungah an tuah,” tiah a ti.

¹⁴ Lamkaltu sin a phâk tikah, pawngkam mibupi tampi hna le nawlbia cawnpiaktu hna an i al len kha a hmuh hna.

¹⁵ Hmakhatte i an hmuh tikah, mizapi cu an khuaruah a har ngaingai, an tlikhnawh i a kut an va tlaih.

¹⁶ Nawlbia cawnpiaktu kha a hal hna i, “Zeidah nan i al lenmi cu?” tiah a ti.

¹⁷ Cun zapi lakah mi pakhat nih, “Cawnpiaktu, ka fapa holh kho loin khuachia tuahmi ka ratpi.

¹⁸ A tlaihnâk hmun pauh ah a tlukter i a buanbara kha a chuak tawn, a hacang a rial i a der chin lengmang. Na lamkaltu hna hi ṭhawl ka fial hna i an ṭhawl kho lo,” tiah a ti.

¹⁹ Anih nih, “Maw, ṭhangthar zumhnâk a ngei lomi hna, zeicandah nan sinah ka um lai? Zeicandah kan in khawh hna lai? Ka sinah ratpi tuah u,” tiah a ti.

²⁰ Cuticun Jesuh sinah an ratpi, Jesuh a hmuh le cângkâ thlarau nih cun ngakchia cu a tongh ṭhân, vawlei ah tlu in a buanbara kha a chuak i â chaih lên.

²¹ Anih nih apa sinah zeicandah hitihin a rak um cang? tiah a hal. Anih nih, ‘A ngakchiat lioin a si cang,’ tiah a ti.

²² Amah thah awkah mei le ti hna ah voi tampi a tlukter cang. Na tuah khawh ahcun, kan zângfah law, kan bawm hrâm ko, tiah a nawl.

²³ Jesuh nih, “Na zumh khawh ahcun, zumtu caah zei thil pauh a si kho ko,” tiah a ti.

²⁴ Cu cângkâ apa nih, “Bawipa, ka zumh ko, ka zumh lonâk ah ka bawm ko,” tiah mitthli he a ṭap.

²⁵ Mizapi an rak tlik len kha Jesuh nih a hmuh i thlarau thur cu a rak sik, thlarau holh kho lo le hnachet pa, nawl kan pêk, a chungin chuak law, lut ti hlah, tiah a ti.

²⁶ Cuticun thlarau cu a ai i fakpi in a hrem hnuah a chuahtâk. Ngakchia cu mithi bangin a um, cu caah mi tampi nih a thi cang, an ti.

²⁷ Asinain Jesuh nih a kut in a tlaih i a hun hnuh i a tho.

²⁸ Cun Jesuh cu inn i a luh hnuah a zultu hna nih mi dang theih loin, “Zeicadah kan ṭhawl khawh lo, ”tiah an ti.

²⁹ Anih nih, “Hibantuk hi thlacam le rawlulh lawnglawng nih a ṭhawl khawh,” tiah a ti.

³⁰ Cu hmun cu an chuahtâk i Galili ram kha a tan. Ahohmanh nih an hngalh a duh lo.

³¹ Zeitintiah a lamkaltu kha, “Mi Fapa hi minung hna kutah tlaihter a si lai, an thah lai, an thah hnu, nithum hnuah a tho ṭhân lai,” tiah a cawnpiak hna.

³² Asinain a chimmi cu an hngal kho lo, Amah le an hal ngam fawn lo.

³³ Cuticun Kapernaum a rak phân. Inn chung i a um lioah, “Lam ah khan zeidah nan i el len?” tiah a hal hna.

³⁴ Asinain dai tein an um, zeicatiah lam i an i elmi cu, ahodah a nganbik lai? timi kongah a si.

³⁵ A ṭhu i hleihnih kha a kawh hna i an sinah, “Hmasabik si a duh ahcun, hmadungbik le nan rian ṭuntu a si lai,” tiah a ti.

³⁶ Cuticun ngakchiate a ratpi i an laiah a dirter. A pom hnuah, an sinah,

³⁷ “Keimah minin ngakchiate a cohlangmi pauh cu aka cohlangtu a si. Aka cohlangmi pauh cu keimah aka cohlan si loin aka thlahtu cohlangtu a si.

³⁸ Cubangin Johan nih, “A kan zultu zong a si lomi nih na min in khuachia a ṭhawlmi kan hmuh, a kan zultu a si lo caah kan thlauh,” tiah a ti.

³⁹ Jesuh nih, “Thlauh hna hlah u, ka min i khuaruahhar a tuah i a ka thangchiattu an um bal lo.

⁴⁰ Zeitintiah aho pauh a kan doh lotu cu, kanmah lei ṭang an si.

⁴¹ Zeitintiah ka minin ti hraikhat an petu hna cu, biataktein kan chimh hna, an hmuh hngami cu an sung hrimhrim lai lo.

⁴² “Asinain a ka zumtu lakah a hmebik tluktertu pauh cu, an hngawngah facang rialnâk lung thlaih i rili ah thlak sisehlaw an caah a ṭha deuh lai,” tiah a ti.

⁴³ Na kut nih an tlukter ahcun tan ko. Kut pahnih he hell, a mit bal lomi mei i kalnâk cha cun, kutpakhat he nunnâk i luh a ṭha deuh.

⁴⁴ Cuka ah an tholung a thi bal lo i an mei zong a mit bal lo.

⁴⁵ Nake nih an sualter ahcun tan ko. Ke pahnih he hell, a mit bal lomi mei i kalnâk cha cun, ke pakhat he nunnâk i luh kha na caah a ṭha deuh.

⁴⁶ Cuka ah an tholung a thi bal lo i an mei a mit bal lo.

⁴⁷ Na mit nih an sualter ahcun coih law hlawnh. Mit pahnih he hell, a mit bal lomi mei i hlawnhnâk cha cun, mit pakhat he nunnâk i kal na caah a ṭha deuh.

⁴⁸ Cuka ah an tholung a thi bal lo i an mei a mit bal lo.

⁴⁹ “Zeitintiah mikip mei i hneksak an si lai i thilpek vialte zong cite i alter an si lai.

⁵⁰ Cite hi a ṭha, asinain cite nih a alnâk a loh ahcun zeinihdah a alter ṭhân lai? Cucaah nanmah ah cite ngei cio ulaw, daihnâk he lengṭi u.